ފަހަކަށް އައިސް އެކްޝަންގެ ބައި ރަނގަޅަށް ނުކުޅެވޭ ކަމަށް ފާހަގަވެފައިވާ ޓޮމް ކްރޫޒް "މިޝަން އިމްޕޮސިބަލް: ރޮގް ނޭޝަން" އިން ދައްކުވައިދީފައިވަނީ މުޅިންވެސް ތަފާތު، ފޫހިވެގެން ނުވަތަ ކަމުނުގޮސްގެން ލޯ މަރާލަން ޖެހޭ ފަދަ މަންޒަރުތަކެއް ނޫނެވެ.
މި ފިލްމަކީ ސިއްރު އޭޖެންޓް އީތަން ހަންޓްގެ ގޮތުގައި ޓޮމް ކްރޫޒް ފެނިގެންދާ ފަސް ވަނަ ފިލްމެވެ. މި ފިލްމުގައި ދައްކުވައި ދޭނީ އީތަން ހަންޓް އާއި އޭނާގެ އެހެން އެޖެންޓުން، ސިންޑިކޭޓް ނަމަކަށް ކިޔާ ނުރައްކާތެރި ޓެރަރިސްޓް ޖަމާއަތަކާ ދެކޮޅަށް ހަރަކާތްތެރިވާ ގޮތެވެ.
ފިލްމްގެ އެންމެ ފުރަތަމަ މަންޒަރުގައި ދުވެފަައި ގޮސް ފްލައިޓެއްގައި އެލިގަނެގެން ޓޮމް ކްރޫޒް އޮންނަ މަންޒަރުން ފެށިގެން ފިލްމްގެ މިފަދަ އެކްޝަން އެހެން މަންޒަރުތަކަކީ ވެސް ބެލުންތެރިން މުޅިން ނޭވާ ހިފަހައްޓާލައިގެން ތިބެ ޖެހޭވަރުގެ މަންޒަރުތަކެއް ކަމަށް ބުނެވެ އެވެ.
މިދިޔަ ބުރާސްފަތި ދުވަހު ފިލްމު ނެރުނުއިރު، އެރޭ ހަތަރު މިލިޔަން ޑޮލަރު ލިބިފައިވެ އެވެ. މި ފިލްމް 2764 ސިނަމާއެއްގައި ދައްކާފައިވެ އެވެ. ގިނަ މީޑިޔާތަކުންނާއި ބެލުންތެރިން ބުނަމުން ދަނީ މި ފިލްމަކީ މިއަހަރު ނެރުނު އެންމެ ވަރުގަދަ އަދި އެންމެ ހިނގާނެ ބެލެވޭ އެކްޝަން ފިލްމު ކަމަށެވެ.
މިސިލްސިލާގެ ވެސް އެންމެ ފުރިހަމަ އެންމެ ފޯރި ގަދަ ފިލްމަކީ މިއީ ކަމަށް ބުނާ މީހުން ވެސް އެބައުޅެ އެވެ.
ޖުމްލަ 150 މިލިޔަން ޑޮލަރުގެ ބަޖެޓަކުން އުފައްދައި، ކްރިސްޓޮފާ މެކުއަރީ ޑައިރެކްޓް ކޮށްފައިވާ މި ފިލްމްގެ މުހިންމު ތަރިންތަކުގެ ތެރޭގައި ހިމެނެނީ ޓޮމް ކްރޫޒާ އެކު ޖެރިމީ ރެނާ އާއިސަައިމަން ޕެގް އަދި ރެބެކާ ފާގަސަން އާއި އެލެކް ބޮލްޑްވިން އެވެ.
ފިލްމް ޕްރޮމޯޓު ކުރުމަށް ޓޮމް ކްރޫޒް ދަނީ މިހާރު ޓޯކްޔޯގައި ހަރަކާތްތެރިވަމުންނެވެ.