ހ. ހާޖަރާގެ ތަޅާލުމުގެ މަސައްކަތްކޮށްދޭނެ ފަރާތެއް ހޯދަން އިއުލާނުކޮށްފި އެވެ.
މިނިސްޓްރީ އޮފް ހައުސިން އެންޑް އަރބަން ޑިވެލޮޕްމަންޓުން ކޮށްފައިވާ އިއުލާނެއްގައި ބުނެފައިވަނީ ހާޖަރާގެ ތަޅާލުމުގެ މަސައްކަތްކޮށްދޭނެ ފަރާތެއް ހޯދަން ބޭނުންވާ ކަމަށެވެ.
މި މަސައްކަތައް ޝައުގުވެރިވާ ފަރާތްތަކުން މާދަމާގެ ނިޔަލަށް ހައުސިން މިނިސްޓްރީން މައުލޫމާތު ސާފުކޮށް، މިމަހުގެ ހަތްވަނަ ދުވަހުގެ ކުރިން އަގު ހުށައެޅުމަށް ވަނީ އެދިފައެވެ.
މި މަސައްކަތަށް ހުށަހަޅާ ޖުމްލަ އަގު 250,000 ދިވެހި ރުފިޔާއަށްވުރެ ބޮޑުނަމަ، މި މަސައްކަތަށް ބިޑް ސެކިއުރިޓީގެ ގޮތުގައި 2500 ރުފިޔާގެ ބިޑް ސެކިއުރިޓީއެއް ހުށަހަޅަން ޖެހެއެވެ. އަދި ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 120 ދުވަސްކަމަށާ ޕާފޯމެންސް ބޭންކް ގެރެންޓިއެއްގެ ގޮތުގައި، ހުށަހަޅާ ޖުމްލަ އަގުގެ 7 ޕަސެންޓްގެ ޕާފޯމެންސް ގެރެންޓީއެއް ބިޑް އެވޯޑްވާ ފަރާތުން ހުށަހަޅަން ޖެހޭނެކަމަށް އެ މިނިސްޓްރީން ވަނީ ބުނެފައެވެ.
ހާޖަރާގޭ ތަޅާލުމުގެ މަސައްކަތްކޮށްދޭނެ ފަރާތެއް ހޯދަން އިއުލާނުކޮށްފައިވާއިރު، އެއީ ވަރަށް ދުވަސްވެފައިވާ އިމާރާތެވެ. މީގެ ކުރިން އޭގެ ބެލްކަނިން ބޮޑުބައެއް ވެއްޓިފައިވެއެވެ.
ހާޖަރާގެއިން ތަޅާލަން އިއުލާނުކޮށްފައިވާ ބަޔަކީ ސަރުކާރަށް ނަގާފައިވާ ބައެކެވެ. އެއީ ދައުލަތުން ބަދަލުދީ ނަގާފައިވާ ބައެކެވެ.
އާއްމުންނަށް ނުރައްކަލެއް ކުރިމަތިވެދާނެ ކަމަށް ބެލެވޭ 11 އިމާރާތެއް ތަޅާލަންޖެހޭކަމަށް މީގެ ކުރިން ސަރުކާރުން ވަނީ ބުނެފައެވެ.