އަންނަ ބުރާސްފަތި ދުވަހުގެ ރޭ ކާނިވާ ސަރަހައްދުގައި އިދިކޮޅު ޕީޕީއެމާއި ކޮންގްރެސް ޕާޓީ ގުޅިގެން ޖަލްސާއެއް ބާއްވަން ހުއްދައަށް އެދިއްޖެ އެވެ.
ޕްލޭނިން މިނިސްޓަރު މުހައްމަދު އަސްލަމަށް އެޑްރެސްކޮށް ޕީޕީއެމްގެ ސެކްރެޓަރީ ޖެނެރަލް މުހައްމަދު ޝަކީލު ފޮނުވި ސިޓީގައި ވަނީ އެ ޕާޓީން އިންތިޒާމު ކޮށްގެން ބާއްވާ ޖަލްސާއެއް އަންނަ ބުރާސްފަތި ދުވަހުގެ ހަވީރު 6:00 އިން ފެށިގެން މެންދަމު 12:00 އަށް ކާނިވާ ސްޓޭޖު ސަރަހައްދު ދޫކޮށްދިނުމަށެވެ.
އެނގިފައިވާ ގޮތުގައި އިދިކޮޅު ޕާޓީތަކުގެ ޖަލްސާ ބާއްވަން އެ ފަރާތްތަކުން ނިންމާފައި ވަނީ އެ ރޭ ރޭގަނޑު 9:00 އަށެވެ. ޕީޕީއެމާއި ކޮންގްރެސްގެ ޖަލްސާއެއް ބާއްވަން ނިންމާފައި މިވަނީ ދުވަސްތަކެއް ފަހުންނެވެ. ރައްޔިތުންގެ މަޖިލީހުގެ އިންތިހާބުގެ ކެމްޕޭންގެ ތެރޭގައި ވެސް އެ ދެ ޕާޓީން ބޮޑު ޖަލްސާއެއް ބާއްވާފައެއް ނުވެ އެވެ.
ކޮންގްރެސް ޕާޓީގެ ނައިބު ރައީސް އިބްރާހިމް ޝުޖާއު ވިދާޅުވީ ޕީޕީއެމާއި ކޮންގްރެސް ޕާޓީގެ އިސްނަގައިގެން ކާނިވާ ސަރަހައްދުގައި ޖަލްސާއެއް ބާއްވަން ޕްލޭނިން މިނިސްޓްރީއަށް ފޮނުވުމުން ކާނިވާ ސަރަހައްދު ދިނުމަށް "މަތިން" ދެކޮޅު ހަދަމުންދާ ކަމުގެ މައުލޫމާތު ލިބިފައިވާ ކަމަށެވެ.
"އާދީއްތަ ދުވަހަށް ބަލަން މިތިބީ. ހުރަސް އަޅައިފިނަމަ އަބަދު ބަލަން ނުތިބޭނަން އިނގޭތޯ." ޝުޖާއު ވިދާޅުވި އެވެ.