މިއަހަރު ނިމެން އެންމެ މަހަކަށް ވެފައިވާއިރު ފާއިތުވާ ނޮވެމްބަރުމަހު ވެސް ވަރަށް ގިނަ ފިލްމުތަކެއް ރިލީޒްކޮށްފައި ވެއެވެ. އޭގެ ތެރޭގައި "އުޖްޅާ ޗަމަން"، "ބާލާ"، "މަރްޖާވާން" އަދި "ޕާގަލްޕަންތީ" ހިމެނެ އެވެ. ނަމަވެސް މީގެން ގިނަ ފިލްމުތަކަށް މާ ރަނގަޅު ކާމިޔާބެއް ނުލިބުނެވެ.
މިހާރު ގިނަ ބަޔަކު އިންތިޒާރު ކުރަމުންދަނީ ޑިސެމްބަރު މަހު ނިކުންނާނެ ފިލްމުތަކަށެވެ. އަހަރުގެ އެންމެ ފަހު މަހަށް ވެފައި އާއްމުކޮށް ޑިސެމްބަރަކީ ވަރަށް ރީތި ގިނަ ފިލްމުތަކެއް ރިލީޒްކުރާ މަހަކަށް ވާތީ މިފަހަރު ވެސް ވަރަށް މޮޅު ފިލްމުތަކެއް ރިލީޒް ކުރަން އެބަހުއްޓެވެ. އޭގެ ތެރެއިން ވެސް ކޮންމެހެން ބަލާލަން ރަނގަޅު ފަސް ފިލްމެއް އެބައޮތެވެ.
ޕަތީ ޕަތުނީ އައުރް ވޯ
ޑިސެމްބަރު ހަވަނަ ދުވަހު ރިލިޒްކުރާ "ޕަތީ ޕަތުނީ އައުރް ވޯ" އަކީ 1978 ގައި ބީއާރް ޗޯޕްޅާ އުފެއްދި ހަމަ މި ނަން ކިޔާ ފިލްމުގެ ރިމޭކް އެކެވެ. އޮރިޖިނަލް ފިލްމުގެ ތަރިންނަކީ ސަންޖީވް ކުމާރާއި ވިދްޔާ ސިންހާ އަދި ރަންޖީތާ ކޯރް އެވެ. އެ ފިލްމު ރިލީޒްކުރިތާ 40 އަހަރު ފަހުން ހަމަ އެ ނަމުގައި އުފެއްދި ފިލްމުގެ ތަރިންނަކީ ކާރްތިކް އާރްޔަން އާއި ބޫމީ ޕަޑްނޭކަރް އަދި އަނަންޔާ ޕާންޑޭ އެވެ. ފިލްމުގެ "ދީމޭ ދީމޭ" އާއި "އަކިޔޯން ސޭ ގޯލީ މާރޯ" އަކީ ވެސް ރިމޭކް ލަވަ ތަކެކެވެ. މި ފިލްމުގައި ކާރްތިކް ކުޅެނީ ޗިންޓޫ ތިޔާގީގެ ރޯލެވެ. ބޫމީ ކުޅެނީ ޗިންޓޫގެ އަނބިމީހާގެ ރޯލެވެ. އަނަންޔާ އަކީ ސިއްރު ލޯބިވެރިޔާ އެވެ.
ޕާނީޕާތު
"ޕާނީޕަތު"ވެސް ރިލީޒްކުރަނީ "ޕަތީ ޕަތުނީ އައުރް ވޯ" އާ އެއް ދުވަހެއްގަ އެވެ. މިއީ ކުރީ ޒަމާނުގެ ފިލްމުތައް އުފެއްދުމުގައި ވަރަށް އަރާހުރި ޑައިރެކްޓަރެއް ކަމަށްވާ އަޝޫތޯޝް ގޮވަރްކަރްގެ ފިލެމެކެވެ. މި ފިލްމުގައި ސަންޖޭ ލީލާ ބާންސާލީގެ ފިލްމުތަކުގައި ހުންނަ ކަހަލަ ޝާހީ ގޮތްތަކެއް އެބަހުއްޓެވެ. ސަންޖޭ ދަތާއި އަރްޖުން ކަޕޫރު އަދި ކްރީތީ ސަނަން ލީޑް ރޯލު ކުޅޭ މި ފިލްމަކީ އިންޑިއާގައި ކުރީ ޒަމާނުގައި ކުރެވުނުކަމަށް ބުނާ ވަރަށް ވަރުގަދަ ހަނގުރާމައެއްގެ ވާހަކައިގެ ސަފުހާ ތަކެކެވެ.
