އެމްޑީއެންގައި މަސައްކަތް ކުރި ފަރާތްތަކުގެ ލިސްޓެއް ހޯދަން އިދިކޮޅު ފަރާތްތަކުން ޔޫތު މިނިސްޓްރީގައި އެދިއްޖެ އެވެ.
އެމްޑީއެން މެންބަރުންގެ ލިސްޓެއް ހޯދަން އެދި ސިޓީއެއް ހިފައިގެން ޕީޕީއެމް - ޕީއެންސީ ކޯލިޝަން އިން މިއަދު ވަނީ މިނިސްްޓްރީގެ އޮފީސް ހުންނަ ވެލާނާގެއަށް ގޮސްފަ އެވެ. އެ ވަގުތު ގޮތުން އެ ދެ ޕާޓީއަށް ނިސްބަތްވާ އާންމު މެންބަރުންތަކެއް ވަނީ "ބޭން އެމްޑީއެން" ޖަހާފައިވާ ކަރުދާސްތަކެއް ހިފައިގެން އެ ސަރަހައްދުގައި އިހުތިޖާޖުވެސް ކޮށްފަ އެވެ.
އިދިކޮޅުގެ އެ ސިޓީގައި ބުނެފައި ވަނީ ޖެނުއަރީ 1، 2014 އިން ފެށިގެން މި މަހު އެއްވަނަ ދުވަހާ ހަމަޔަށް އެމްޑީއެންގައި މަސައްކަތް ކުރެއްވި ފަރާތްތަކުގެ ނަމާއި އައިޑީކާޑު ނަމްބަރާއި ދާއިމީ އެޑްރެސް އެނގޭނެ ލިސްޓެއް ލިބޭނެ ގޮތް ހަމަޖައްސައިދިނުމަށް އެދޭ ކަމަށެވެ. އެ ސިޓީ ހުށަހެޅުއްވީ މަހިބަދޫ ދާއިރާގެ މެންބަރު އަހުމަަދު ތޯރިގު އެވެ.
ސިޓީ ހުށަހެޅުމަށް ފަހު ނޫސްވެރިންނާ ވާހަކަ ދައްކަވަމުން ޕީޕީއެމްގެ ނައިބު ރައީސް ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ އެމްޑީއެން މަސައްކަތް ކުރަނީ އިސްލާމް ދީން ފޮހެލަން ކަމަށާއި އެފަދަ ޖަމާއަތެއްގެ އިސް މެންބަރެއްގެ ގޮތުގައި ސީޕީ މުހައްމަދު ހަމީދު މަސައްކަތް ކުރެއްވި ކަމަށް ފުލުހުން އެއްބަސްވެފައިވާ ކަމަށެވެ. އެހެންކަމުން އެ ޖަމާއަަތުގެ ހަގީގަތް ދިވެހިންނަށް އެނގެން ޖެހޭ ކަމަށެވެ،
"މިހާރުން މިހާރަށް އެމްޑީއެން އުވާލައި އޭގައި ހަރަކާތްތެރިވާ މީހުން މިއަދު ސަރުކާރުގެ ބޮޑެތި ވަޒީފާތަކުގެ މީހުން މިހާރުން މިހާރަށް ކަނޑާލެވެން ޖެހޭ. އަދި އެ މީހުންގެ މަސްލަހަތަށް ބެލެން ޖެހޭނެ. ދިވެހި ރައްޔިތުން އެދެނީ މި ގޮތް އެހެންވެ އަޅުގަނޑުމެން ޒިންމާ އަދާ މި ކުރަނީ،" ޝިޔާމް ވިދާޅުވި އެވެ.
ނޫސްވެރިންގެ ބައްދަލުވުން ކުރިޔަށް ދިޔަ އިރު ވެސް ޕީޕީއެމްގެ ސަޕޯޓަރުންތަކެއް އެމްޑީއެން އުވާލަން ގޮވާލާ އިހުތިޖާޖު ކުރި އެވެ. އެ އިހުތިޖާޖުގެ ބައިވެރިން ފަހަތަށް ޖައްސާފައި ވަނީ ފުލުހުން ގޮހެވެ،