މިދިޔަ އަހަރުގެ ދިވެހި ޕްރިމިއާ ލީގް، ގައުމީ ޓީމުގެ ބޮޑު ބުރޭކަށް މެދުކަނޑައިލި ފަހުން، މާލީ މައްސަލަތަކާ ހުރެ ނިއު ރޭޑިއަންޓް އަޑިއަޅައިގެން ދިޔަ އެވެ. ކޯޗާއި މުހިންމު ކުޅުންތެރިން ޓީމާ ދުރަށް ޖެހި ނިއު ރޭޑިއަންޓްގެ އަމާޒު ގެއްލުނެވެ.
މިދިޔަ އަހަރުގެ ސީޒަންގައި ނިއު ރޭޑިއަންޓާއެކު ގިނަ ކާމިޔާބުތަކެއް ހޯދަން ފައިސަލް ކުރި އުންމީދަށް ހުރަސް އެޅުނު ނަމަވެސް، ރާއްޖޭގެ ފުޓްބޯޅައިގެ ހަޔާތުގައި މިދިޔަ އަހަރަކީ ފައިސަލްގެ ނަން ތާރީހުގައި ލިޔެވުނު އަހަރެކެވެ.
ސަރަހައްދީ މުބާރާތް، ސާފު ޗެމްޕިއަންޝިޕް ރާއްޖެއަށް ކާމިޔާބު ކޮށްދިނުމަށް އެންމެ މުހިންމު ދައުރެއް އަދާ ކުރި ކުޅުންތެރިޔަކީ އޭނާ އެވެ. ގައުމީ ޓީމުގެ ގޯލްގައި ހުރެގެން އެތައް ފަހަރަކު ރާއްޖެ ސަލާމަތް ކޮށްދިނެވެ. ނަތީޖާ ފޮނިވެ ސާފް ޗެމްޕިއަންޝިޕްގެ ތައްޓާއެކު މުބާރާތުގެ އެންމެ މޮޅު ކުޅުންތެރިޔާގެ މަގާމު ފައިސަލް ހޯދި އެވެ.
ދެކުނު އޭޝިއާގެ ފުޓްބޯޅައިގެ ތާރީހުގައި، ސަރަހައްދީ އެންމެ ބޮޑު މުބާރާތުގެ މޮޅު ކުޅުންތެރިޔާގެ އެވޯޑް ހޯދުނީ ތިން ކީޕަރުންނަށެވެ. ތިންވަނަ ކީޕަރަކީ ފައިސަލް އެވެ.
މިދިޔަ އަހަރު ހޯދި އެ ޝަރަފުވެރި ކާމިޔާބާއެކު، އާ ސީޒަން ފައިސަލް ދެކެނީ އޭނާގެ އުންމީދީ ސީޒަނެއް ކަމުގަ އެވެ. ކުޅޭނެ ކުލަބެއް އޭނާއަށް ހަމަޖެހުނީ ސީޒަން ފެށެން ވަގުތު ކުޑަތަން ވެފައި ވަނިކޮށެވެ. ވެލެންސިއާ އާއި ގައުމީ ޓީމުގެ ކުރީގެ ކީޕަރު ހުސައިން ހަބީބުގެ ޓްރޭނިންގެ ތެރެއިން ދަ ގުރޭންޑޭ ޓީމާއެކު އާ ސީޒަން ފެށި އެވެ.
ދިވެހި ޕްރިމިއާ ލީގްގައި ދަ ގުރޭންޑޭ ކުޅުނު ހަތަރު މެޗުގައި ވެސް ފައިސަލްގެ މޮޅު ސޭވްތައް ފެނިގެން ދިޔަ އެވެ. އެންމެ ފަހުން ޔުނައިޓެޑް ވިކްޓަރީ އާ ދެކޮޅަށް ކުޅުނު މެޗުގައިވެސް ފައިސަލްގެ ވަން އޯ ވަން ފުރުސަތުތަކުގައި ވެސް ހުނަރުވެރި ސޭވްތަކެއް ފެނިގެން ދިޔަ އެވެ.
ށ. ފޯކައިދޫ ފުޓްބޯޅަ ކުލަބާ ދެކޮޅަށް ދަ ގުރޭންޑޭ ކުޅުނު މެޗުގައި، ފޯކައިދުއިން އުފެއްދި ނުރަކާތެރި ދެތިން ހަމަލާއެއް ފައިސަލް ދިފާއު ކުރި އެވެ. އެ މެޗުގެ މޮޅު ކުޅުންތެރިޔާގެ އެވޯޑްވެސް ހޯދީ އޭނާ އެވެ.