ސައިކަލަކުން ވެއްޓި އަންހެނަކު މަރުވެއްޖެ އެވެ.
ބާރު ސްޕީޑުގައި ދުއްވި ސައިކަލެއް ކަހާލައިގެން ވެއްޓުމާއި ގުޅިގެން ލިބުނު އަނިޔާތަކެއްގައި މަރުވެފައިވަނީ ސައިކަލް ދުއްވި ނ. ކެނދިކުޅުދޫއަށް ނިސްބަތްވާ އުމުރުން 40 އަހަރުގެ ސަމްސިއްޔާ ޔޫސުފެވެ.
ސަމްސިއްޔާ މަރުވީ ކެނދިކުޅުދޫ ސިއްހީ މަރުކަޒުގައި ފަރުވާ ދެމުން ދަނިކޮށް މިރޭ އިރާކޮޅު 7:00 ވެސް ޖެހި ފަހުންނެވެ.
ކެނދިކުޅުދޫ ކައުންސިލުން ބުނި ގޮތުގައި ސަމްސިއްޔާ އެ ރަށުގެ ކެނދިކޮޅު އަވަށުން ކުޅުދޫ އަވަށަށް ދާން ދުއްވަނިކޮށް ސައިކަލް ކަހާލައިގެން ވެއްޓިފައިވަނީ މިރޭ އިރުއޮއްސުނު ވަގުތު އެވެ. ސައިކަލް ކަހާލައިގެން ވެއްޓި ޒަހަމްވުމާ ގުޅިގެން އޭނާގެ ހަށިގަނޑުން ގިނަ އަދަދަކަށް ލޭ ފައިބާފައިވެ އެވެ. އޭނާ މަރުވީ އެކްސިޑެންޓްގައި ބޮލަށް ލިބުނު ގެއްލުންތަކާއި ގުޅިގެނެވެ.
ސަމްސިއްޔާގެ މަރާއި ގުޅޭގޮތުން ކެނދިކުޅުދޫ ސިއްހީ މަރުކަޒު ވަކި އެއްޗެއް ބުނެފައެއް ނުވެއެވެ.
ސަމްސިއްޔާ މަރުވިއިރު އޭނާގެ ކުޑަ ދެ ކުއްޖަކާއި ފިރިއަކު ވެސް ހުރެއެވެ.