ހުޅުމާލޭގައި ކުޑަ ދެ ފިރިހެން ކުއްޖަކަށް ޖިންސީ ގޯނާ ކުރި މައްސަލާގައި ހައްޔަރުކުރި މީހާ ކުރިމިނަލް ކޯޓުން ދޫކޮށްލީ އެ މައްސަލާގައި ކުރާނެ އިތުރު ތަހުގީގެއް ނެތް ކަމަށް ފުލުހުން ބުނެފައިވާތީ ކަމަށް އެ ކޯޓުން ބުނެފި އެވެ.
ހަ އަހަރުގެ ފިރިހެން ކުއްޖަކާއި އަށް އަހަރުގެ ފިރިހެން ކުއްޖަކަށް ގަދަކަމުން ބަދު އަހުލާގީ އަމަލު ހިންގި މައްސަލާގައި ހައްޔަރުކޮށްފައިވަނީ 19 އަހަރުގެ ފިރިހެނެކެވެ. އޭނާ ހައްޔަރުކޮށްފައިވަނީ މިދިޔަ މަހުގެ 26 ވަނަ ދުވަހު އެވެ.
އެމީހާގެ ބަންދަށް އެންމެ ފުރަތަމަ ޖެހީ 12 ދުވަހެވެ. އެ މުއްދަތު ހަމަވުމުން މިއަދު ފުލުހުން ވަނީ އޭނާގެ ބަންދު އިތުރު ކުރުމަށް ކުރިމިނަލް ކޯޓަށް ގެންގޮސްފަ އެވެ.
އެމީހާ ދޫކޮށްލި ސަބަބު ހާމަކޮށް ކުރިމިނަލް ކޯޓުން މިރޭ ބުނީ މައްސަލައިގައި އިތުރަށް ކުރާނެ ތަހުގީގެއް ނެތްކަން އައިއޯގެ ބަހުން އެނގޭ ކަމަށެވެ. އަދި އޭނާ ބަންދުގައި އިތުރަށް ބެހެއްޓުމަށް ބޭނުންވާ ސަބަބެއްކަމަށް ފުލުހުންގެ ފަރާތުން ޝަރީއަތުގައި ބުނެފައި ވަނީ އޭނާގެ ފުރާނައަށް ނުރައްކާ އޮތުން ކަމަށެވެ. ނަމަވެސް ރައްކާތެރިކަމާއެކު ދިރިއުޅެވޭނެ މާހައުލެއް އޭނާއަށް އެބައޮތް ކަމަށް އޭނާގެ ފަރާތުން ޝަރީއަތުގައި ބުނެފައިވާ ކަމަށް ކޯޓުން ބުންޏެވެ.
އޭނާ ހައްޔަރުކުރީ އާންމުންގެ ބަޔަކު ހުޅުމާލޭގެ މަގުމަތީ އޭނާގެ އަންނައުނު ބާލުވައި ގަންހިންގުވަނިކޮށެވެ. އޭނާ ވަނީ ގަންހިންގުވުމުން ކުށަށް އިއުތިރާފްވެސްވެފަ އެވެ. އާންމުވެފައިވާ ވީޑިއޯއެއްގައި ކުދިން ބެހުނު ކަމަށް އޭނާ އެއްބަސްވާ މަންޒަރު ފެނެ އެވެ.