އިތުރު ހަ ރަށަކުން ސާފިން ހާއްސަ ސްޕޮޓްތައް ތަރައްގީކޮށް ރާއްޖޭގެ ބައެއް ސަރަހައްދުތަކަށް ސާފިން ފުޅާ ކުރައްވާނެ ކަމަށް ޔޫތު، ސްޕޯޓްސް މިނިސްޓަރު އަހްމަދު މަހްލޫފް ވިދާޅުވެއްޖެ އެވެ.
މިއަދު ކުރެއްވި ޓްވީޓެއްގައި، މަހްލޫފް ވިދާޅުވީ، ސާފިން އެސޯސިއޭޝަން އޮފް މޯލްޑިވްސްއާ ގުޅިގެން ނ. ޅޮހި، މ. މުލައް، ލ. މާބައިދޫ، ގދ. ވާދޫ ގދ. ގައްދޫ އަދި ފުވައްމުލަކުގައި ސާފިން ސްޕޮޓްސްތައް ތަރައްގީ ކުރުމަށް ހަމަޖެހިފައިވާ ކަމަށެވެ.
މިނިސްޓަރުގެ ޓްވީޓާ ގުޅިގެން، ޔޫތު މިނިސްޓްރީގެ މީޑިއާ އޮފިޝަލް ވިދާޅުވީ ތަރައްގީ ކުރާ ސާފިން ސްޕޮޓްސްގައި ހިމެނެނީ، ހަޓުތަކާއި، ސާފިން ބޮޑު ބަހައްޓާ ރެކުތަކާއި ސާފުރުން މަޑުކޮށް ކޮށްލުމަށް ހަދާ ތަންތަން ކަމަށެވެ.
މިނިސްޓަރު ވިދާޅުވީ ތަރައްގީ ކުރާ ސާފިން ޕޮއިންޓްތަކާއެކު ސާފިންގައި އިންޓަނޭޝަނަލް އިތުރު ކާމިޔާބުތައް ހޯދަން މަގުފަހިވެގެން ދާނެ ކަމަށެވެ.
ސާފިން އެސޯސިއޭޝަންގެ ރައީސް، މުހައްމަދު ސޮބާހް (ޗޭ) ވިދާޅުވީ ސާފިން ސްޕޮޓްތައް ހަދަން ކަނޑައެޅި ރަށްރަށަކީ، މިހާރުވެސް ރާޅު ކޮމިޔުނިޓީއެއް އޮންނަ ރަށްރަށް ކަމަށެވެ. އޭނާ ވިދާޅުވީ އެ ރަށްރަށުގައި މިހާރުވެސް، ސާފިންގެ ހަރަކާތް ވަރަށް ފުޅާކޮށް ކުރިއަށްދާ ކަމަށެވެ. އެހެންނަމަވެސް އެ ރަށްރަށުގައި ސާފަރުންނަށް އުނދަގޫތަކެއް އެބަހުރި ކަމަށާއި ސާފިން ސްޕޮޓްތައް ތަރަގީ ކުރުމުން ސާފަރުންގެ ކަންބޮޑުވުންތަކަށް ހައްލުތަކެއް ލިބިގެންދާނެ ކަމަށް ޗޭ ވިދާޅުވި އެވެ.