މަރްދާނީ 2
"މަރްދާނީ 2" އަކީ ރާނީ މުކަރުޖީ ބަތަލާގެ ރޯލު ކުޅޭ ފިލްމެކެވެ. އަންނަ ޑިސެމްބަރު13 ވަނަ ދުވަހު ރިލީޒްކުރަން ހަމަޖެހިފައިވާ މި ފިލްމަކީ "މަރްދާނީ"ގެ ސީކުއަލް އެކެވެ. މި ފިލްމުގައި ރާނީ ކުޅެނީ ޝިވާނީ ޝިވާޖީ ރޯއީ ކިޔާ ފުލުސް އިނިސްޕެކްޓަރެއްގެ ރޯލެވެ. މި ފިލްމުގައި ރާނީގެ ކެރެކްޓާ މަސައްކަތްކުރަނީ 21 އަހަރުގެ ސީރިއަލް ރޭޕިސްޓެއް ހައްޔަރުކުރާށެވެ. ފިލްމު ކުޅެފައިވަނީ ކޯޓާ، ރާޖަސްތާނުގަ އެވެ. ފިލްމުގެ ޓްރެއިލާ ރިލިޒްކޮށްފައިވާއިރު ބެލުންތެރިން ވަނީ ޓްރެއިލާ ވަރަށް ކަމުދާކަމަށް ބުނެފަ އެވެ. އަދި ގައިން ހީބިހި ނަގައިގެންދާ ވަރުގެ ރޯލެއް ރާނީ މި ފިލްމުގައި ކުޅެފައި ވެއެވެ.
ދަބަންގް 3
ސަލްމާން ޚާންގެ "ދަބަންގް 3" ރިލީޒްކުރަން ހަމަޖެހިފައިވަނީ ޑިސެމްބަރު 20 ވަނަ ދުވަހު އެވެ. ސަލްމާންގެ ފޭނުންނަށް އެމީހުންގެ ފޭވަރިޓް ޗުލްބުލް ޕާންޑޭ ތިން ވަނަ ފަހަރަށް މި ފިލްމުން ފެންނާނެ އެވެ. ކުރީގެ ފިލްމުތަކުން ފެނުނު "މުންނީ ބަދުނާމް ހުއީ" އާއި "ފެވިކޯލް"ފަދަ ލަވަތައް މި ފިލްމުން ނުފެނުނަސް "މުންނާ ބަދުނާމް" ޔަގީނުންވެސް މި ފިލްމުން ފެންނާނެ އެވެ. ފިލްމުގައި ސަލްމާންގެ އިތުރުން ސޮނާކްޝީ ސިންހާ، މާހީ ގިލް އަދި އަރްބާޒް ޚާން ވެސް ކުރީގެ ފިލްމުތަކުގައި އަދާކުރި ބައިތަކުން ފެންނާނެ އެވެ. އަދި މި ފިލްމުން މުޅިން އަލަށް ތައާރަފްވާ އެކްޓަރުންގެ ތެރޭގައި ކިއްޗާ ސުދީޕް އާއި ސައީ މަންޖްރޭކަރް އަދި ޕްރަމޯދް ކަންނާ ހިމެނެ އެވެ.
ގުޑް ނިއުޒް
ޑިސެމްބަރު 27 ވަނަ ދުވަހު ރިލީޒްކުރާ "ގުޑް ނިއުޒް" އަކީ ވެސް ބަލާލަން ވަރަށް ރަނގަޅު ފިލްމެކެވެ. އަކްޝޭ ކުމާރާއި ކަރީނާ ކަޕޫރު އަދި ކިއާރާ އަދުވާނީ އާއި ދިލްޖީތު ދޮސާންޖްގެ "ގުޑް ނިއުޒް" އަކީ އަހަރުގެ ވެސް އެންމެ ބޮޑު އޮޅުންބޮޅުން އޮންނަ ފިލްމެވެ. ފިލްމު ބިނާކޮށްފައިވަނީ ދެ ޖޯޑެއްގެ ދިރިއުޅުމަށެވެ. އެތަނުން އެއް ޖޯޑަކީ ވަރުން އާއި ދީޕްތީ އެވެ. އަނެއް ޖޯޑަކީ ހަނީ އާއި މޮނިކާ އެވެ. އައިވީއެފް ހަދައިގެން ދަރިން ހޯދައިގެން މަސައްކަތް ކުރާ މި ދެ ޖޯޑަށް ދިމާވާ ހެއްވާ މަޖާ ހާދިސާތަކެއް މި ފިލްމުން ފެންނާނެ އެވެ. މިއީ ދަރިން ނުލިބިގެން އައިވީއެފް ހަދާ މީހުންނާ ބެހޭ ގޮތުން ވަރަށް ރަނގަޅު މައުލޫމާތުތަކެއް ލިބޭނެ ފިލްމެކެވެ.