މޮރިޝަސްގެ އިލެކްޝަން ކޮމިޝަނުން އިމްތިޒާމްކޮށްގެން ބާއްވާ މަހާސިންތާއެއްގައި ބައިވެރިވުމަށް އިލެކްޝަން ކޮމިޝަން (އީސީ)އިން ނިންމައިފި އެވެ.
ޖޫން 17 އިން 18 ކުރިއަށް ގެންދާ މި މަހާސިންތާގައި އީސީގެ ފަރާތުން ބައިވެރިވާނީ އެކޮމިޝަންގެ ނައިބު ރައީސް އަމްޖަދު މުސްތަފާގެ އިތުރުން އީސީގެ ތަރުޖަމާނު އަދި މެމްބަރު އަހްމަދް އަކްރަމް އެވެ.
އީސީގެ ނައިބު ރައީސް އަމްޖަދު މޫސްތަފާ މަހާސިންތާގައި ތަގްރީރު ކުރައްވާ ގޮތަށް ވަނީ ހަމަޖެހިފަ އެވެ. މި ތަގްރީރުގައި ރާއްޖޭގެ އިންތިހާބީ މަރުކަޒު އީސީ އަށް ދިމާވާ ސިޔާސީ ފިއްތުންތަކާއި ނުފޫޒުން އެއްކިބާވެ ތިބެ މަސައްކަތް ކުރާނެ ގޮތްތަށް ރާވާ ހިންގުމުގައި ކުރަން ޖެހޭ ކަންތަކަށް އަލިއަޅުވާ ވާހަކަ ދައްކަވާނެ އެވެ.
މި މަހާސިންތާއަކީ ޑިމޮކްރަސީގެ އުސޫލުތަށް ކުރިއަރުވާ އިތުބާރު ހިފޭ މިނިވަން އިންތިހާބުތަކެއް މޮރިޝަސްގައި ބާއްވަމުން އަންނަތާ 60 އަހަރު ވެފައިވުމުން އެކަމުގެ މުނާސަބަތުގައި ބާއްވާ މަހާސިންތާއެކެވެ.
މަހާސިންތާ ބޭއްވުމުގެ މައިގަނޑު ބޭނުމަކީ ދުނިޔޭގެ އިންތިހާބީ ކަންކަމާއި ގުޅުން ހުރި ތަޖުރިބާކާރުން އެއްތަނަކަށް ބައްދަލުކޮށް ޑިމޮކްރަސީގެ ހަމަތަކާއި އުސޫލާއި އެއްގޮތަށް މިހާރަށްވުރެ ވުރެ ބޮޑަށް އިންތިހާބުތަށް ބޭއްވޭނެ ގޮތަކާއި މެދު ހިޔާލު ބަދަލުކުރުމެވެ.