ޕްރޮފެޝަނަލް ކެރިއާއެއްގެ ގޮތުގައި 22 އަހަރު ފުޓްބޯޅަ ކުޅުމަށް ފަހު ކެމެރޫންގެ ކުރީގެ ކެޕްޓަން ސެމިއުލް އެޓޫ ފުޓްބޯޅަ ކުޅުން ހުއްޓާލައިފި އެވެ.
އެޓޫ މަޝްހޫރު ވެފައި ވަނީ، ރެއާލް މެޑްރިޑުން ސީނިއާ ކެރިއާ ފަށައި، ބާސެލޯނާގައި ވިދާލި ކުޅުންތެރިޔެއްގެ ގޮތުގަ އެވެ. ބާސާއަށް 2004 ވަނަ އަހަރު ބަދަލުވެ، އެޓޫ ވަނީ އެ ޓީމަށް ސްޕެނިޝް ލީގްގެ ޗެމްޕިއަންކަން ދެ ފަހަރަށް ހޯދައިދީ ދެ ފަހަރަށް ޗެމްޕިއަންސް ލީގް ކާމިޔާބު ކޮށްފަ އެވެ. ދުނިޔޭގައި އޭނާ މަޝްހޫރުވީ ބާސާގައި ދެއްކި މޮޅު ކުޅުމާއެކު އެވެ.
ބާސާގައި ފަސް އަހަރު ހޭދަ ކުރުމަށް ފަހު ދެން އޭނާ ބަދަލުވީ އިންޓަ މިލާންއަށެވެ. ހޯޒޭ މޮރީނިއޯ އިންޓަ މިލާން އާއެކު 2009 ވަނަ އަހަރު ސީޒަންގެ ބޮޑު ތިން ތަށި ކާމިޔާބު ކުރިއިރު އެ ކާމިޔާބުގައި އެންމެ މުހިންމު ކުޅުންތެރިޔަކީ އެޓޫ އެވެ.
ކެމެރޫންގެ ޓީމަށް އުމުރުން 16 އަހަރުގައި ކުޅެން ފަށައި އެޓޫ ވަނީ ގައުމީ ޓީމަށް ކުޅުނު 118 މެޗުގައި 53 ލަނޑު ޖާހަފަ އެވެ. އޮސްޓްރޭލިއާގައި 2000 ވަނަ އަހަރު ބޭއްވި އޮލިމްޕިކް ގޭމުސްގެ ފުޓްބޯޅަ އިވެންޓުން ކެމެރޫން ގޯލްޑް މެޑަލް ހޯދިއިރު އޭނާއަކީ އެ ކާމިޔާބުގައި ހިއްސާވި ކުޅުންތެރިޔެކެވެ.
އެފްރިކާގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނުނު އެޓޫ ވަނީ އެފްރިކާގެ އެންމެ މޮޅު ކުޅުންތެރިޔާގެ އެވޯޑް ހަތަރު ފަހަރަށް ހޯދާފަ އެވެ. ކެމެރޫން ގައުމީ ޓީމާއެކު އެފްރިކާގެ އެންމެ ބޮޑު ފުޓްބޯޅަ މުބާރާތް އެފްރިކަން ކަޕް އޮފް ނޭޝަންގެ ޗެމްޕިއަންކަން ވެސް އޭނާ ހޯދި އެވެ.
އިނގިރޭސި ޕްރިމިއާ ލީގްގެ ޗެލްސީ އާއި އެވަޓަންއަށް ވެސް ކުޅުނު އެޓޫ 38 އަހަރުގައި ކުޅުން ހުއްޓާލީ ގަތަރުގެ ގަތަރު ސްޕޯޓްސް ކުލަބުންނެވެ.