ޕައުލޯ ޑިބާލާ މެންޗެސްޓާ ޔުނައިޓަޑަށް ދިނުމަށް ފަހު ހަމަ އެ ޑީލްޑްގައި ރޮމެލޫ ލުކާކޫ ޔުވެންޓަސް އަށް ގެނައުމަށް ކުރި މަސައްކަތް ކާމިޔާބު ނުވުމުން، އެ މަސައްކަތް ދެ ކުލަބުންވެސް ހުއްޓާލައިފަ އެވެ.
ޕްރިމިއާ ލީގްގެ ޓްރާންސްފާގެ މުއްދަތު ނިމެން ބާކީ އޮތީ ތިން ދުވަހެވެ. ލުކާކޫގެ ޑީލްގައި ޑިބާލާ ހިމެނި ނަމަވެސް އެ މަސައްކަތް ކާމިޔާބު ނުވީ ޔުނައިޓަޑަށް ބަދަލު ވާނަމަ ޑިބާލާ ކިޔާ ބޮޑު މުސާރައިގެ ސަބަބުންނެވެ.
ޑިބާލާ ހުށަހަޅާފައި ވަނީ އޭނާގެ މުސާރައަށް އަހަރަކު 12 މިލިއަން ޔޫރޯ ދިނުމަށެވެ. އަދި އޭނާގެ އެޖެންޓް ޖޯޖް އަންޓުން އަށް ދޭން ޖެހޭ ފީ އާއެކު ޖުމުލަ 15 މިލިއަން ޔޫރޯ އެވެ.
ޔުވެންޓަސްގެ ކޯޗް މައުރީޒިއޯ ސާރީ ބޭނުންވާ ސްޓައިކަރުންގެ ލިސްޓްގައި އެންމެ ކުރީގައި އޮތީ ލުކާކޫގެ ނަމަވެ. ލުކާކޫ ނުގެނެވިއްޖެނަމަ ޔުވެންޓަސްގެ ދެ ވަނަ ޕްލޭން އަކީ އިންޓަގެ މައުރޯ އިކާޑީ އެވެ.
ލުކާކޫ ގެންދިއުމަށް ޔުވެންޓަސް އާ ވާދަވެރި އިންޓަ މިލާނުން ވަނީ ޝައުގުވެރިވެފަ އެވެ.
ޔުނައިޓަޑުން ޝައުގުވެރިވާ ޔުވެންޓަސްގެ ކުޅުންތެރިޔަކީ ފޯވަޑް މާރިއޯ މަންޒޫކިޗް އެވެ. އެ ޓީމުން އުންމީދު ކުރީ ލުކާކޫ ޔުވެންޓަސް އަށް ބަދަލުވުމުން މަންޒޫކިޗް ޔުވެންޓަސް ދޫކޮށްލުމުގެ ސަބަބަކަށް އެކަން ވާނެތީ އޭނާވެސް ގެނައުމަށެވެ. އެހެންނަމަވެސް އެކަން ޔުނައިޓަޑަށް ކާމިޔާބެއް ނުވި އެވެ.
ޑިބާލާ ގެންދިއުމަށް ޕީއެސްޖީން ޝައުގުވެރިވެ އެވެ.