ހަބަރު

ހައިވޭގައި އެކްސިޑެންޓެއް ހިނގައި ދެ މީހަކަށް ސީރިއަސް އަނިޔާތަކެއްވެއްޖެ

ހުޅުމާލެ ހައިވޭގައި ދެ ސައިކަލެއް ޖެހި އެކްސިޑެންޓެއް ހިނގައި ދެ މީހަކަށް ސީރިއަސް އަނިޔާތަކެއް ވެއްޖެ އެވެ.

ފުލުހުން ބުނީ ހުޅުމާލެ ބްރިޖް ހައިވޭގައި ދެ ސައިކަލެއް ޖެހި އެކްސިޑެންޓުވި ކަމުގެ މައުލޫމާތު މިއަދު އިރުއޮއްސި 18:40 ހާއިރު ލިބިފައިވާ ކަމަށެވެ. އެ ހާދިސާގައި ދެ ސައިކަލުގައި ތިބި ހަތަރު މީހުންނަށް ވެސް އެކި ވަރުގެ އަނިޔާވި ކަމަށާއި ނަމަވެސް ހާލު ސީރިއަސް ވެގެން ހުޅުމާލެ ހޮސްޕިޓަލަށް ގެންގޮސް ފަރުވާ ދޭން ފެށީ އޭގެ ތެރެއިން ދެ މީހަކަށް ކަމަށެވެ.

ހުޅުމާލެ ހޮސްޕިޓަލް ހިންގާ އާސަންދަ ކުންފުނިން ބުނީ އެކްސިޑެންޓުގައި އަނިޔާވެގެން އެ ހޮސްޕިޓަލުން ފަރުވާ ދެމުން ދަނީ 20 އަހަރުގެ ފިރިހެނަކަށާއި 21 އަހަރުގެ އަންހެނަކަށެވެ. ދެ މީހުންގެ ފަޔަށް އެކި ވަރުގެ ޒަހަމް ލިބިފައިވާ ކަމަށާއި ފިރިހެން މީހާގެ މަތީ ތުންފަތް ފަޅައިގެން ގޮސްފައިވާއިރު ދެ ދަތް ބިންދައިގެން ގޮސްފައިވާ ކަމަށް އާސަންދަ ކުންފުނިން ބުންޏެވެ.

ފުލުހުން ބުނި ގޮތުގައި އެ އެކްސިޑެންޓް ހިނގިއިރު ދެ ސައިކަލު ދުއްވި ދެ މީހުންގެ އަތުގައި ވެސް ލައިސަންސް އޮތެވެ.