ރާއްޖެއިން ބޭރުގައި މަތީ ތައުލީމު ހާސިލް ކުރަން ސަރުކާރުން ދޭ ސްޓޫޑެންޓް ލޯނަށް ހުށަހެޅުމުގައި ކުރިއަށްވުރެ ފަސޭހަ އިންތިޒާމުތަކެއް ހަޔާ އެޑިއުކޭޝަން މިނިސްޓްރީން ހަމަޖައްސައިފި އެވެ.
އެ ގޮތުން ލޯނާ ގުޅޭ އޮންލައިން ޕޯޓަލަށް ބަދަލުތަކެއް ގެނެސް މިހާރު ވަނީ ކުރިއަށްވުރެ ފަސޭހައިން ފޯމް ފުރޭނެ ގޮތް ހަދައިދީފަ އެވެ.
ދެ ފުށް ހިމަނަން ޖެހޭ ސެޓްފިކެޓްތަކާއި އެހެން ކަންކަން ވެސް ކުރިއަށްވުރެ ފަސޭހައިން ދެނެގަނެވޭނެ ގޮތަށް ޕޯޓަލް އަށް ވަނީ ބަދަލު ގެނެސްފައެވެ. އަދި ލޯނަށް އެދޭ ފަރާތުގެ ޕްރޮފައިލްގައި ހުރި މައުލޫމާތު އަލުން ފުރަން ނުޖެހޭނެ ގޮތް ހަދާފައި ވެއެވެ.
ލޯނު ދޫކުރުމުގައި ހަޔާ އެޑިއުކޭޝަނުން މީގެ ކުރިން އަމަލު ކުރަމުންދިޔަ އުސޫލު ވެސް މިހާރު ވަނީ އިސްލާހުކޮށްފަ އެވެ. އާ އުސުލޫގެ ދަށުން ބޭނުން ގައުމަކަށް ކިޔަވަން ދެވުނަސް، ސަރުކާރުން ދޭ ލޯނަށް ވުރެ އިތުރަށް ހިނގާ ހަރަދު ކުރަން ޖެހޭނީ ދަރިވަރުން އަމިއްލައަށެވެ. މީގެ އިތުރުން އާ އުސޫލުގައިވާ ގޮތުން ލޯނަށް އެދި ހުށަހެޅެނީ އުމުރުން 16 އަހަރު ފުރިފައިވާ މީހަކަށެވެ. އަދި ލޯނަށް އެދޭ ފަރާތަކީ އެއްވެސް ސަބަބަކާ ލައިގެން ހަޔާ އެޑިއުކޭޝަނުން ބްލެކްލިސްޓް ކޮށްފައިވާ ފަރާތަކަށް ވެގެން ނުވާނެ އެވެ.
އިއްޔެ ހަޔާ އެޑިއުކޭޝަން މިނިސްޓްރީން ވަނީ 163 ފަރާތަކަށް ސްޓޫޑެންޓް ލޯނަށް އެދުމުގެ ފުރުސަތު ހުޅުވާފަ އެވެ. ލޯނަށް އެދުމުގެ މުއްދަތު ހަމަވާނީ މިމަހު 24 ވަނަ ދުވަހު މެންދުރު 1:00 ޖަހާއިރު އެވެ.