މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 10 ބުރީގެ އިމާރާތެއް އަޅަން ނިންމާ އެކަން ކޮށްދޭނެ ބަޔަކު ހޯދަން އިއުލާނުކޮށްފި އެވެ.
މި އޮފީސް އިމާރާތް އަޅަން ނިންމާފައި ވަނީ ހުޅުމާލެ ފުރަތަމަ ފިޔަވަހި، ފިތުރޯނު މަގުގަ އެވެ.
ކޮންޓްރެކްޓާގެ 100 ޕަސެންޓް ފައިނޭންސްގައި މި އިމާރާތުގެ މަސައްކަތް ކޮށްދޭން ޝައުގުވެރިވާ ފަރާތްތަކުން މިމަހުގެ 10 ވަނަ ދުވަހުގެ ހަވީރު 4:00 ގެ ކުރިން ޝައުގުވެރިކަންފާޅު ކުރުމަށް ވަނީ ހުޅުވާލާފަ އެވެ.
އެމްޕީއެލް އިން ލަފާކުރާ ގޮތުގައި މި އިމާރާތުގެ މަސައްކަތަށް 112 މިލިއަން ރުފިޔާ އާއި 161 މިލިއަން ރުފިޔާއާ ދެމެދުގެ ހަރަދެއް ހިނގާނެ އެވެ.
މި އިމާރާތް ނިމޭއިރު އެތަނުގައި ރެސްޓޯރަންޓާއި ރީޓެއިލް، ހެލްތު އެންޑް ވެލްނެސް އަދި މުނިފޫހިފިލުވުމުގެ ހަރަކާތްތައް ހިންގޭނެ ފެސިލިޓީތައް ހުންނާނެ ކަމަށް އެމްޕީއެލް އިން ބުނެ އެވެ. މީގެ އިތުރުން މި ތަނުގައި އޮފީސް ހިންގޭނެ ޖާގަ ހުންނާނެ ކަމަށްވެސް އެ ކުންފުނިން ބުނެ އެވެ.