ރައްޔިތުންގެ މަޖިލީހުގެ ބ. އަތޮޅުގެ ކުރީގެ މެންބަރު ދޮންފަނު މުހައްމަދު ޔޫސުފު ހައްދަވާފައިވާ އޭނާގެ ޅެންތައް ހިމެނޭ ފޮތެއްް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ނެރެ ދެއްވައިފި އެވެ.
"ދިވެހި ޅެމުގެ އަސްދަނޑި" ގެ ނަމުގައި އޭނާ ލިޔުއްވާފައިވާ އެ ފޮތް ރައީސް ނަޝީދު ނެރެދެއްވީ މިއަދު މެންދުރު ރައްޔިތުންގެ މަޖިލީހުގައި ދޮންފަނު މުހައްމަދު ޔޫސުފާ ބައްދަލު ކުރެއްވުމަށް ފަހު އެވެ.
ޅެން ފޮތް ނެރެއްދަވަމުން ރައީސް ނަޝީދު ވިދާޅުވީ އެ ފޮތް ނެރެދެއްވުމުގެ ޝަރަފު ލިބިވަޑައިގެންނެވީތީ ވަރަށް ބޮޑަށް އުފާ ކުރައްވާ ކަމަށެވެ. ނަޝީދު ވަނީ ޅެން ފޮތުގައިވާ ޅެމެއްގެ ބައިތުތަކެއް ވިދާޅުވެ ދެއްވާފަ އެވެ.
ދޮންފަނު ޔޫސުފް، ރައްޔިތުންގެ މަޖިލީހުގެ ބ. އަތޮޅުގެ މެންބަރު ކަން ކުރެއްވީ 1975 ވަނަ އަހަރުން ފެށިގެން 1980 ވަނަ އަހަރާ ހަމައަށެވެ. އޭނާ ވަނީ މީގެ ކުރިން ބ. ދަރަވަންދޫގެ ތާރީހާ ގުޅޭ ފޮތެއް ވެސް ލިޔުއްވާފަ އެވެ.