ގުރޫޕްގެ އެއްވަނާގައި ރާއްޖެ ސެމީ ފައިނަލަށް

އިންޑިއަން އޯޝަން އައިލެންޑް ގޭމްސްގައި، މޮރިޝަސް އާއި މަޔޯޓޭގެ މައްޗަށް ރާއްޖޭގެ އަންހެން ޓޭބަލް ޓެނިސް ޓީމުން ކާމިޔާބު ހޯދައި، ގުރޫޕްގެ އެއް ވަނައިގައި ސެމީ ފައިނަލަށް ދަތުރު ކޮށްފި އެވެ.

މުބާރާތް ބާއްވާ މޮރިޝަސް އާ ދެކޮޅަށް ރާއްޖޭގެ ކުޅުންތެރިން ކާމިޔާބު ހޯދީ، 3-2 ގޭމުންނެވެ. މަޔޯޓޭއާ ދެކޮޅަށް ރާއްޖެއިން ކާމިޔާބު ހޯދީ ސީދާ ގޭމުންނެވެ.

ރާއްޖެއަށް ކާމިޔާބު ހޯދައި ދިނުމުގައި އެންމެ މުހިންމު ދައުރެއް އަދާ ކުރީ ޒުވާން ދެ ކުޅުންތެރިން ކަމަށްވާ، ފާތިމަތު ދީމާ އަލީ އާއި އައިޝަތު ރަފާ ނާޒިމެވެ.

މޮރިޝަސްއާ ދެކޮޅަށް ކުޅުނު މެޗުގައި، ދީމާ ވަނީ އޭނާ ކުޅުނު ދެ ގޭމުން ވެސް މޮޅުވެފަ އެވެ. މޮރިޝަސް ކުޅުންތެރިޔާ އާ ދެކޮޅަށް ރަފާ ކުޅުނު ގޭމްގެ ތިން ސެޓުންވެސް ރަފާ ބަލިވީ 11-8 ންނެވެ. ދެ ވަނަ ގޭމް ދީމާ ކާމިޔާބު ކުރީ 11-9، 11-7 އަދި 11-7 ންނެވެ.

މޮރިޝަސްއާ ދެކޮޅަށް ކުޅުނު ތިން ވަނަ ގޭމްސްގައި ރާއްޖޭގެ ފާތުމަތު ޖުމާނާ ނިމާލް މޮރިޝަސް ކުޅުންތެރިޔާއާ ދެކޮޅަށް ކުޅުނު ތިން ސެޓްގެ ތެރެއިން އެއް ސެޓް ކާމިޔާބު ކުރި އެވެ. އެ ގޭމުން އޭނާ ބަލިވީ 3-1 ންނެވެ. ފުރަތަމަ ސެޓް 11-5 ން އޭނާ ބަލިވި ނަމަވެސް ދެ ވަނަ ސެޓްގައި 11-8 ން އޭނާ ކާމިޔާބު ހޯދި އެވެ. އަނެއް ތިން ސެޓުން ބަލިވީ 11-7 އަދި 11-6 ންނެވެ.

ހަތަރު ވަނަ ގޭމް ވަރަށް ވާދަވެރިކޮށް ގޮސް ރަފާ ކާމިޔާބު ކުރީ، 11-6، 13-11 އަދި 15-13 އިންނެވެ. މޮރިޝަސްއާ ދެކޮޅަށް ކުޅުނު ފަހު ގޭމް ދީމާ ކާމިޔާބު ކުރީ 3-2 ންނެވެ. އޭނާ ގޭމް ކާމިޔާބު ކުރީ 7-11، 11-5، 11-8، 12-10 އިންނެވެ.

މަޔޮޓޭއާ ދެކޮޅަށް ކުޅުނު ތިން ގޭމްވެސް ރާއްޖެއިން ކާމިޔާބު ކުރީ 3-0 ންނެވެ. ފުރަތަމަ ގޭމް ރަފާ ކާމިޔާބު ކުރީ 11-3، 11-6، އަދި 11-3 ންނެވެ. ދެ ވަނަ ގޭމް ދީމާ ކާމިޔާބު ކުރީ 11-3، 11-5 އަދި 11-6 ންނެވެ. ތިން ވަނަ ގޭމްގައި ރާއްޖޭގެ ތަޖުރިބާކާރު ކުޅުންތެރިޔާ މުއިނާ މުހައްމަދު ކާމިޔާބު ކުރީ 11-7، 11-3 އަދި 11-2 ންނެވެ.