ރާއްޖޭގައި ކެސީނޯ އެޅުމުގެ ވިސްނުމެއް ސަރުކާރުން ނުގެންގުޅޭ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވުމާ ގުޅިގެން ކާށިދޫ ދާއިރާގެ މެންބަރު އަބްދުﷲ ޖާބިރު ވަރަށް ބޮޑަށް ކޯފާއިސް ކުރައްވައި، ބަހުގެ ހޫނު ހަމަލާތަކެއް ރައްދުކުރައްވައިފި އެވެ.
ރައްޔިތުން މަޖިލީހުގެ ސަރުކާރުގެ މައްސޫލިއްޔަތު އަދާކުރާ މިންވަރު ބަލާ ކޮމިޓީއަށް އަލީ ވަހީދު މިއަދު ހާޒިރުކޮށްފައިވާއިރު، ޖާބިރު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ރާއްޖޭގެ ގާނޫނު އަސާސީގެ ދަށުން ރާއްޖޭއަކީ ސައްތައިން ސައްތަ މުސްލިމު ގައުމެއް ކަމަށާއި މިއަދުގެ ސަރުކާރުން ރާއްޖޭގައި ކެސިނޯ ނާޅާނެ ކަމަށެވެ.
"އަޅުގަނޑުމެންގެ ލީޑާޝިޕްގައި ކެސިނޯ އެޅުމަށް ވިސްނާފައެއް ނެތް، ރާއްޖޭގެ ފަތުވެރިކަން އަޅުގަނޑުމެން ގެންދާނީ މާތްވެގެންދާ އިސްލާމް ދީނުގެ ހުރިހާ ރުކުންތަކާއި ސިފަތައް ހިމާޔަތްވާ ގޮތުގެ މަތިން، އެހެން ވީމާ މިވަގުތު ތި ސުވާލުގެ ޖަވާބަކީ ނޫނެކޭ،" ކެސިނޯ ރާއްޖޭގައި ނޭޅެންވީ ކީއްވެގެންތޯ ޖާބިރު ތަކުރާރުކޮށް ސުވާލުކުރެއްވުމުން އަލީ ވަހީދު ވިދާޅުވި އެވެ.
އެކަމުގެ ރައްދުގައި ޖާބިރު ވަނީ ވަރަށް ބޮޑަށް ކޯފާ އިސްކުރައްވައި ބަނގުރަލާއި އޫރު މަސް އިސްލާމް ދީނުގައި ހަރާމް އެއްޗަކަށްވާއިރު، ރިސޯޓުތަކުގައި އެ އެއްޗެހި ވިއްކަނީ ކީއްވެގެންތޯ އައްސަވައިފަ އެވެ.
އެ ސުވާލުގެ ޖަވާބުގައި އަލީ ވަހީދު ވިދާޅުވަނީ ރިސޯޓުތަކުގައި ބަނގުރަލާއި އޫރު މަސް ވިއްކަނީ ގާނޫނުތަކުން އެކަން ކުރުމަށް ތަންދޭތީ ކަމަށެވެ.
"މިވަގުތު ފަތުރުވެރިކަން ކުރިއެރުވުމަށް މަޖިލީހުން [ފާސްކުރި] ގާނޫނުގެ ތެރެއިން އެ ފުރުސަތު އޮތީމަ އެކަން ކުރަނީ،" މިނިސްޓަރު ވިދާޅުވި އެވެ.
ނަމަވެސް، އެ ޖަވާބާމެދު ހިތްހަމަނުޖެހިވަޑައިގެން ޖާބިރު ވަނީ ކޮޅަށް ތެދުވެވަޑައިގެން ނުރުހުން ފާޅުކުރައްވަމުން ވަރަށް ބޮޑަށް އަޑުގަދަކުރެއްވައިފަ އެވެ. އަދި އިސްލާމް ދީނުގައި ހަރާންކޮށްފައިވާ ބަނގުރަލާއި އޫރު މަސް ވިއްކާ ސަރުކާރެއް ކަމަށް ބުނެ އަޑުގަދަކުރައްވަމުން، ކޮމިޓީން އިސްތިއުފާ ދެއްވި ކަމަށް ވިދާޅުވެ ޖާބިރު ވަނީ ކޮމިޓީ ދޫކުރައްވައި ނުކުމެވަޑައިގެންފަ އެވެ.
ކޮމިޓީގައި ޖާބިރު ކޯފާ އިސްކުރައްވާފައިވަނީ، މިއަދުގެ މަޖިލީސް ފެށުމާއެކު މަޖިލީހުގެ ރައީސް، ކުރީގެ ރައީސް މުހައްމަދު ނަޝީދަށް ބަހުގެ ހަމަލާތަކެއް ރައްދުކުރެއްވުމުން ނަން އިއްވައި ތަޅުމުން ބޭރުކޮށްފައިވަނި ކޮށެވެ.
މިއަދުގެ ޖަލްސާ ފެށުމާއެކު ޖާބިރު ވަނީ ނިޒާމީ ނުކުތާއެއް ނަންގަވައި، ނަޝީދާއި ސުވާލެއް ކުރައްވައިފަ އެވެ. "މަޖިލީހުގެ ރައީސް ކަމަށް މަނިކުފާނު (ނަޝީދު) އިންތިހާބުވުން ދައުލަތުގެ ހާޒާނާގެ ތަޅުދަނޑި މަނިކުފާނަށް ލިބުނީ ހެއްޔެވެ؟" ޖާބިރު އެއްސެވި އެވެ.
ޖާބިރު އެ ސުވާލު ކުރެއްވުމުން ރައީސް ނަޝީދު ވިދާޅުވީ އެއީ ނިޒާމީ ނުކުތާއެއް ނޫން ކަމަށާއި ނުކުތާ ބަލައި ނުގަންނަވާނެ ކަމަށެވެ. ނަޝީދު އެހެން ވިދާޅުވި ނަމަވެސް ޖާބިރު ވަރަށް ބޮޑަށް ނުރުހުން ފާޅުކުރައްވައި އޭނާގެ ވާހަކަ ކުރިއަށް ގެންދެވި އެވެ. ދެން ރައީސް ނަޝީދު، ޖާބިރު ވާހަކަ ހުއްޓުވާލުމަށް އެދިވަޑައިގަތެވެ. ނަޝީދު ތަކުރާރުކޮށް އެ ކަމަށް އެދިވަޑައިގަތުމުން ވެސް ޖާބިރު އިށީނދެވަޑައިނުގެން ވާހަކަ ކުރިއަށް ގެންދެވި އެވެ.
ރިޔާސަތުން އެންގި އެންގުމަށް ޖާބިރު ނުކިޔަމަންތެރިވެވަޑައިގަތުމުން ރައީސް ނަޝީދު ވަނީ ޖާބިރުގެ ނަން އިއްވައިފަ އެވެ. ދެން މަޖިލީހުގެ ސާޖެންޓް އޮފް އާމްސް ޖާބިރުގެ އަރިހަށް ދިޔަ އެވެ. އެއިރު ވެސް ޖާބިރު ގެންދެވީ އަޑުގަދަ ކުރައްވަމުންނެވެ. މަޖިލީހުގެ ރިޔާސަތުގެ މޭޒުގެ ކައިރިއަށް ވަޑައިގެން ވެސް އޭނާ އަޑުގަދަ ކުރެއްވި އެވެ. ނަމަވެސް ފަހުން އޭނާ ވަނީ ސާޖެންޓް އޮފް އާމްސްއާއެކު ތަޅުން ދޫކުރައްވައި ވަޑައިގެންފަ އެވެ.