ރާއްޖޭގައި އިންޓަގްރޭޑެޓް ޓޫރިޒަމް ކޮންސެޕްޓަށް ހިންގި ފުރަތަމަ ޓޫރިޒަމް މަޝްރޫއު ކަމަށްވާ އެނބޫދޫ ލެގޫންގެ ފުރަތަމަ ފިޔަވަހި އިއްޔެ ހުޅުވައިފި އެވެ.
ރާއްޖޭގެ ޓޫރިޒަމް 45 އަހަރުވީ ތާރީހުގައި ހިންގި ޓޫރިޒަމްގެ އެންމެ ބޮޑު މަޝްރޫއުގެ ދަށުން، މާލެ އަތޮޅު އެނބޫދޫ ފަޅުގައި ތައިލެންޑުގެ ސިންހަ ކުންފުނިން އިންޓަގްރޭޑެޓް ޓޫރިޒަމް މަޝްރޫއު "ކްރޮސްރޯޑް" ފަށާފައިވަނީ 2017 ވަނަ އަހަރު އެވެ. މަޝްރޫއު ދަށުން ވަކިވަކިން ލައިފްސްޓައިލް ކޮންސެޕްޓް ތަކަށް ނުވަ ރަށެއް ތަރައްގީ ކުރާނެ އެވެ. މިގޮތުން އިއްޔެ ވަނީ ފުރަތަމަ ތަރައްގީ ކުރި ދެ ރިސޯޓު ހުޅުވާފަ އެވެ.
މި މަޝްރޫއުގެ ދަށުގެ އެނބޫދޫ ފަޅުގައި ފުރަތަމަ ފިޔަވަހީގައި މަޝްހޫރު މިއުޒިކީ ބްރޭންޑް ހާޑްރޮކްގެ ހޮޓަލަކާއި ސައި ލެގޫންގެ ނަމުގައި ރިސޯޓެއްގެ އިތުރުން ރާއްޖޭގެ މައުލޫމާތުތައް ހިމެނޭ ކަލްޗަރަލް ސެންޓަރަކާއި މެރިން ޑިސްކަވަރީ ސެންޓަރެއް އަދި މެރީނާ އެއް ވެސް ހަދާފައި ވެ އެވެ.
މިއުޒިކީ ފުށީގައި - ހާޑްރޮކް ހޮޓެލް
ހާޑްރޮކް ބްރޭންޑުން ރާއްޖޭގައި ހުޅުވާ މި ރިސޯޓަކީ މި ރީޖަންގައި އެ ކުންފުނިން ހުޅުވި ފުރަތަމަ ރިސޯޓެވެ.
މިއުޒިކީ އެކި ބައިތަކާއި މިއުޒިކަށް ހާއްސަ ހާޑްރޮކް ބްރޭންޑްގެ މި ރިސޯޓުގެ ޖެނެރަލް މެނޭޖަރު ޓޮލްގާ ކުރިން އަވަސް އަށް ވިދާޅުވި ގޮތުގައި މި ރިސޯޓު ވެގެންދާނީ ރާއްޖޭގެ ޓޫރިޒަމް ޕްރޮޑަކްޓަށް އިތުރުވެގެން އަންނަ އާ އުފެއްދުމަކަށް ކަމަށާ، އަދި މި ބްރޭންޑު ވެގެންދާނީ ރާއްޖޭގެ ފަންނުވެރިންނަށް ފުރުސަތު ދޭނެ ބްރޭންޑަކަށް ކަމަށެވެ.
"އަޅުގަނޑުމެން އެންމެ ހާއްސަ ކަމެއް ދޭނީ ލޯކަލް ޓެލެންޓަށް އިސްކަން ދޭން. މި ރިސޯޓުގައި މިއުޒިކް ކުޅުމަށް އިންޓަނޭޝަނަލް ބޭންޑްތަކުގެ އިތުރުން ދިވެހި ލޯކަލް އާޓިސްޓުން ވެސް ހަރަކާތްތެރި ވާނެ. މިހާރު ވެސް ސްކައި ރޮކް ބޭންޑަށް ވާނީ ފުރުސަތު ދީފައި،" ޓޮލްގާ ވިދާޅުވި އެވެ.
ހިލްޓަން ކަލެކްޝަންގެ ސައި ލެގޫން
ހިލްޓަން ކަލެކްޝަންގެ ސައި ލެގޫންގައި ޑުލެކްސް ރޫމް އާއި ބީޗް ވިލާ އަދި އޯވަ ވޯޓާ ވިލާ ހިމެނޭ ގޮތަށް 198 ކޮޓަރި ހުރެ އެވެ.
ސައިލެގޫންގެ ޖެނެރަލް މެނޭޖަރު އަދި ކްރޮސްރޯޑް މޯލްޑިވްސްގެ ވައިސް ޕްރެޒިޑެންޓް މާޓިން ވެންޑާ ވިދާޅުވެފައިވާ ގޮތުގައި މި ރިސޯޓް ވެގެން ދާނީ މުޅިން ތަފާތު އެކްސްޕީރިއަންސް އަކަށެވެ.
މި މަޝްރޫއުގެ ދަށުން ފުރަތަމަ ފިޔަވަހީގައި ތިން ރަށެއް ތަރައްގީކުރާ އިރު މި ބަޔަކަށް 311.5 މިލިއަން އެމެރިކާ ޑޮލަރު (ގާތްގަނޑަކަށް 4.8 ބިލިއަން ރުފިޔާ) އިންވެސްޓް ކުރާނެ އެވެ. މި މަޝްރޫއުގެ ދަށުން ހިންގާ ރިސޯޓުތަކުގައި ޖުމުލަ 1،300 ކޮޓަރި ހުންނާނެ އެވެ.
ވެލާނާ އިންޓަނޭޝަނަލް އެއާޕޯޓުން ފުރައިގެން ސްޕީޑް ލޯންޗުގައި 10 މިނެޓުން ދެވޭ ރާސްތާގައި ތަރައްގީ ކޮށްފައިވާ އެނބޫދޫ ލެގޫން މަޝްރޫއު އެއްކޮށް ނިމޭއިރު، ޖުމްލަ 3،000 ކޮޓަރި ހުންނާނެ އެވެ.