ވޮލީބޯޅަ އެސޯސިއޭޝަންގެ ހައިސިއްޔަތު ބޭނުން ކޮށްގެން ހަރަކާތްތައް ހިންގާނަމަ ގާނޫނީ ފިޔަވަޅު އަޅަން ޖެހިދާނެ ކަމަށް، ވީއޭއެމްގެ ކުރީގެ ރައީސް މުހައްމަދު ލަތީފަށް ސްޕޯޓްސް ކޮމިޝަނަރު ހީނާ އަހްމަދު ސަލީމު އަންގަވައިފި އެވެ.
ސްޕޯޓްސް ކޮމިޝަނަރު މިގޮތަށް އެންގެވީ، ދުނިޔޭގެ ވޯލީބޯޅަ ފެޑްރޭޝަން (އެފްއައިވީބީ) އިން އެންގި ގޮތަށް، ވީއޭއެމް ލަތީފުގެ އެކްސްކޯއާ ހަވާލު ކުރުމަށް އެދި ވީއޭއެމްގެ ލެޓާ ހެޑްގައި ލަތީފު ފޮނުއްވި ސިޓީއަކާ ގުޅިގެންނެވެ.
މިދިޔަ ހޯމަ ދުވަހު ލަތީފަށް ފޮނުވި ސިޓީގައި ބުނެފައި ވަނީ ވީއޭއެމްގެ ލޯގޯ އާއި ލެޓާ ހެޑް ބޭނުން ކުރުމުގެ އެއްވެސް ހައިސިއްޔަތެއް ލަތީފަށް މިހާރު ލިބިގެން ނުވާ ކަމަށެވެ. އަދި އެކަން ތަކުރާރު ކޮށްފިނަމަ ގާނޫނީ ފިޔަވަޅު އެޅުމަށް ކަމާބެހޭ ފަރާތްކަށް މައްސަލަ ފޮނުވާނެ ކަމަށެވެ.
ސްޕޯޓްސް ކޮމިޝަނަރު ސިޓީގައި ފާހަގަ ކޮށްފައި ވަނީ، ވީއޭއެމްގެ ރައީސް ކަމުގެ ހައިއްސިޔަތު ލަތީފުގެ ކިބައިގައި ނެތް އިރު ލޯގޯ އާއި ލެޓާ ހެޑް ބޭނުން ކޮށްގެން ވުޒާރާތަކަށް ސިޓީ ފޮނުވުމަކީ ޖިނާއީ ދައުވާ ކުރެވޭނެ ކަމެއް ކަމަށެވެ. އަދި އެކަން ތަކުރާރުކޮށްފިނަ ކަމާބެހޭ މުއައްސަސާތަކަށް މައްސަލަ ފޮނުވާނެ ކަމަށެވެ.
ވީއޭއެމްއާ ގުޅޭގޮތުން ހުށަހެޅުނު ގިނަ މައްސަލަތަކާއެކު ސްޕޯޓްސް ކޮމިޝަނަރު ވަނީ، ލަތީފުގެ އެކްސްކޯ އުވާލުމަށް ފަހު ފަސް މެންބަރުންގެ ނޯމަލައިޒޭޝަން ކޮމިޓީއެއް އައްޔަން ކުރައްވާފަ އެވެ. ނަމަވެސް ސްޕޯޓްސް ކޮމިޝަނަރު އައްޔަން ކުރި ނޯމަލައިޒޭޝަން ކޮމިޓީ ބަލައި ނުގަންނަ ކަމަށް އެފްއައިވީބީން ވަނީ އަންގާފަ އެވެ.
އެފްއައިވީބީގެ ޖެނަރަލް ޑައިރެކްޓާ ފަބިއޯ އެޒެވޭޑޯ ސޮއިކޮށް މިމަހު ކުރީކޮޅު، ވީއޭއެމްއަށް ފޮނުވާފައިވާ ސިޓީގައި ބުނެފައި ވަނީ، އެފްއައިވީބީގެ އަސާސީ ގަވާއިދުގެ 1.6.4 ގެ މާއްދާގެ ދަށުން ދައުރުގެގެ މެދުތެރެއިން އެއްވެސް މެންބަރު އެސޯސިއޭޝަނެއްގެ ހިންގާ ކޮމިޓީ ބަދަލު ކުރުމުގެ ބާރު ލިބިފައި ވަނީ ހަމައެކަނި އެ މެންބަރު އެސޯސިއޭޝަންގެ އިތުރުން އެފްއައިވީބީ އަށް ކަމަށެވެ.
