ޕްރީ ސީޒަންގެ މެޗުތަކުން ބަލިވިޔަސް، ސީޒަން ފެށޭއިރު ރެއާލް މެޑްރިޑްގެ ޓީމު އޮންނާނީ އެންމެ ފުރިހަމައަށް ތައްޔާރަށް ކަމަށް އެ ޓީމުގެ ކޯޗް ޒައިނުއްދީން ޒިދާން ބުނެފި އެވެ.
މިޔުނިކުގައި ކުރިއަށްދާ އައުޑީ ކަޕްގެ ފުރަތަމަ މެޗުގައި ރޭ، ޓޮޓެންހަމް ހޮސްޓްސުޕާ އަތުން 1-0 ން ބަލިވި މެޗަށް ފަހު ޒިދާން ބުނީ ޓީމުގެ ކުޅުމާ މެދު ހިތްހަމަ ޖެހޭ ކަމަށެވެ. އޭނާ ބުނީ އަންނަ މަހުގެ ނިޔަލަށް ޓީމަށް ކޮންމެ ބަދަލެއް ވެސް އަތުވެދާނެ ކަމަށެވެ.
ޕްރީ ސީޒަންގައި ރެއާލް ކުޅުނު ހަތަރު މެޗުގެ ތެރެއިން ތިން މެޗުން އެ ޓީމު ވަނީ ބަލިވެފަ އެވެ. އާސެނަލްއާ ދެކޮޅަށް މޮޅުވީ މެޗުގެ ނަތީޖާ ހަމަހަމަވެ ޕެނަލްޓީ ޖަހައިގެންނެވެ. ވާދަވެރި އެތުލެޓިކޯ އަތުން ބަލިވީ 7-3 ންނެވެ.
"ތެދެއް މެޗުތައް ފެށެނީ ވަރަށް އުނދަގޫކޮށް، ނަމަވެސް އަހަރެމެން ހިތްވަރެއް ނޭލޭ،" ޒިދާން ބުންޏެވެ. "ސަބަބަކީ އަހަރެމެންނަށް އެނގޭ ކުރިއަށް އޮތީ ދިގު ސީޒަނެއް ކަން، ރެއާލްގެ ސަޕޯޓަރުން މާޔޫސްވާކަށް ނުޖެހޭނެ އަހަރެން މިހުރީ ޕޮޒެޓިވް ކޮށް."
މިޔުނިކް ދަތުރުގައި ސްކޮޑުން ގެރެތު ބޭލްއަށް ފުރުސަތެއް ނުދެ އެވެ. ޒިދާން ބުނީ ބޭލްއަށް ފުރުސަތު ނުދިނީ އޭނާ ބަލިވެ އުޅޭތީ ކަމަށެވެ. މިދިޔަ ދެ އަހަރު ލޯން އެއްބަސްވުމުގެ ދަށުން ބަޔާން މިޔުނިކަށް ކުޅުނު ހަމޭސް ރޮޑްރިގޭޒް ވަނީ ރެއާލްގެ ޓީމަށް އެނބުރި އައިސް ޓީމުގެ ފަރިތަކުރުންތަކުގައި ބައިވެރިވާން ފަށާފަ އެވެ.
ޒިދާން ބުނީ ހަމޭސް ޓީމުގައި ހުންނާނެ ކަމުގެ ޔަގީން ކަމެއް ނެތް ކަމަށެވެ. އޭނާ ގެންދިއުމަށް ނަޕޯލީ އާއި އެތުލެޓިކޯ މެޑްރިޑުން ދަނީ މަސައްކަތް ކުރަމުންނެވެ.