ޖައްވުގައި ގްރެވިޓީ ނުވަތަ ދަމާބާރު ގިނަ އަދަދަކަށް އެކުލެވިގެންވާ ހޮހަޅައިގެ ސިފަ ލިބިފައިވާ ތަންތަން ހުރެ އެވެ. މި ތަންތަނަކީ ދަމާބާރު ގިނަ އަދަދަކަށް އެކުލެވިގެންވާ ތަންތަނަށް ވާތީ ކިތަންމެ ބޮޑު އެއްޗެއް ވެސް އެއިން ތަނަކަށް ދަމައިގަންނަން ނަގާނީ ސިކުންތު ކޮޅެކެވެ. ޖައްވުގައި ހުންނަ މިފަދަ ތަންތަނަށް ސައިންސް ވެރިން ކިޔަނީ ބްލެކް ހޯލް އެވެ. މިއީ ދިރާސާކޮށްގެން ހަގީގަތް ހޯދަން އުދަގޫ ތަނެކެވެ. ތަރިތައް ވަށް ބުރެއްގެ ސިފައަށް ބާރު ސްޕީޑެއްގައި އެބުރޭނަމަ އެތަނުގައި ބްލެކް ހޯލެއް ވާނެ އެވެ. މިއީ ބްލެކް ހޯލް ހުންނަ ތަންތަން ދެނެގަންނަން ސައިންސްވެރިން ބޭނުންކުރާ އުކުޅެވެ.
މީގެ ކުރިން ސައިންސްވެރިންނަށް ވަނީ ބްލެކް ހޯލެއްގެ ތެރެއިން ދެ ތަރި ފެނިފަ އެވެ. އޭގެ ދިރާސާތައް ކުރިއަށް ގެންދަނިކޮށް ސައިންސްވެރިން މިވަނީ އިތުރު ހައިރާން ކަމެއްގެ ތެރެއަށް ވެއްޓިފަ އެވެ. ބްލެކް ހޯލް މޮނީޓާކުރާ ސްލޯން ޑިޖިޓަލް ސްކައި ސާވޭ (އެސްޑީއެސްއެސް) އަށް މިވަނީ މުޅިން އާ މަންޒަރެއް ފެނިފަ އެވެ. ތިން ބްލެކް ހޯލެއް އެއް މިސްރާބަކަށް ދަތުރު ކުރަނީ އެވެ. ތިން ބްލެކް ހޯލެއް އެއް ދިމާއަކަށް ދަތުރުކޮށް އެކަތި އަނެކެތީގެ ބާރު ހިނގާ ހިސާބަށް ދެވުމުން ދެން ކަންތައް ވާނެ ގޮތް ބަލަން ސައިންސްވެރިން މިހާރު ތިބީ ކެތްމަދުވެފަ އެވެ. މިއީ އެމީހުނަށް މުޅިން އަލަށް ފެނިގެން އުޅޭ މަންޒަރެކެވެ.
މެކްސިކޯގެ އެސްޑީއެސްއެސް އިން ފޯރުކޮށް ދީފައިވާ މައުލޫމުތަކަށް ބަލާއިރު މިތިން ބްލެކް ހޯލް ވަނީ ދުނިޔެއާ ވަރަށް ދުރުގަ އެވެ. ލައިޓް ސްޕީޑުގައި ތިން ބްލެކް ހޯލާ ދިމާއަށް ދަތުރު ކުރާނަމަ އެއް ބިލިއަން އަހަރު ނަގާނެ ކަމަށް ވެއެވެ. އެހެންކަމުން އެއީ ވަރަށް ދުރެވެ. އެކަމަކު ޖައްވުގައި ބޭނުންކުރާ ރާޑަރުތަކާއި ސެޓްލައިޓުތަކަށް އެއީ ވަރަށް ކައިރި އެވެ.
