ކިޑްނީ ފެއިލްވެފައިވާ މީހަކަށް ކިޑްނީއެއް ހަދިޔާ ކުރަން ތައްޔާރަށް ހުރި ކަމަށް ޒުވާނަކު ހާމަކޮށްފި އެވެ.
ކިޑްނީ ހަދިޔާ ކުރަން ތައްޔާރަށް ހުރިކަން ހާމަކޮށް އެކަން ހާމަކޮށްފައި ވަނީ އައްޑޫ ސިޓީ ހުޅުދޫ، އުމުރުން 33 އަހަރުގެ އަހުމަދު ފިރާޒެވެ. ފިރާޒު ވަނީ އޭނާގެ އެއް ކިޑްނީ، އެކަމަށް ބޭނުންވާ މީހަކަށް ހަދިޔާ ކުރަން ނިންމާފައި ވާކަން ފޭސްބުކްގައި ހާމަކޮށްފަ އެވެ.
"މި ދުނިޔޭގެ އެއްވެސް އެދުމެއް ނެތި، އިންސާނިއްޔަތަށްޓަކައި ކިޑްނީ ބޭނުންވެފައިވާ މީހަކަށް މާތްﷲ ގެ ހަޒުރަތުން ދަރުމައާއި ޝަވާބަށް އެދި މަގޭ އެއް ކިޑްނީ ހަދިޔާ ކުރާނަން. މިކަން ކުރަން ނިންމީ ކޮންމެ ދުވަހަކު ކިޑްނީއަށް އެދި އެކި މީހުން އާދޭސް ކުރާތަން ފެނުނީމަ ހިތަށް ކެތް ނުވެގެން." ފިރާޒުގެ މޯބައިލް ނަންބަރާއެކު އޭނާ ކޮށްފައިވާ ޕޯސްޓްގައި ބުނެފައި ވެއެވެ.
ފިރާޒު ބުނީ ކޮންމެ ދުވަހަކުވެސް ސޯޝަލް މީޑިއާއިން އެތައް ބައެއްގެ ހިތްދަތި ދިރިއުޅުމުގެ ވާހަކަ ފެންނަ ކަމަށެވެ. ޚާއްސަކޮށް ކިޑްނީއަކަށް އެދި އާދޭސްކުރާ މީހުން ފެންނަ ކަމަށެވެ.
"އެކަމަށް ކެތްނުކުރެވިގެން ނިންމި ނިންމުމެއް،" ފިރާޒު ބުންޏެވެ. "މިއީ ސިއްހީ ގޮތުން ވެސް ބޮޑު މައްސަލައެއް ދިމާވާނެ ކަމެއް ނޫން. މިކަން ކުރަން ނިންމީ އެކަން ޔަގީން ކުރުމަށްފަހު"
މި ދުނިޔޭގެ އެއްވެސް އެދުމެއް ނެތި، އިންސާނިއްޔަތަށްޓަކައި ކިޑްނީ ބޭނުންވެފައިވާ މީހަކަށް މާތްﷲގެ ހަޒުރަތުން ދަރުމައާއި ޝަވާބަށް އެދި މަގޭ އެއް ކިޑްނީ ހަދިޔާ ކުރާނަން... މިކަން ކުރަން ނިންމީ ކޮންމެ ދުވަހަކު ކިޑްނީއަށް އެދި އެކި މީހުން އާދޭސް ކުރާތަން ފެނުނީމަ ހިތަށް ކެތް ނުވެގެންއަހުމަދު ފިރާޒް | ދިވެހި ޒުވާނެއް
ފިރާޒު ވަނީ މީގެ ކުރިންވެސް މީހަކަށް ކިޑްނީ ހަދިޔާ ކުރަން މަސައްކަތްކޮށްފަ އެވެ. ނަމަވެސް އެއީ އެނާގެ ގާތް ރަހުމަތްތެރިއެއްގެ ބައްޕައަކަށެވެ. އެފަހަރު އެކަން ނުވީ ދެ މީހުންގެ ލޭގެ ގުރޫޕް ދިމާ ނުވެގެންނެވެ.
ނަމަވެސް މިފަހަރު ފިރާޒު ހުރީ ކޮންމެ މީހަކަށްވިޔަސް، ކިޑްނީ ހަދިޔާ ކުރަން ތައްޔާރަށެވެ. ކިޑްނީ ފެއިލްވެ އެތައް ވޭނެއް އުފުލަމުންދާ މީހުންގެ ތެރެއިން ކޮންމެވެސް އެކެއްގެ ވޭންތަކަށް ނިމުން ގެނައުމަށެވެ. އުފާވެރި ހަޔާތެއް އެ މީހަކަށް ހޯދާދިނުމުގެ ވަރުގަދަ އަޒުމުގައެވެ.
ފިރާޒު ބުނީ ސޯޝަލް މީޑިއާގައި ޖެހި ޕޯސްޓާއެކު ކުޑަ ވަގުތުކޮޅެއްގެ ތެރޭގައި އެތައް ބަޔަކު ގުޅާފައިވާކަމަށެވެ.
"ކިޑްނީއަކަށް އެދި މިދިޔަ މަދު ވަގުތުކޮޅުގެ ތެރޭގައި ދުއިސައްތަ ވަރަކަށް މީހުން ގުޅި. އިންޝާﷲ އަޅުގަނޑު މި ހުރީ ކޮންމެ މީހަކާ ދިމާވިނަމަވެސް ކިޑްނީ ހަދިޔާކުރަން ތައްޔާރަށް."
ކިޑްނީ ފެއިލްގެ ކޮންމެ ދުވަހަކު ޑައިލިސިސް ހަދަމުން އެތައް ވޭނެއްގައި ދިރިއުޅޭ ގިނަ ބަޔަކު އަޅުގަނޑުމެންގެ ތެރޭގައިވެސް އުޅެއެވެ. އެފަދަ މީހުން ގެންދަނީ ކިޑްނީއެއް ހޯދަން ގިނަ މަސައްކަތްތަކެއް ކުރަމުންނެވެ.