ދުނިޔޭގެ ޓޫރިޒަމް ދުވަސް ފާހަގަ ކުރަން، 17 ޓީމެއް ބައިވެރިވެގެން ބާއްވާ "ކިޑްސް ފުޓްބޯލް ފިއެސްޓާ" ގެ ގުރުއަތު ނެގުން ރޭ ބާއްވައިފި އެވެ.
ކުރުނބާ މޯލްޑިވްސްގައި ބޭއްވި ގުރުއަތު ނެގުމުގައި 17 ޓީމަކުން ބައިވެރިވެފައިވާއިރު، ގުރުއަތު ނަގައި ދިނީ ގައުމީ ޓީމުގެ ކުރީގެ ކެޕްޓަން އަލީ އަޝްފާގު އާއި ކުރީގެ ކީޕަރު އިމްރާން މުހައްމަދު އެވެ. މި ރަސްމިއްޔާތުގައި އެފްއޭއެމްގެ ރައީސް ބައްސާމް އަދީލް ޖަލީލު އާއި އެޑިއުކޭޝަން މިނިސްޓަރު ޑރ. އައިޝަތު އަލީ ވެސް ބައިވެރިވަޑައިގެންނެވި އެވެ.
މާލެ، ވިިލިމާލެ އަދި ހުޅުމާލޭގެ ސްކޫލްތަކުގެ ކުދިން ބައިވެރިވާ މި ބޮޑު ފުޓުބޯޅައިގެ އީދު ކުރި އަށް ދާނީ ހެންވޭރު ދަނޑުގަ އެވެ. އަންނަ މަހުގެ ތިންވަނަ ދުވަހު ބާއްވާ "ކިޑްސް ފުޓްބޯލް ފިއެސްޓާ" އަކީ ރާއްޖޭގައި މިހާތަނަށް ބާއްވާ އެންމެ ބޮޑު މުބާރަތަށް ވާނެ ކަމަށް ޓޫރިޒަމް މިނިސްޓަރު އަލީ ވަހީދު ވަނީ ވިދާޅުވެފަ އެވެ. މި ހަރަކާތުގައި 13 އަހަރުން ދަށުގެ ޓީމު ތަކުން ބައިވެރިވާނެ އެވެ.
މި ފުޓުބޯޅަ ފިއެސްޓާ އިން މޮޅުވާ ކުޅުންތެރިޔާ ހޮވައި، ސްޕެއިންގެ ކުރީގެ މިޑްފީލްޑަރު މިޝެލް ސަލްގާޑޯ އިންތިޒާމުކޮށްގެން ދުބާއީގައި އޮންނަ ސްޕެނިޝް ސޮކާ ސްކޫލުގައި ތަމްރީން ހެދުމުގެ ފުރުސަތު ލިބިގެންދާނެ އެވެ. އަދި ޓޫރިޒަމް މިނިސްޓްރީން ވަނީ އަންނަ އަހަރު ދުބާއީގައި އޮންނަ ކޮންޓިނެންޓަލް މުބާރާތުގައި ފުރަތަމަ ފަހަރަށް ރާއްޖޭގެ 13 އަހަރުން ދަށުގެ ޓީމެއް ބައިވެރިކުރާނެ ކަމަށް ބުނެފަ އެވެ.
ޓޫރިޒަމް ދުވަސް ފާހަގަ ކުރުމުގެ ގޮތުން، ގިނަ ހަރަކާތްތަކެއް ބާއްވަން ޓޫރިޒަމް މިނިސްޓްރީން ދަނީ ތައްޔާރު ވަމުންނެވެ. މިގޮތުން އެންމެ ހާއްސަ ހަރަކާތަކީ ފްރީޑައިވް ވޯލްޑް ރެކޯޑެއް ގާއިމް ކުރުމެވެ.