ރިތިކް ރޯޝަންގެ ފުރަތަމަ ފިލްމު "ކަހޯނާ ޕިޔާރް ހޭ" 2000 ވަނަ އަހަރު ރިލީޒް ކުރުމާއެކު އެތައް ހާސް އަންހެން ކުދިންނެއްގެ ހިތުގެ ތެޅުން ކަމުގައި އޭނާ ވިއެވެ. ޝާހްރުކް ޚާނާއި ސަލްމާން ޚާން ދެކެ ލޯބިވީ ޖެނެރޭޝަނަށް ކުއްލިއަކަށް މުޅިން އާ ރީތި ބަތަލެއް ލޯބިވާން ލިބުނެވެ. އޭނާގެ ރީތި ކަމުން ޒުވާން އަންހެންކުދިންތައް އޭނާއަށް ފިދާވެ ވަރަށް ރަނގަޅަށް އޭނާގެ ޖާދޫގައި ޖެހުނެވެ.
ޖެނުއަރީ 2000 ގައި "ކަހޯނާ ޕިޔާރް ހޭ" ރިލީޒް ކުރިތާ މާ ގިނަ ދުވަހެއް ނުވެ ހަމަ އެ އަހަރުގެ ނޮވެމްބަރު މަހު ސުޒާން ޚާނާ ރިތިކް ކައިވެނިކޮށް ރިތިކް ދެކެ ލޯބިވީ އެތައް ހާސް އަންހެންކުދިންނެއްގެ ހިތް އޭނާ ހަލާކުކޮށްލި އެވެ.
މި ހަފުތާގައި ރިތިކް ވަނީ އޭނާގެ އާ ފިލްމު "ވޯ" ޕްރޮމޯޓް ކުރުމުގެ ގޮތުން އިންޑިއާގެ މަޝްހޫރު ޓީވީ ޝޯ "ދަ ކަޕިލް ޝަރުމާ ޝޯ" ގައި ބައިވެރިވެ މިކަމާ ގުޅޭ ގޮތުން ވާހަކަ ދައްކާފަ އެވެ. އޭނާ ބުނި ގޮތުގައި "ކަހޯނާ ޕިޔާރް ހޭ" ރިލިޒް ވުމާއެކު 30،000 އަށް ވުރެ ގިނަ ކައިވެނީގެ ޕްރޮޕޯޒަލް އޭނާއަށް ލިބުނެވެ.
ފުރަތަމަ ފިލްމު ރިލީޒް ކުރިތާ 19 އަހަރު ފަހުން ވެސް ރިތިކް އަކީ އެންމެ ރީތި ފިރިހެނާ ކަމަށް ގަބޫލުކުރާ މީހުން ވަރަށް ގިނަ އެވެ. ދުނިޔޭގެ އެންމެ ރީތި ފިރިހެނާގެ މަގާމަށް އެމެރިކާގެ އެޖެންސީއަކުން ދާދިފަހުން ވަނީ ރިތިކް ހޮވާފަ އެވެ. މި މަގާމް ރިތިކް ހޯދީ ކްރިސް އިވާންސް، ޑޭވިޑް ބެކަމް، ރޮބަޓް ޕެޓިންސަން ފަދަ ތަރިން ފަހަތަށް ޖައްސާލާފަ އެވެ.
ރިތިކް ބުނި ގޮތުގައި އޭނާގެ ރީތިކަމުގެ ސިއްރަކީ ބްރޯކޮލީ ކެއުމެވެ. އެހެން ބުނެފައި ހިނިގަނޑެއް ޖަހާލާފައި އެއީ މަޖަލަކަށް ބުނި އެއްޗެއް ކަމަށް ރިތިކް ބުންޏެވެ. އަދި ބުނީ އޭނަ އެހާ ރީތިހެން ހީވަނީ އޭނާ ކުޅޭ ރޯލުތަކުން އޭނާ ފެންނަލެއް ރީތިކަމުން ކަމަށެވެ.
ރިތިކް މިހާރު ދަނީ ޓައިގާ ޝްރޮފް އާއެކު ކުޅެފައިވާ "ވޯ" ގެ ޕްރޮމޯޝަން މަސައްކަތުގައި އެކި އެކި ޝޯތަކުގައި ބައިވެރިވެ އިންޓަވިއުތައް ދީ ހަދަމުންނެވެ. މިއަހަރުގެ އެންމެ ބޮޑު އެކްޝަން އެންޓަޓައިނާގެ ގޮތުގައި އިޝްތިހާޜު ކުރަމުންދާ "ވޯ" ރިލީޒް ކުރާނީ އަންނަ އޮކްޓޯބަރު ދެވަނަ ދުވަހު އެވެ.