ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން މި ސަރުކާރުން އުތުރުގައި ހިމާޔަތް ކޮށްފައިވާ ސަރަހައްދުތަކުގައި އުމްރާނީ ތަރައްގީ އާއި އާމްދަނީ ލިބޭނެ ކަންކަން ހިމެނޭ ގޮތަށް މަޝްރޫއެއް އަންނަ އަހަރުގެ ދައުލަތުގެ ބަޖެޓްގައި ހިމަނަން ނިންމާފައިވާ ކަމަށް އެންވަޔަރަމެންޓް މިނިސްޓަރު ޑރ. ހުސައިން ރަޝީދު ހަސަން މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާއަށް ހާޒިރުވެވަޑައިގެން މަކުނުދޫ ދާއިރާގެ މެންބަރު މުހައްމަދު ރައީ ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ހުސައިން ރަޝީދު ވިދާޅުވީ ގާނޫނުގައިވާ ގޮތުން އެ ސަރަހައްދުތައް ހިމާޔަތް ކުރުމަށްފަހު އެ ސަރަހައްދުތަކުގެ މެނޭޖްމަންޓް ޕްލޭނެއް ހަދަން ޖެހޭ ކަމަށެވެ. އެ ޕްލޭންގެ ތެރެއިން އެ ސަރަހައްދުގައި އިންވެސްޓްމަންޓް ކުރެވޭނެ ގޮތްތައް ހަމަޖެހިގެން ދާނެ ކަމަށް އޭނާ ވިދާާޅުވި އެވެ.
މިނިސްޓަރު ވިދާޅުވި ގޮތުގައި އަންނަ އަހަރުގެ ބަޖެޓްގައި ގްރީން ފަންޑަށް ޖަމާވެފައިވާ ފައިސާއިން ހިމާނަޔަތް ކުރެވިފައިވާ ސަރަހައްދުތަކުގެ މެނޭޖްމަންޓް ޕްލޭން ތަންފީޒުކޮށް، އެ ސަރަހައްދުތަކުގައި އުމްރާނީ ތަރައްގީގެ މަސައްކަތްތަކަކާއި އާމްދަނީ ލިބޭނެ ބައެއް މަސައްކަތްތައް ކުރެވިގެން ދާނެ އެވެ.
"ހިމާޔަތް ކުރެވިފައިވާ ސަރަހައްދުތަކުގައި ބައެއް އުމްރާނީ ތަރައްގީގެ މަޝްރޫއުތަކެއް ހިންގަން، އޭގެ ތެރޭގައި އެ ސަރަހައްދަށް ޒިޔާރަތް ކުރާ މީހުނަށް ވިޒިޓާސް ސެންޓަރެއް އެޅުމާއި އެ ތަންތަނުގައި މީހުނަށް މަޑުކޮށްލެވޭ ކަހަލަ ހިޔާވަހިކަން ގާއިމު ކުރުން ފަދަ މަސައްކަތްތައް ހިމެނޭ،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ސަރުކާރުގެ އަމާޒަކީ އަންނަ އަހަރުގެ ތެރޭގައި އެ މަސައްކަތްތައް ފެށި ވީހާ ވެސް އަވަހަށް އެ މަސައްކަތްތައް ނިންމުން ކަމަށެވެ.
ކޮންމެ އަތޮޅެއްގައި މަދުވެގެން އެއް ރަށާއި، އެއް ފަރާއި، އެއް ކަނޑޫފާ ރައްކާތެރިކުރުމަށް ރައީސް ސޯލިހު ވެވަޑައިގެންފައިވާ ރިޔާސީ ވައުދެކެވެ.
ހިމާޔަތް ކުރި އުތުރުގެ ސަރަހައްދުތައް
- ހއ. ބާރަށް ކުޅި
- ހއ. ގައްލަންދޫ ތިލަ
- ހއ. ކެލާ ޗަސްބިން
- ހއ. ބިލެތްދޫ ތިލަ
- ހދ. ފިނޭ ތިލަ
- ހދ. ކޭލަކުނު
- ހދ. ނޭކުރެންދޫ ކަނޑޫފާ
- ހދ. އިންނަފުށި
- ށ. ބޮލިއްސަފަރު
- ށ. ނާލާހުރާ
- ނ. ފޮއްދިއްޕަރު
- ނ. ބޮޑުޅައިމެންދޫ
- ނ. ކެނދިކުޅުދޫ ކަނޑޫފާ
- ނ. އޮރިމަސްތިލަ