ރެއާލް މެޑްރިޑްގެ މިހާރުގެ ކުޅުންތެރިންގެ ތެރެއިން، އަންނަ ސީޒަންގައި ކޯޗް ޒައިނުއްދީން ޒިދާންގެ ޕްލޭންގައި ނުހިމެނޭ 14 ކުޅުންތެރިޔަކު ފޮނުވާނެ ކުލަބުތަކެއް ހޯދުމުގެ މަސައްކަތް ރެއާލްއިން ފަށައިފި އެވެ.
މި ސީޒަންގައި، ޓީމަށް ޖެހުނު ބިކަ ހާލުން އަރައިގަތުމަށް، ޒިދާންގެ ޕްލޭންގައި ހިމެނޭ، ޓީމު އޯވަހޯލް ކުރުމުގެ ޕްރޮގްރާމްގެ ދަށުން، އާ ކުޅުންތެރިން ގެންނައުމުގެ ކުރިން ރެއާލުން އަޅަން ޖެހޭ ފުރަތަމަ ފިޔަވަޅަކީ، މިހާރު އެ ޓީމުގެ ކޮންޓްރެކްޓްގައި ތިބި އެހެން ކުޅުންތެރިން ކުޅޭނެ ކުލަބުތަކެއް ހޯދުމެވެ.
އަންނަ ސީޒަންގެ ޕްލޭންގައި ނުހިމެނޭ ބައެއް ކުޅުންތެރިންނަށް އެކަން ވަނީ އަންގާފަ އެވެ. އޭގެ ތެރޭގައި މިދިޔަ ތިން ސީޒަންގައި ޗެމްޕިއަންސް ލީގް ހޯދައިދިން ކޮސްޓަރިކާގެ ކީޕަރު ކޭލޯ ނާވަސް ހިމެނެ އެވެ. އެ ލިސްޓްގައި ފޯވަޑް ގެރެތު ބޭލް އާއި މިޑްފީލްޑާ ޑެނީ ސެބެއްޔޯސްވެސް ހިމެނެ އެވެ.
ބައެއް ކުޅުންތެރިން ދާއިމީކޮށް ފޮނުވާލާއިރު ލޯން އުސޫލުން ދޫކޮލާނެ ކުޅުންތެރިންވެސް ރެއާލްގެ ލިސްޓްގައި ހިމެނެ އެވެ. އެ ކުޅުންތެރިން ކުޅޭނެ ކުލަބުތައް ހޯދުމުގެ މަސައްކަތް ރެއާލުން ވަނީ ފަށާފަ އެވެ. ލޯން އުސޫލުން ދޫކުރާ ކުޅުންތެރިންގެ ތެރޭގައި ގިނައީ ޒުވާން ކުޅުންތެރިންނެވެ. އެ ކުޅުންތެރިން ލޯން އުސޫލުން ދޫކުރަނީ ކުޅުމުގެ ގިނަ ފުރުސަތު ދީ ތަޖުރިބާ ހޯދައިދިނުމުގެ ގޮތުންނެވެ.
އަންނަ ސީޒަނަށް ރެއާލްގެ ޓީމާ، އާ ދެ ކުޅުންތެރިޔަކު ގުޅުމަށް މިހާރުވެސް ވަނީ ހަމަޖެހިފަ އެވެ. އެއީ ޕޯޓޯގެ ބްރެޒިލްގެ ޑިފެންޑަރު އެޑާރ މިލީޓާއޯ އާއި ބްރެޒިލްގެ ސަންޓޯސްގެ ޒުވާން ފޯވަޑް ރޮޑްރީގޯ ގޮއިސް އެވެ. އިތުރު ހަތަރު ކުޅުންތެރިޔެއް ގެންނަން ރެއާލުން ވަނީ މަސައްކަތް ފަށާފަ އެވެ. އެ ޓީމުގެ އެންމެ ބޮޑު ޓާގެޓަކީ، ޗެލްސީގެ ފޯވަށް އެޑެން ހަޒާޑެވެ. ހަޒާޑް ގެނައުމާ މެދު ވަކިގޮތަކަށް މިމަހު ފަހު ކޮޅު ހަމަޖެހޭނެ ކަމަށް މީޑިއާތަކުން ރިޕޯޓް ކުރެ އެވެ.
ޒިދާންގެ ޓާގެޓް ލިސްޓްގައި މެންޗެސްޓާ ޔުނައިޓަޑްގެ ޕައުލް ޕޮގްބާވެސް ހިމެނެ އެވެ. އޭނާ ނުގެނެވިއްޖެނަމަ ޓޮޓެންހަމްގެ ކްރިސްޓިއަން އެރިކްސަން އެވެ. ވާތު ބެކަށް ލިޔޯންގެ ފާލޭންޑް މެންޑީ ގެންނަން ދަނީ މަސައްކަތް ކުރަމުންނެވެ. ސްޓައިކަރެއްގެ ގޮތުގައި ފްރެންކްފާޓަށް ކުޅެމުން އަންނަ ސާބިއާގެ ލުކަ ޖޮވިޗް ގެނައުމަކީވެސް ރެއާލްގެ ޓާގެޓެކެވެ.