ޓްރާންސްޕޯޓް މިނިސްޓްރީން ކަނޑައެޅި އަގުތަކާއި މެދު މައްސަަލައެއް ނެތް ކަމަށާއި، މައްސަލައަކީ މީޓަރު ހަރުކުރަން ވާހަކަދެއްކުމަށްފަހު އެކަން ނުކުރުން ކަމަށް ޓެކްސީ ޑްރައިވަރުންގެ ޖަމިއްޔާއިން ބުނެފި އެވެ.
ޓެކްސީ ޑްރައިވަރުންގެ ޖަމިއްޔާއިން ވަނީ މިއަދު ހަވީރު ސޯޝަލް ސެންޓަރުގައި ނޫސްވެރިންގެ ބައްދަލުވުމެއް ބާއްވަން މަސައްކަތް ކޮށްފަ އެވެ. ނަމަވެސް ގަޑި ޖެހުން އިރު، އެތަނުގައި އެ ބައްދަލުވުން ނުބޭއްވޭނެ ކަން ވަނީ އަންގާފަ އެވެ. އޭގެ ފަހުން ކޮންމެވެސް ގެއެއްގައި ބާއްވަން މަސައްކަތްކޮށް އެކަން ކާމިޔާބު ނުވުމުން އެންމެ ފަހުން އެ ޕްރެސް ބޭއްވީ މަގުމަތީގަ އެވެ.
ނޫސްވެރިންނާ ބައްދަލުކޮށް ޓެކްސީ ޑްރައިވަރުންގެ ފަރާތުން އަބްދުﷲ އިބްރާހިމް ވިދާޅުވީ، ޓްރާންސްޕޯޓް މިނިސްޓްރީން ކަނޑައެޅި އަގުތަކާ މެދު އެއްވެސް މައްސަލައެއް ނެތް ކަމަށާއި، އެޕްލިކޭޝަންތައް ބޭނުން ކުރުމުގައި ވެސް ޑްރައިވަރުންގެ މައްސަލައެއް ނެތް ކަމަށެވެ. އެހެން ނަމަވެސް މައްސަލައަކަށް ވަނީ ސަރުކާރުންވެސް އެންމެ ފުރަތަމަ ދެއްކީ މީޓަރު ހަރުކުރާ ވާހަކައަށްވެފައި، މީގެ ކުރިން މަޝްވަރާވެސް ކުރެވުނީ އެކަމަށް ކަމަށްވާއިރު، އެކަން ކުރުމުގެ ބަދަލުގައި ވަކި އަގުތަކެއް ކަނޑައެޅުން ކަމަށެވެ.
އޭނާ ވިދާޅުވީ، ޓެކްސީ ޑްރައިވަރުން ތިބީ އަމިއްލަ ހަރަދުގައިވެސް މީޓަރު ހަރުކުރަން ތައްޔާރަށް ކަމަށާއި، އެކަން ކުރަން ޓްރާންސްޕޯޓުން ދެ މަހުގެ މުހުލަތެއް ދިނަސްކޮށް ނިންމާނެ ކަމަށެވެ. އެހެން ނަމަވެސް، ކުރިން ވާހަކަ ދެއްކި ގޮތާ ހިލާފަށް ފިކްސް ކޮށްފައި އަގުތަކެއްލައި، އަދި ޓްރާންސްޕޯޓުން އެކުލަވާލި ގަވައިދުގައި އެ އަގުތައް ހިމަނާފައިވަނީ ޑްރައިވަރުންނާ މަޝްވަރާކޮށްފައިކަމަށް އޮތް އޮތުމަކީ ދޮގެއް ކަމަށެވެ.
ޓެކްސީ ސެންޓަރުގެ ވެރިން ދިން އެ ޕްރެސްގައި ހުޅުމާލެ ޑްރައިވާސް އެސޯސިއޭޝަންގެ ނައިބް ރައީސް ވިދާޅުވީ، މައްސަލައަކީ ހުޅުމާލޭ ދެވަނަ ފިޔަވަހި ހުޅުވާ ހިސާބުން އަނެއްކާވެސް އަގުތައް ރިވިއުކުރަން ޖެހުން ކަމަށާއި، އެކަން ކުރުމުގެ ބަދަލުގައި މީޓަރު ހަރުކުރެވިއްޖެ ނަމަ ޓްރާންސްޕޯޓާއި، ޑްރައިވަރުންނަށްވެސް ފަސޭހަވެގެން ދާނެ ކަމަށެވެ.
ޑްރައިވަރުން ބުނީ، އެ އެސޯސިއޭޝަންގެ ނަމުގައި ދައުރުކުރަމުންދާ ސިޓީއަކީ ބަޔަކު ހަދާފައިވާ އެއްޗެއް ކަމަށާއި، އެފަދަ ސިޓީއެއް އެއްވެސް ފަރާތަކަށް ފޮނުވާފައިނުވާ ކަމަށެވެ. އަދި މުޒާހަރާ ކުރާ ވާހަކައަކީވެސް ދޮގެއް ކަމަށާއި، މާދަމާވެސް ޓްރާންސްޕޯޓުން ކަނޑައެޅި އަގުގައި ޓެކްސީތަކުން ދަތުރު ކުރާނެ ކަމަށެވެ.
