އިސްލާމީ ޔުނިވާސިޓީން ކޮންމެ އަހަރަކު ބާއްވާ އިލްމީ ކުރިއެރުމާބެހޭ ބައިނަލްއަގުވާމީ މަހާސިންތާ (އައިސީއައިއޭ) މިއަދު ފަށައިފި އެވެ.
މި އަހަރުގެ މަހާސިންތާގެ ތީމަކީ "އިލްމު ހިއްސާކޮށް އިލްމު އުނގެނުމަށް ލޯބިކުރާ މުޖުތަމައެއް ބިނާކުރުން" އެވެ.
ދެ ދުވަހުގެ މުއްދަތަކަށް ބާއްވާ މި މަހާސިންތާގައި ބައިވެރިން 50 ދިރާސާ ކަރުދާސް ހުށަހަޅާނެ އެވެ. ބައިވެރިންގެ ތެރޭގައި އިސްލާމީ ޔުނިވާސިޓީގެ ޕޯސްޓްގްރެޖުއޭޓް ލެވަލަށް ކިޔަވާ ދަރިވަރުންނާއި އެހެން ޔުނިވަސިޓީ ދަރިވަރުން ހިމެނެއެވެ. މި އަހަރުގެ މަހާސިންތާގައި 300 އަށް ވުރެ ގިނަ ފަރާތްތަކުން ބައިވެރިވެ އެވެ.
މަހާސިންތާގައި ކަރުދާސް ހުށަހަޅާ ދާއިރާތަކުގެތެރޭގައި ސައިކޮލޮޖީ އާއި މެންޓަލް ހެލްތާއި ކަރްކިއުލަމާއި އިސްލާމިކް ސިވިލައިޒޭޝަނާއި ފައިނޭންސާއި ގުރުއާނިކް ސައިންސާއި ޝަރީއާ އެންޑް ލޯ އާއި ޕޮލިޓިކްސް އެންޑް ޑިޕްލޮމަސީ އާއި ޑިޖިޓަލައިޒޭޝަން އަދި ލިޓްރޭޗާ ހިމެނެ އެވެ.