އިނގިރޭސި ލީގް ކަޕް ނުވަތަ ކަރަބާއޮ ކަޕްގައި އިނގިރޭސި ތިން ވަނަ ޑިވިޝަންގެ ރޮޗްޑޭލްއިން އަމިއްލަ ދަނޑުގައި ކުޅުނު މެންޗެސްޓާ ޔުނައިޓެޑް ހިފަހައްޓާލައިފި އެވެ. މެޗު އެއްވަރުވުމުން ނަތީޖާ ނެރުމަށް ޖެހި ޕެނަލްޓީ ޝޫޓް އައުޓްގައި ޔުނައިޓަޑް މޮލުވީ 5-3 އިން ނެވެ.
މެޗުގެ ފުރިހަމަ ވަގުތު ނިމުނީ 1-1 ން އެއްވަރު ވެގެނެވެ. ފުރަތަމަ ލީޑް ނެގީ ޔުނައިޓެޑުންނެވެ. އެ ޓީމުގެ ލަނޑު މެޗުގެ 68 ވަނަ މިނެޓްގައި ކާމިޔާބު ކުރީ ޒުވާން ފޯވަޑް މޭސަން ގުރިންވުޑް އެވެ. ޔުނައިޓެޑަށް ލީޑްގައި ހިފަހައްޓާ ލެވުނީ އަށް ވަރަކަށް މިނެޓްގަ އެވެ. ރޮޗްޑޭލްގެ 16 އަހަރުގެ ޑިފެންޑަރު ލޫކް މެތެސަން ވަނީ އެ ޓީމަށް މެޗުގެ ނަތީޖާ ހަމަހަމަ ކޮށްދީފަ އެވެ. މެތެސަން އަކީ ހައި ސްކޫލްގައި ކިޔަވަމުންދާ ދަރިވަރެކެވެ.
ޕެނަލްޓީ ޝޫޓުއައުޓްގައި ޔުނައިޓެޑްގެ ފަސް ޕެނަލްޓީ ވެސް ކާމިޔާބު ކުރި އެވެ. ރޮޗްޑޭލްގެ ޖިމީ ކިއޯހެން ޖެހި ޕެނަލްޓީ ޔުނައިޓަޑްގެ ކީޕަރު ސާޖިއޯ ރޮމޭރޯ ދިފާއު ކުރި އެވެ. ޔުނައިޓެޑް މެޗު މޮޅުކޮށް ދިން ޕެނަލްޓީ ކާމިޔާބު ކުރީ ޑެނިއަލް ޖޭމްސް އެވެ.
ޕްރިމިއާ ލީގްގައި މިދިޔަ އާދިއްތަ ދުވަހު ޔުނައިޓެޑް ބަލި ކުރި ވެސްޓްހަމް ޔުނައިޓަޑް ވަނީ ތިން ވަނަ ޑިވިޝަންގެ އެހެން ޓީމެއް ކަމަށްވާ އޮކްސްފޯޑް ޔުނައިޓަޑް އަތުން ބަލިވެ ކަޓާފަ އެވެ.