ހުޅުމާލޭގެ ދެވަނަ ފިޔަވަހީގައި މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ހަދަމުންގެންދާ ފްލެޓްތަކަށް ކުރިމަތިލުމުގެ ފުރުސަތު އަނެއްކާޥެސް ހުޅުވާލައިފި އެވެ.
އެމްޕީއެލް އިން ހާމަކުރާ ގޮތުގައި މި ފްލެޓްތަކަށް އަލުން ކުރިމަތިލުމަށް ހުޅުވާލާފައިވަނީ ސަރުކާރުގެ ހިޔާ ޕްރޮޖެކްޓުގެ ފްލެޓްތަށް ދޫކުރާ އުސޫލާއި ޕޮއިންޓް ދޭ އުސޫލު އިސްލާހް ކުރުމަށްފަހުގައި ކަމަށެވެ. އަދި މި ފްލެޓްތަކަށް ކުރިމަތިލުމަށް އަލުން ހުޅުވާލައިފައި މިވަނީ މިދިޔަ މަހު އާންމުކުރި ފްލެޓް ލިބޭ މީހުންގެ ވަގުތީ ލިސްޓް ބާތިލް ކުރުމަށްފަހުގައި ކަމަށްވެސް އެމްޕީއެލް އިން ވަނީ ބުނެފަ އެވެ.
އެމްޕީއެލް އިން ބުނީ މި ލިސްޓު ބާތިލް ކޮށްފައިވަނީ އެ ކުންފުނީގެ ޑިރެކްޓަރުންގެ ބޯޑުން ބޭއްވި ބައްދަލުވުމެއްގައި ފްލެޓް ލިބޭ މީހުންގެ ޝާރުތުތައް އަލުން މުރާޖައާ ކުރުމަށް ގަބޫލު ކުރެވޭތީ ކަމަށެވެ. އެހެން ކަމުން އަލުން ފްލެޓަށް އެދުމުގެ ފުރުސަތު މިއަދުން ފެށިގެން މިމަހުގެ 24 ވަނަ ދުވަހުގެ ނިޔަލަށް ހުޅުވާލާފައިވާ ކަމަށްވެސް އެމްޕީއެލް އިން ވަނީ ބުނެފަ އެވެ. އަދި ކުރިން ފޯމު ހުށަހެޅި ފަރާތްތަކުންވެސް އަލުން ފޯމު ހުށަހެޅުމަށް އެމްޕީއެލް އިން ވަނީ ބުނެފަ އެވެ.
ހިޔާ މަޝްރޫއުގެ ދަށުން އެމްޕީއެލުން ގާއިމް ކުރުމަށް ހަމަޖެހިފައިވަނީ 14 ބުރީގެ ތިން ޓަވަރެވެ. ތިން ޓަވަރު ގައި އެއް ކޮޓަރީގެ 204 އެޕާޓްމަންޓާއި ތިން ކޮޓަރީގެ 330 އެޕާޓްމަންޓާއެކު ޖުމްލަ 534 އެޕާޓްމެންޓް ހިމެނޭނެ އެވެ. އެ މަސައްކަތް ހަވާލުކޮށްފައިވަނީ 560 މިލިއަން ރުފިޔާއަށް ސިންގަޕޫރުގެ ކުންފުންޏެއް ކަމަށްވާ ވެލެނޯބަލް އޯވަސީސްއާ އެވެ. އެކުންފުންޏާއި ހަވާލުކޮށްފައިވަނީ ފުރަތަމަ ފޭސްގެ މަސައްކަތް އަށް މަސް ދުވަހުގެ ތެރޭގައި ނިންމުމަށެވެ.