މީގެ އިތުރުން ސިވިލް ކޯޓަށް ވަގުތީ އަމުރެއް ހޯދަން އެދުނީ، ޓްރާންސްޕޯޓުން އެކުލަވާލި ގަވައިދުގައި ޑްރައިވަރުންނާއި މަޝްވަރާ ކުރިކަމަށް ލިޔެފައި އޮތުމުން ކަމަށާއި، އެފަދަ މަޝްވަރާއެއް ޓެކްސީ ސެންޓަރުތަކާއި ކޮށްފައިނުވާ ކަމަށެވެ.
އާ ގަވައިދުގެ މައްސަލާގައި ޓެކްސީ ޑްރައިވަރުންނާ ބޮޑެތި ހިޔާލުތަފާވުންތަކެއް އުފެދިފައިވާއިރު، މާލޭ ސަރަހައްދަށް ރަޖިސްޓްރީ ކޮށްފައިވާ ކާރުތަކުގެ ވެރި ފަރާތްތަކުގެ ތެރެއިން ޕްރައިވެޓް ހަޔާގެ ގޮތުގައި ޓެކްސީ ކުރުމުގެ ހުއްދަ ބޭނުންވާ ފަރާތްތަކަށް ޓެކްސީ ކުރުމުގެ ހުއްދަ ދޭން ޓްރާންސްޕޯޓް މިނިސްޓްރީން ވަނީ ނިންމައިފަ އެވެ.
ޕްރައިވެޓް ކާރުތަކަށް ޓެކްސީ ކުރުމުގެ ހުއްދަ ދޭން ޓްރާންސްޕޯޓުން ނިންމީ މާލޭ ސަރަހައްދުގައި ރަޖިސްޓްރީ ކޮށްފައިވާ ޓެކްސީތަކުގައި ޓެކްސީ އެޕްލިކޭޝަން ބޭނުންކުރަން ފެށުމަށް ދީފައިވާ ދެ މަސް ދުވަހުގެ މުއްދަތު ބާތިލް ކުރުމަށްފަހު، މާލޭ ސަރަހައްދަށް އަލަށް ރަޖިސްޓްރީ ކުރާ ޓެކްސީ ތަކުގައި ޓެކްސީ އެޕްލިކޭޝަން ހުންނަން ޖެހޭ ގޮތަށް ކަނޑައެޅުމަށް ފަހު އެވެ. އެހެންކަމުން ޕްރައިވެޓް ހަޔާ ތަކުގައި ވެސް ޓެކްސީ އެޕްލިކޭޝަން ހުންނަން ޖެހޭނެ އެވެ.
ޓެކްސީ އެޕްލިކޭޝަންގެ ގޮތުގައި ބޭނުންކުރުމަށް ޓްރާންސްޕޯޓުން ނިންމީ ތިން އެޕްލިކޭޝަނެކެވެ. އެއީ އަވަސް ރައިޑް، އެއައީ އަދި ޕިކްމީ އެވެ. ޓެކްސީގެ ހިދުމަތުގެ ފެންވަރު ރަނގަޅުކޮށް، އަގު ހެޔޮ ކުރުމުގެ ގޮތުން ޓްރާންސްޕޯޓުން ވަނީ މާލެ ސަރަހައްދުގައި ޓެކްސީގެ ހިދުމަތް ދެވޭނެ އަގުތަކެއް ވެސް ކަނޑައަޅާފަ އެވެ. އެ އަގުތަކަކީ މާލެ އާއި ހުޅުލެއަށް 60 ރުފިޔާ އަދި ހުޅުމާލޭން ހުޅުލެ އަށް 60 ރުފިޔާގެ އިތުރުން މާލެ އިން ހުޅުމާލެ އަށް 75 ރުފިޔާ އަދި މާލެ އާއި ހުޅުމާލެ އެތެރޭގައި 25 ރުފިޔާ އެވެ.
އަލަށް އެކުލަވާލި ގަވާއިދުގައިވާ އަގުތަކަށްވުރެ ބޮޑު އަގުތަކެއްގައި ޓެކްސީތަކުން ދަތުރު ކުރޭތޯ ބެލުމަށް ފުލުހުން ވަނީ ހާއްސަ އޮޕަރޭޝަނެއް ފަށައިފި އެވެ.
ފުލުހުން ބުނީ ޓްރާންސްޕޯޓުން ކަނޑައަޅާފައިވާ އަގުތަކަށް ވުރެ މަތީ އަގުތަކުގައި ޓެކްސީ ދަތުރުތަށް ކުރޭތޯ ބަލައި އަގޮބޮޑުކޮށް ދަތުރުކުރާ ޑްރައިވަރުންނާ މެދު ފިޔަވަޅު އަޅާނެ ކަމަށެވެ.