ބްލެކް ހޯލް ތަކުގެ މި ދަތުރު މަންޒަރު ބަލާ ޓީމުގެ އިސްވެރިޔާ ރިޔަން ޕްރިފިލީ ވިދާޅުވީ، ބްލެކް ހޯލްތައް ދަތުރު ކުރަނީ ވަރަށް ބާރު ސްޕީޑެއްގައި ކަމަށްވުމުން އެއީ އެ ސަރަހައްދުގައި އުފެދިފައިވާ ތޫފާނެއްގެ ސަބަބުން ދިމާވާ ކަމެއް ކަމަށް ބެލުމުގެ ފުރުސަތު އެބަ އޮތް ކަމަށެވެ.
އޭނާ ވިދާޅުވި ގޮތުގައި ތިން ބްލެކް ހޯލް އެއް ދިމާއަކަށް ދަތުރު ކޮށްފިނަމަ އެކްސިޑެންޓަކާ ކުރިމަތިވާނެ އެވެ. ނަމަވެސް އެކްސިޑެންޓުން ލިބޭނެ ގެއްލުމުގެ ތަފްސީލު ލިބޭނެ ކަމުގެ ޔަގީންކަން ކުޑައެވެ. އަދި އެކްސިޑެންޓުގެ ސަބަބުން ތިން ބްލެކް ހޯލް ނެތި ހިނގައިދާނެ ކަމަށް ލަފާ ކުރެވެ އެވެ.
މިއީ ތޫފާނެއްގެ ސަބަބުން ހިނގާ ކަމެއް ކަމަށް ނާސާއިން ވެސް ވަނީ ބުނެފަ އެވެ. ނާސާއިން ބުނި ގޮތުގައި ތިން ބްލެކް ހޯލް ދަތުރު ކުރާ ސަރަހައްދުން ގިނަ އަދަދެއްގެ ގޭސްތައް ފެނިފައި ވެއެވެ. ނާސާއިން ގެންދަނީ އެ ހަރަކާތް ވަރަށް ކައިރިން ބަލައި ޖައްވީ އެހެން އިދާރާތަކަށް އެހީތެރިކަން ވެސް ފޯރުކޮށްް ދެމުންނެވެ.
ނާސާއިން ބުނާ ގޮތުގައި ބްލެކް ހޯލްގެ ދުރުމިން އެކަތި އަނެކެއްޗާ ހުރީ 10،00 އާއި 30،000 ލައިޓް ސްޕީޑުގެ ދުރު މިނެވެ. އެކަމަކު މި ދުރުމިން އިތުރަށް ދުރުވެގެން ދިޔުމަކީ އެކަށީގެންވާ ކަމެކެވެ.
ބްލެކް ހޯލް އެކަތި އަނެކެއްޗާ މުޑި އަރާއިރު ކަންތައް ވާނެ ގޮތް ލަފާ ކުރަން ނާސާއަށް އަދި ދައްޗެވެ. އަދި މުޑި އަރަނީ ސީދާ ކޮން ދުވަހަކު ކަމެއް ވެސް ބުނެދޭކަށް ނޭނގެ އެވެ.
އެކަމަކު މި އާދަޔާ ހިލާފު ދަތުރު ބެލުމަށް ހުރިހާ ޖައްވީ ސައިންސްވެރިން ގުޅިގެން ވަނީ ސިއްރު ވެބްސައިޓެއް ވެސް ތައްޔާރުކޮށްފައި ވެއެވެ. ބެލެވޭ ގޮތުގައި މި ވެބްސައިޓަށް އެކްސެސް ކުރެވޭނީ ޑާކްވެބް މެދުވެރިކޮށެވެ. ޑާކްވެބުން ވެސް މި ސައިޓަށް ވަދެވޭނީ ސީދާ ސައިޓުގެ ލިންކުގެ އެނގޭނަމަ އެވެ. އެހެންކަމުން އާންމު މީހާއަށް މި ދަތުރުގެ އެއްވެސް މަންޒަރެއް ނުފެންނާނެ އެވެ.