ހުޅުމާލޭ ސެންޓްރަލް ޕާކް ސަރަހއްދުގައި ނުރައްކާތެރިކޮށް ދުއްވި ކާރަކުން ޖެހި މީހަކު މަރުވި ހާދިސާގައި ކާރު ދުއްވަން އިން މީހާގެ މައްޗަށް ދައުވާކުރަން ފޮނުވައިފި އެވެ.
މިއެކްސިޑެންޓާ ގުޅިގެން ފުލުހުން ހައްުޔަރުކުރީ ކާރު ދުއްވަން އިން ސ. ހިތަދޫ، ވައިލެޓްފެހި، މުހައްމަދު ވިސާމު ސިދުގީ (26 އ) އެވެ.
ފުލުހުން މިއަދު ބުނީ އެކްސިޑެންޓުވި ކާރު ދުއްވަން އިން ވިސާމުގެ މައްޗަށް ދައުވާކުރުމަށް މި މަހުގެ 19 ވަނަ ދުވަހު ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާފައިވާ ކަމަށެވެ.
ވިސާމު ބާރު ބާރު ސްޕީޑުގައި ދުއްވި ސްޕޯޓްސް ކާރަކުން ޖެހި މަރުވީ ލ. އިސްދޫއަށް އުފަން އުމުރުން 23 އަހަރުގެ ހަސަން ސަމާހު އެވެ.
މި އެކްސިޑެންޓް ހިނގީ ސެޕްޓެމްބަރު ފަސްވަން ދުވަހުގެ ރޭ ދަންވަރު ހުޅުމާލެ ސެންޓްރަލް ޕާކް ކައިރިން ބާރު ސްޕީޑްގައި ދުއްވާފައި ދިޔަ ސްޕޯޓްސް ކާރެއް ހަސަން ސަމާހް ދުއްވަމުން ދިޔަ ސައިކަލްގެ ޖެހިގެންނެވެ.
ސަމާހް މަރުވީ އެކްސިޑެންޓާ ގުޅިގެން ފަރުވާ ދިނުމަށް ހުޅުމާލެ ހޮސްޕިޓަލަށް ގެންދިޔަތާ އިރުކޮޅެއް ފަހުން ކަމަށްވެ އެވެ.