މާލޭގެ ތިން ސަރަހައްދެއްގައި ގަވާއިދާ ހިލާފަށް އެއްގަމު އުޅަނދު ޕާކު ކުރަމުންދާ ކަމަށް ފާހަގަ ކުރެވޭތީ އެ ސަރަހައްދު ތަކުގައި އެގޮތަށް ޕާކު ކުރާ އުޅަނދުތައް ޓޯ ކުރާނެ ކަމަށް ފުލުހުން ބުނެފި އެވެ.
ފުލުހުން ބުނީ ގަވައިދާ ހިލާފަށް ޕާކު ކުރުމުގެ މައްސަލަތައް ބޮޑު ވެފައިވަނީ ބޮޑު ތަކުރުފާނު މަގު މެހެލިގޯޅި ގުޅޭ ހިސާބާއި އެމްޓީސީސީ ފެރީޓާމިނަލް ކުރިމަތިން ފެށިގެން ބޮޑު ތަކުރުފާނު މަގު ބީއެމްއެލް އޭޓީއެމާ ދެމެދާއި އަމީނީމަގައި ހުންނަ ބީއެމްއެލްގެ ކަސްޓަމާ ސާވިސް ސެންޓަރު ސަރަހައްދާއި، އައިޖީއެމްއެޗް ހުންނަ ސަރަހައްދުގައި ކަމަށެވެ.
އަދި ބުނީ އެ ސަރަހައްދުތައް ފިޔަވައި އެހެން ސަރަހައްދު ތަކުގައި ވެސް ގަވާއިދާ ހިލާފަށް އުޅަނދު ޕާކު ކޮށްފައި ހުރިނަމަ، އެ އުޅަނދެއް ޓޯ ކުރުމުގެ މަސައްކަތް ކުރާނެ ކަމަށެވެ.
މިދިއަ ހަފުތާގެ ފުލުސް ތަފާސްހިސާބުތަކަށް ބަލާއިރު 700 އަށް ވުރެ ގިނަ އެއްގަމު އުޅަނދު ގަވާއިދާ ހިލާފަށް ޕާކު ކޮށްގެން ސްޓިކާ ޖަހާފަ އެވެ. އަދި 94 އުޅަނދެއް ޓޯ ކުރި އެވެ.