ހދ. ނެއްލައިދޫގައި އަންހެނަކު ފާހާނާތެރޭގައި ހުއްޓާ، މީހަކު އޭނާގެ ވީޑިއޯ ކުރިކަމަށް ބުނެ ހުށައަޅާފައިވާ މައްސަލައެއް ފުލުހުން ބަލަން ފަށައިިފި އެވެ.
ފުލުހުން ބުނީ މިދިޔަ ބުރާސްފަތި ދުވަހު، އަންހެނަކު ފާހާނާ ތެރޭގައި ހުއްޓާ މީހަކު އޭނާގެ ވީޑިއޯ ކުރިކަމަށް ބުނެ މައްސަލައެއް ހުށައެޅިފައިވާ ކަމަށެވެ. އެ މައްސަލައިގެ ތަހުގީގަށް ފުލުހުންގެ ޓީމެއް އެ ރަށައް ގޮސްފައިވާ ކަމަށްވެސް ވަނީ ބުނެފައެވެ.
ނަމަވެސް މައްސަލައިގެ ތުހުމަތު ކުރެވޭ މީހާ، އޭރު އެ ރަށުން ފުރައިގެން ގޮސްފައި ވާކަމަށް ފުލުހުން ބުނެއެވެ. ފުލުުހުން ބުނީ މައްސަލަ އިތުރަށް ތަހުގީގު ކުރަމުންދާ ކަމަށާ މައްސަލައާ ގުޅޭ މައުލޫމާތު ލިބެމުންދާ ވަރަކަށް ހިއްސާ ކުރަމުން ދާނެކަމަށެވެ.
ނެއްލައިދޫ މީހަކު އަވަސްއަށް ބުނީ އެ ހާދިސާއާއި ގުޅިގެން އެރަށުގެ އަންހެނުންތަކެއް މިއަދު ހިމޭން އެއްވުމެއް ކުރިއަށް ގެންގޮސްފައިވާ ކަމަށެވެ. އެ އެއްވުމުގައި އެކަމާ ދެކޮޅު ލިޔުންތައް ލިޔެފަައިވާ ބޯޑްތަކެއް ގެންގުޅެފައިވާ ކަމަށެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކުގައި "ސިއްރުން ފާޚާނާ ވީޑިއޯކުރުމާ އަހަރެން ދެކޮޅު"، "މިކަން ހުއްޓުވާނީ ކިހިނެތް" ފަދަ ލިޔުންތައް ލިޔެފައިވާ ބޯޑްތައް އަންހެންވެރިން ގެންގުޅެފައިވެއެވެ.
ނަމަވެސް ފުލުހުން ބުނީ އެފަދަ ހިމޭން އެއްވުމެއް އެރަށުގައި ކުރިއަށް ގެންދިޔަކަމުގެ މައުލޫމާތެއް ލިބިފައި ނެތްކަމަށެވެ.