ފައިނަލުގައި އެޓްލާންޓާގެ މައްޗަށް 2-0 ގެ ނަތީޖާއަކުން ކާމިޔާބު ހޯދައި، އިޓާލިއަން ކަޕު ނުވަތަ ކޮޕާ އިޓާލިއާގެ ޗެމްޕިއަންކަން ލާޒިއޯ ހޯދައިފި އެވެ.
ލާޒިއޯގެ ކާމިޔާބާއެކު، އަންނަ ސީޒަންގެ ޔޫރޮޕާ ލީގަށް، އެ ޓީމު ވަނީ ކޮލިފައި ވެފަ އެވެ. އިޓާލިއަން ކަޕުގެ ޗެމްޕިއަންކަން ލާޒިއޯ ހޯދީ ހަތް ވަނަ ފަހަރަށެވެ. މެޗުގެ އެންމެ ފަހު 10 މިނެޓާ ހަމަޔަށް ދިޔައިރުވެސް ލަނޑެއް ނުޖެހި އޮއްވައި، ލާޒިއޯއަށް ލީޑް ނަގައިދިނީ، ބަދަލު ކުޅުންތެރިޔެއްގެ ގޮތުގައި ކުޅެން ނިކުތް މިލަންކޮވިޗް ސަވިޗް އެވެ.
ލަނޑަށް ފަހު ތަފާތު ރޫހެއްގައި ކުޅެމުން ދިޔަ، ލާޒިއޯއަށް ނަތީޖާ ފުޅާކޮށްދިނީ ހޯކިން ކޮރެއާ އެވެ. މެޗުގައި ކަން ހިނގާދިޔަ ގޮތާމެދު އެޓާލާންޓާގެ ކޯޗް ޖިއާން ޕިއޭރޯ ގަސް ޕިރީނީ ހުރީ ވަރަށް ބޮޑަށް ހިތްހަމަނުޖެހިފަ އެވެ. އޭނާ ވަނީ ބޮޑެތި ތުހުމަތުތަކެއް ކޮށްފަ އެވެ.
އޭނާ ބުނީ މެޗަކީ، ބޮޑު އޮޅުވާލުމެއް ކަމަށާއި ރެފްރީގެ ނިންމުން ގޯސް ކަމަށެވެ. އޭނާ އިޝާރާތް ކުރީ އެޓްލާންޓާގެ މާޓެން ޑި ރޫން ފޮނުވާލި ހަމަލާ، ލާޒިއޯގެ ޕެނަލްޓީ އޭރިއާަ ތެރެއިން އެ ޓީމުގެ ޑިފެންޑަރު ބަސްޓޯސް އަތުގައި ޖެހުމުން ރެފްރީ އަޅައިނުލުމުންނެވެ. އެޓްލާންޓާގެ ބެންޗުން ވީއޭރާ ބަލަން އެދުނު ނަމަވެސް ރެފްރީ އެކަމަށް އިޖާބައެއް ނުދިނެވެ.
ކޮޕާ އިޓާލިއާ ކާމިޔާބު ކޮށްދިންނަމަވެސް، ލާޒިއޯ ދޫކޮށް ހިނގައިދާނެ ކަމުގެ އިޝާރާތެއް އެ ޓީމުގެ ކޯޗް ސިމޯނޭ އިންޒާގީ ވަނީ ދީފަ އެވެ.