ކުރީގެ ރައީސް މުހައްމަދު ނަޝީދުގެ ވެރިކަމުގައި ފެށި "ވެށިފަހި މާލެ" މަޝްރޫއުގެ ދަށުން ހުޅުމާލެ އިން ބޯހިޔާ ވަހިކަން ބޭނުން ވެގެން މާލޭން ދޫކޮށްލި ބިންތަކުގައި ޕާކިން އާއި ގްރީން ޕާކް އަދި ބިންތައް ގަތުމުގެ ފުރުސަތު ހުޅުވާލަން ސޯޝަލް ކައުންސިލުން ނިންމައިފި އެވެ.
ސޯޝަލް ކައުންސިލުގެ ބައެއް ނިންމުންތައް ރައްޔިތުންނާ ހިއްސާ ކުރުމަށް ރައީސް އޮފީހުގައި މިއަދު ބޭއްވި ނިއުސް ކޮންފަރެންސުގައި ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ ވެށިފަހި މާލެ މަޝްރޫއުގެ ދަށުން މާލޭން 507 ބިމެއް ހުސްވެފައިވާ ކަމަށާއި މި ބިންތަކާ މެދު އަމަލު ކުރާނެ އުސޫލެއް ނިންމާފައިވާ ކަމަށެވެ.
"މި ގޮތަށް ދޫކޮށްލި ބިން ނުވަތަ ބިންތަކާ މެދު އަމަލު ކުރާނެ ގޮތެއް ސަރުކާރުން ނުނިންމާ. އެހެން ނަމަވެސް ސޯޝަލް ކައުންސިލުން މަޝްވަރާކޮށް އެކަމާ ބެހޭ ދިރާސާ ރިޕޯޓެއް ވަނީ އެކުލަވާލާފަ. މި ހުރިހާ ތަންތަނަށް ޒިޔާރަތްކޮށް ބަލައި ވަރަށް ތަފްސީލް ދިރާސާއެއް ހެދުމަށްފަހު، މަޝްވަރާ ކުރެވި މި ބިންކޮޅުތަކާ މެދު އަމަލު ކުރާނެ އުސޫލެއް ވަނީ ކަނޑައަޅާފައި،" މުއިއްޒު ވިދާޅުވި އެވެ.
މިނިސްޓަރު ވިދާޅުވީ މިގޮތަށް ސަރުކާރަށް ދޫކޮށްލާފައިވާ ބިންކޮޅުތަކުގެ ތެރޭގައި 50 އަކަފޫޓާއި 1،000 އަކަފޫޓަށް ވުރެ ބޮޑެތި ބިންތައް ހިމެނޭ ކަމަށެވެ.
" އެ ބިންކޮޅަކީ ވަކިން އިމާރާތެއް ކޮށްގެން ބޭނުމެއް ހިފޭ ވަރަކަށްވުރެ ކުޑަ ބިންކޮޅެއް ނަމަ އެ ބިންކޮޅެއް ދެން ތިބި ބެހެނި ވެރިންނަށް ގަތުމުގެ ފުރުސަތު ވެސް އޮންނާނެ. މިސާލަކަށް ގޯތީގެ ތެރޭގައި ވަކިން އިންނަ ތަންކޮޅެއް ދޫކޮށްލާފަ އެ ފަރާތެއް ހުޅުމާލެ ފްލެޓަކަށް ބަދަލުވީ އެ ބިންކޮޅު އަޅުގަނޑުމެންނަށް ބޭނުން ނުހިފޭނަމަ، އެ ގޯތީގެ އެހެން ބެހެނިވެރިންނަށް ގަތުމުގެ ފުރުސަތު ލިބޭނެ. މިކަން ކުރުމަށް ގާނޫނަށްވެސް ބަދަލުތަކެއް ގެންނަން ޖެހޭ،" މިނިސްޓަރު ވިދާޅުވި އެވެ.
ހައުސިން މިނިސްޓަރު ވިދާޅުވީ މިގޮތަށް ބިންކޮޅު ހުސްވެފައިވާ ސަރަހައްދަކީ މާބޮޑަށް ތޮއްޖެހިފައިވާ ސަރަހައްދެއްނަމަ އެ ބިމެއްގައި ޕާކާއި ގްރީން އޭރިޔާ ހަދާނެ ކަމަށެވެ.
"މިގޮތަށް ކަނޑައަޅާނީ މަގާ ވާގޮތަށް ހުންނަ ތަންތަން. މީގެ އިތުރުން ވެހިކަލް ޕާކު ކުރެވޭ ތަންތަން ވެސް ހެދޭނެ. ޕާކިން ހަދާއިރު ވިސްނަނީ ބޭރުގެ ގައުމުތަކުގައި ހުންނަ ގޮތަށް އެ ތަންތަނުގައި ބެހެއްޓޭ ޕާކިން ސިންޓަމް ގެންނަން. އޭގެ ބޭނުން ހިފައިގެން ގެނެސް ބަހައްޓަން. ޕާކިން ސިސްޓަމްތައްވެސް ހެދޭނެ،" މުއިއްޒު ވިދާޅުވި އެވެ.
މިނިސްޓަރު ވިދާޅުވީ މީގެ އިތުރުން ސްޓެލްކޯ އާއި އެމްޑަމްލިޔުއެސްސީ އިން މަގުމަތީގައި ބަހައްޓާފައި ހުންނަ ތަންތަންވެސް މިފަދަ ހުސް ބިންތަކަށް ބަދަލު ކުރެވޭނެ ކަމަށެވެ.
"ޔުޓިލިޓީސްތައް ވެސް މި ތަންތަނަށް ބަދަލު ކޮށް މަގު ހުސްކޮށްލެވޭނެ. މީގެން ކޮންމެ ބިމެއްގެ ޑީޓެއިލް ފިޒިކަލް ސާވޭއެއް ހަދާނީ،" މިނިސްޓަރު މުއިއްޒު ވިދާޅުވި އެވެ.