"ފެންޓާސްޓިކް ފޯ" އަކީ މާވެލްގެ ސުޕަހީރޯ ޓީމުތަކަށް ބަލާއިރު އެންމެ ދޮށްޓަށް އޮތް މިފަދަ ޓީމެވެ. ނަމަވެސް މާވެލްގެ އެހެން ސުޕަހީރޯ ޓީމުތަކުން ބޮޑު ސްކްރީނުގައި ހޯދަމުން އަންނަ ކާމިޔާބީއާ ގާތަށް ވެސް "ފެންޓާސްޓިކް ފޯ" އަކަށް ނުދެވެ އެވެ.
މީގެ ފިލްމެއް 1994 ވަނަ އަހަރު ވެސް އުފެއްދި އެވެ. އާދައިގެ ބަޖެޓަކުން އުފެއްދި އެ ފިލްމު ނުވެސް ނެރެ އެ އޮތީ އެވެ. އެއަށް ފަހު ފެންޓާސްޓިކް ފޯގެ ސުޕަހީރޯން ބޮޑު ސްކްރީނަށް އަކީ 2005 ވަނަ އަހަރު އެވެ. ފިލްމުގެ ދެ ވަނަ ބައެއް 2007 ވަނަ އަހަރު ވެސް ނެރުނެވެ.
ނަމަވެސް ދެން ވެސް ވައިގައެއް ނުހިފި އެވެ. ނުވަތަ ބެލުންތެރިން އަދި ފާޑުކިޔުންތެރިންނަށް ކަމުދާ ފެންވަރަކަށް މި ފިލްމު ތަރައްގީއެއް ނުކުރެވުނެވެ. ފުރަތަމަ ދެ ފިލްމަށް ބޮކްސް އޮފީހުގައި އެދެވޭ ތަރުހީބެއް ބެލުންތެރިންގެ ފަރާތުން ލިބި މާލީގޮތުން ކިރިޔާ ސަލާމަތްވިޔަސް ފާޑުކިޔުންތެރިން ދިނީ ސުމެއްގެ މާކުހެވެ.
އެންމެފަހުން މި ފާޑުކިޔުމާއި މާލީ ގޮތުން ބޮކްސް އޮފީހުގައި މާ ބޮޑު ކާމިޔާބީއެއް ނުލިބި މި ފިލްމު ސިލްސިލާގެ ކުރިއަށް ހުރި ފިލްމުތައް ޓުވެންޓިއަތު ސެންޗުރީ ފޮކްސް ސްޓޫޑިއޯ އިން އެފަހަރު ކެންސަލްކޮށްލީ އެވެ. އޭރު އޮތީ ތިން ވަނަ ފިލްމަކާއި ހަތަރު ވަނަ ފިލްމެއް ވެސް އުފައްދާ ގޮތަށެވެ.
ނަމަވެސް އެންމެފަހުން އެ ޕްރޮޖެކްޓް ކެންސަލްކޮށް މި ސިލްސިލާ ރީބޫޓްކޮށްލީ އެވެ. އޭގެ އަށް އަހަރު ފަހުން ސީރީޒް އަލުން ފަށައި އަނެއްކާވެސް "ފެންޓާސްޓިކް ފޯ" ގެ ނަމުގައި މި އޮތީ ފިލްމެއް ނެރެފަ އެވެ.
މިފަހަރުގެ ފިލްމުގެ ތަރިންނަކީ މައިލްސް ޓެލާ އާއި ކޭޓް މާރާ އަދި މައިކަލް ބީ ޖޯޑަން އާއި ޖޭމީ ބެލް އެވެ.
ނަމަވެސް އާ ތަރިންނާއި އާ ޑައިރެކްޓަރަކާ އެކު ވެސް "ފެންޓާސްޓިކް ފޯ" މި ވަނީ ކޮމިކް ފޭނުންގެ މެދުގައި އެއަށް ލިބިފައިވާ އަސްލު މަގާމު ހޯދޭ ގޮތް ނުވެފަ އެވެ.
މި ފިލްމު އެނބުރި އައީ ވެސް ބޮޑު ބަޖެޓަކާ އެކުގަ އެވެ. ނަމަވެސް މިފަހަރު ވެސް އޮތީ ފިލްމު ފްލޮޕްވުމުގެ ފުރުސަތެވެ. ޖުމްލަ 120 މިލިއަން ޑޮލަރު ހޭދަކޮށްގެން އުފައްދާފައިވާ މި ފިލްމު މިދިޔަ ހުކުރު ދުވަހު ސިނަމާތަކަށް ނެރެފައިވާއިރު ފުރަތަމަ ދުވަހު ފިލްމަށް ލިބިފައި ވަނީ އެންމެ 11.3 މިލިއަން ޑޮލަރެވެ.
އަނެއްކޮޅުން ފިލްމަށް އަމާޒުވެފައިވާ ފާޑުކިޔުންތަކާ ހަވާލުވާން އޭގެ ޑައިރެކްޓަރު ޖޮޝް ޓްރޭންކް ބޭނުމެއް ނުވެ އެވެ. އޭނާ ބުނަނީ ފިލްމު މިހާ ގޯސްވީ އޭނާ ބުނި ގޮތަށް ސްޓޫޑިއޯ އިން ނެހެދީމަ ކަމަށެވެ.
މިފަހަރުގެ ފިލްމަށް އޭގެ ފުރަތަމަ ހަފުތާ ބަންދުގައި 40 މިލިއަން ޑޮލަރާއި 50 މިލިއަން ޑޮލަރާ ދެމެދުގެ އަދަދަކަށް ފައިސާ ލިބިފައިވާއިރު މިއީ 2005 ވަނަ އަހަރު ނެރުނު "ފެންޓާސްޓިކް ފޯ" އާއި 2007 ވަނަ އަހަރު ނެރުނު އޭގެ ސީކުއެލްގެ ފެށުމަށް ވުރެ ވެސް ދަށް ފެށުމެކެވެ.
ކޮންމެ ގޮތަކަށް ފިލްމުގެ ވިޔަފާރި ދިޔަޔަސް މިފަހަރު ވެސް ސީކުއެލް ފިލްމެއް އުފެއްދުމުގެ ހިޔާލު ޓުވެންޓިއަތު ސެންޗުރީ ފޮކްސް އިން އެބަ ގެންގުޅެ އެވެ. އެގޮތުން މި ފިލްމުގެ ދެ ވަނަ ބައި 2017 ވަނަ އަހަރުގެ ޖޫން މަހު ނެރޭނެކަން މިހާރު ވެސް ވަނީ އިއުލާނުކޮށްފަ އެވެ.