ވީއޭއެމްގެ މައްސަލަތައް ހައްލު ކުރުމަށް ފަހު ތިން މަސް ދުވަސް ތެރޭ އާ އިންތިހާބެއް ބާއްވަން މަސައްކަތް ކުރާނެ ކަމަށް، ވީއޭއެމްގެ އިންޓަރިމް ކޮމިޓީގެ ޗެއާމަން އަބްދުﷲ އާމިރު ވިދާޅުވެއްޖެ އެވެ.
މިދިއަ ހޯމަ ދުވަހު ވީއޭއެމްގެ އެގްޒެކެޓިވް ކޮމިޓީ އުވާލުމަށް ފަހު، ސްޕޯޓްސް ކޮމިޝަނަރު ވަނީ ވޮލީއަށް ދިމާވެފައިވާ މައްސަލަތައް ހައްލު ކުރުމަށް ފަސް މެންބަރުންގެ އިންޓަރިމް ކޮމިޓީއެއް އެކުލަވައިލައްވާފަ އެވެ. އެ ކޮމިޓީގައި އާމިރު އިތުރުން ތިއްބަވަނީ ވީއޭއެމްގެ ކުރީގެ ޖެނަރަލް ސެކެޓްރީ ހުސައިން މުހައްމަދާއި، ހޭންޑްބޯލް މޯލްޑިވްސްގެ ރައީސް އަހްމަދު އިސްމާއީލް އާއި ޔޫތު ސްޕޯޓްސް މިނިސްޓްރީގެ ދެ ބޭފުޅުންނެވެ.
ކުރިން ބާސްކެޓް ބޯލް އެސޯސިއޭޝަންގެ ނައިބު ރައީސްކަން ވެސް ކުރެއްވި އާމިރު ވިދާޅުވީ ކުޅިވަރުގެ ގާނޫނުގެ ދަށުން އިންޓަރިމް ކޮމިޓީއަށް ދީފައި ވަނީ ތިން މަހުގެ މުއްދަތެއް ކަމަށެވެ. މުއްދަތު ހަމަ ވުމުގެ ކުރިން އާ އިންތިހާބަކަށް ދިއުމަށް މަސައްކަތް ކުރާނެ ކަމަށެވެ.
"މިވަގުތަކަށް މަސައްކަތުގެ ވަކި ޓައިމްލައިނެއް އެކުލަވައެއް ނުލެވޭ އަޅުގަނޑުމެން މިވަގުތު މި ގެންދަނީ މައުލޫމާތު އެއް ކުރަމުން އެއަށް ފަހު މަސައަތް ކުރިއަށް ގެންދާނެ ގޮތެއް ކަނޑައަޅާނީ،" މޯލްޑްވްސް ސޮކާ މޭޓްސްގެ އިސް މަގާމެއް ވެސް ފުރުއްވާ އާމިރު ވިދާޅުވި އެވެ. "މަސައްކަތް ކުރާނީ ތިން މަސް ދުވަސްތެރޭގައި އިންތިހާބު ބޭއްވުމަށް."
އޭނާ ވިދާޅުވީ ވީއޭއެގެ ކުރީގެ ރައީސް މުހައްމަދު ލަތީފު މިވަގުތު ރަށުގައި ނޫޅުއްވާތީ އޭނާގެ ފަރާތުން ހޯދަންޖެހޭ މައުލޫމާތު އަދި ނުލިބޭ ކަމަށެވެ. ނަމަވެސް ޖެނަރަލް ސެކެޓްރީ ޝާފީ އާއި އިދާރީ މުވައްޒަފުންގެ ފަރާތުން މިހާރު ވެސް އެއްބާރުލުން ލިބޭ ކަމަށެވެ.
"މަސައްކަތް މިވެނި ތާރީހެއްގައި ނިންމާލެވޭނެ ބުނާކަށް އަދި ނޭނގޭ މައުލޫމާތުތައް އެއް ކުރެވުނީމަ އެކަމަށް ގޮތެއް ކަނޑައަޅަން އެނގޭނީ."
ވީއޭއެމްގެ އެކްސްކޯ އުވާލަން ސްޕޯޓްސް ކޮމިޝަނަރު އަހްމަދު ސަލީމް (ބޮޑު ހީނާ) ނިންމެވީ، އެ އެސޯސިއޭޝަން ހިންގަމުން ދާ ގޮތާމެދު ކުޅިވަރުގެ އެކި ފަރާތްކުން ކަންބޮޑުވުން ފާޅު ކުރަމުންދާ ދަނޑިވަޅެއްގަ އެވެ.
އެ އެސޯސިއޭޝަން ހިންގުމުގައި ކޮރަޕްޝަނަށް މަގުފަހިވާ ކަންކަން ހިމެނޭ ކަމަށް ކުޅިވަރުގެ އެކި ފަރާތްތަކުން ވަނީ ތުހުމަތު ކުރެ އެވެ. ނަމަވެސް އެ ތުހުމަތުތައް ލަތީފު ވަނީ ދޮގު ކޮށްފަ އެވެ.
ކުރިގެ ރައީސް ލަތީފު ބޭނުންވާ ކުލަބުތަކެއް އެކަނި ހިމަނައިގެން، ވީއޭއެމްގެ ކޮންގްރެސް ބާއްވައި ހާމަކަމެއް ނެތް ގޮތަށް ބޮޑެތި ނިންމުންތަކެއް ނިންމާފައިވާ މައްސަލަ ވެސް އެކި ފަރާތްތަކުން ވަނީ ފެންމަތި ކޮށްފަ އެވެ.
ވީއޭއެމްގެ ރައީސް ކަމަށް ލަތީފު ވަޑައިގެންނެވީ، 2016 ވަނަ އަހަރު އޭޕްރީލް މަހު ބޭއްވި ވީއޭއެމްގެ އިންތިހާބުގައި، ކުރީގެ ރައީސް މުހައްމަދު ރިޔާޒު އިތުރު ދައުރަކަށް އިންތިހާބު ވުމަށް ފަހު، އެ އިންތިހާބުވި ގޮތާ ބެހޭގޮތުން ސުވާލު އުފެދޭ ކަންތައްތަކެއް ހިމެނޭ ކަމަށް ބުނެ ސްޕޯޓްސް ކޮމިޝަނަށް ހުށަހެޅުނު މައްސަލައަކާ ގުޅިގެން ދެ ވަނަ ފަހަރަށް އިންތިހާބު ބާއްވަން އެނގުމަށް ފަހު ބޭއްވި އިންތިހާބުގަ އެވެ. އެ އިންތިހާބުގައި ރިޔާޒު ވާދަ ނުކުރައްވަ އެވެ.