"އެފްއައިވީބީން ބެލިބެލުމުން ރާއްޖޭގެ ވޮލީބޯޅަ އެސޯސިއޭޝަން ތަމްސީލު ކުރުމުގެ އެއްވެސް ހައިސިއްޔަތެއް ނޯމަލައިޒޭޝަން ކޮމިޓީއަށް ލިބިގެން ނުވެ އެވެ." އެފްއައިވީބީން ފޮނުވާފައިވާ ސިޓީގައި ބުނެފައި ވެއެވެ. "އަދި ރާއްޖޭގެ ވޮލީބޯޅަ އާއި ބީޗް ވޮލީބޯޅަ ހިންގުމުގެ ހައްގުވެސް ނޯމަލައިޒޭޝަން ކޮމިޓީއަށް ލިބިގެން ނުވެ އެވެ."
އަދި ވީއޭއެއެމްގެ އޮފީހާއި އެ އެސޯސިއޭޝަން ވީއޭއެމްގެ އެގްޒެކެޓިވް ކޮމިޓީއާ ހަވާލު ކުރުމަށްވެސް ސިޓީގައި ބުނެފައި ވެއެވެ. އެކަން ނުކޮށްފިނަމަ ވީއޭއެމްއަށް އެފްއައިވީބީގެ ސަސްޕެންޝަން އަތުވެދާނެ ކަމުގެ ބިރު އެބައޮތް ކަމަށް އެފްއައިވީބީގެ ސިޓީގައި ހާމަކޮށްފައި ވެއެވެ.
ސިޓީގައި ބުނެފައި ވަނީ، ވީއޭއެމްގެ މައްސަލަތައް އެފްއައިވީބީން ބަލަމުންދާ ކަމަށެވެ. އަދި ހުރިހާ ފަރާތްތަކުން ވެސް އޮލިމިޕިކް މޫވްމެންޓްގެ ޕްރިންސިޕަލްތަކަށް އިހްތިރާމް ކުރުމަށް ވެސް ސިޓީގައި އެދިފައި ވެއެވެ.
ވީއޭއެމްގެ އެކްސްކޯ އުވާލުމަށް ކޮމިޝަނާ އެޅުއްވި ފިޔަވަޅަށް އަމަލު ކުރުން ފަސް ކުރުމުގެ ވަގުތީ އަމުރެއް ނެރެދިނުމަށް އެދި ލަތީފް ސިވިލް ކޯޓަށް މައްސަލަ ވެސް ހުށަހެޅި އެވެ. ނަމަވެސް ކޯޓުން ވަނީ އޭނާ އެދުނު އަމުރު ނެރެ ނުދޭން ނިންމާފަ އެވެ.
ލަތީފު އެ މައްސަލަ ސިވިލް ކޯޓަށް ހުށަހެޅީ ކޮމިޝަނާގެ އެ ނިންމުމަކީ ކުޅިވަރު ގާނޫނާއި ކުޅިވަރު ޖަމިއްޔާތައް ރަޖިސްޓަރީކޮށް ހިންގުމާ ބެހޭ ގަވައިދާ ހިލާފު ނިންމުމެއް ކަމަށް ބުނެ އެވެ. އޭނާ އެދިފައިވަނީ އެ ނިންމުމަކީ ބާތިލް ނިންމުމެއްގެ ގޮތުގައި ކަނޑައަޅައިދިނުމަށެވެ.
އެ ނިންމުމަށް އަމަލު ކުރުން ފަސް ކުރުމުގެ ވަގުތީ އަމުރަކަށް ލަތީފު އެދުނީ އިންތިހާބުކޮށްފައިވާ ހިންގާ ކޮމެޓީގެ ދައުރު ގަވައިދުގައިވާ ގޮތުގެ މަތިން ހަމަ ނުވަނީސް އެ ކޮމެޓީގެ މެންބަރުން މަގާމުން ދުރުކުރުމުގެ ސަބަބުން މެންބަރުންނަށް އިއާދަ ނުކުރެވޭނެ ގެއްލުން ލިބޭނެތީ އެވެ.