ކޮރަޕްޝަނަށް މަގުފަހިވާގޮތަށް އެތައް ޕްރޮޖެކްޓްތަކެއް މިދިޔަ ސަރުކާރުން ހިންގާފައިވާ ކަމަށް ބުނެ ރައީސް މައުމޫންގެ މޯލްޑިވްސް ރިފޯމް މޫވްމަންޓް (އެމްއާރުއެމް) ން ކުރީގެ ރައީސް އަބްދުﷲ ޔާމީންގެ ސަރުކާރަށް ވަރަށް ބޮޑަށް ފާޑު ކިޔައިފި އެވެ.
އެމްއާރުއެމުން، ރައީސް ޔާމީންގެ ސަރުކާރަށް ފާޑުކިޔާފައިވަނީ ދުނިޔޭގެ އެންޓި-ކޮރަޕްޝަން ދުވަހާއި ގުޅިގެން ނެރުނު ބަޔާނެއްގައެވެ. މި ބަޔާނުގައި ރައީސް ޔާމީންގެ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުކިޔާ، ރައީސް ސޯލިހްގެ ސަރުކާރުގެ ސިޔާސަތުތަކަށް ވަނީ ވަރަށް ބޮޑަށް ތައުރީފު ކޮށްފައެވެ.
އެ ބަޔާނުގައި ބުނެފައިވަނީ ބައިނަލްއަގްވާމީ އެންޓި ކޮރަޕްޝަން ދުވަސް ފާހަގަކުރަމުން ދާއިރު، ކޮރަޕްޝަންގެ އަމަލުތައް ހުއްޓުވުމަށް ސަރުކާރުގެ މުއައްސަސާ ތަކުންނާއި އާންމު ފަރުދުން އާ އާޒުމެއް ކަނޑައަޅަން ޖެހިފައިވާ ކަމަށެވެ.
ގާނޫނުއަސާސީގެ ދަށުން އުފައްދާފައިވާ މިނިވަން މުއައްސަސާތައް މުސްތަގިއްލު އަދި ޒިންމާދާރު ގޮތެއްގައި ހަރަކާތްތެރިވުމަށް ބާރުއެޅުމަށް ގާނޫނު އަސާސީގައިވީނަމަވެސް ވޭތުވެ ދިޔަ އަހަރުތަކުގައި ކަންކަން ނިމިގެން ގޮސްފައިވަނީ، ވަކި މީހަކު ބުނާގޮތަކަށް ކަމީ ގިނަބަޔަކު ގަބޫލުކުރާ ހަގީގަތެއް ކަމަށް އެބަޔާނުގައިވެއެވެ.
"ގާނޫނުއަސާސީން ކަނޑައަޅާފައިވާ ލާމަރުކަޒީ އުސޫލުން ސިޓީތަކާއި އަތޮޅުތަކާއި ރަށްރަށް ހިންގުމުގައި ލިބެންޖެހޭ ބާރުތައް އޭގެ އެންމެ ފުރިހަމަ ގޮތުގައި ކައުންސިލްތަކާއި ރައްޔިތުންނަށް ހޯދައިދިނުމަށް ގާނޫނުއަސާސީގައި ބުނެފައިވާއިރު، އެ ބާރުތައް ނިމިދިޔަ ސަރުކާރުގައި ވަނީ ވަރަށް ބޮޑަށް ހިފެހެއްޓިފައި. މިކަން މިހެން އޮއްވާ މިހާރުގެ ސަރުކާރުން އެ ބާރުތައް ކައުންސިލްތަކަށް ދެއްވައި، އަދި ލާމަރަކުޒީ ގާނޫނަށް ބޭނުންވާ އިސްލާހުތައް ދާދި ފަހުން ރައްޔިތުންގެ މަޖިލީހުން ފާސްކުރައްވާ އަދި އެބިލު ރައީސުލްޖުމްހޫރިއްޔާ ވަނީ ތަސްދީގު ކުރައްވާފައި. މިކަމަކީ، މިސަރުކާރުން ކޮރަޕްޝަން ހުއްޓުވުމަށް މަސައްކަތް ކުރައްވާކަމުގެ ޔަގީންކަން ދިވެހިރައްޔިތުންނަށް ލިބިގެން ދިޔަކަމެއް." އެމްއާރުއެމްގެ ބަޔާނުގައިވެއެވެ.
އެމްއާރުއެމުން ބުނީ ދައުލަތުގެ ބަޖެޓުގައި ނުހިމެނޭ އެތައް ޕްރޮޖެކްޓެއް ނިމިދިޔަ ސަރުކާރުގައި ހިންގާފައި ވާއިރު، އެފައިސާ ހޯދައިފައިވަނީ ކިހިނެއްތޯ ބަލައި، ޒިންމާވާން ޖެހޭ ފަރާތްތައް އެކަމުގެ ޒިންމާ އެންމެ ފުރިހަމަ ގޮތުގައި ނަންގަވާފައިވާ ނުވާއިރު ކޮރަޕްޝަނަށް މަގުފަހިވާގޮތަށް އެތައް ޕްރޮޖެކްޓްތަކެއް ހިންގާފައިވާ ކަމަށެވެ. ނަމަވެސް މިހާރުގެ ސަރުކާރުން އެކަން ކަން ބަލައިި ފިޔަވަޅު އެޅުމަށް މަސައްކަތް ކުރައްވަމުން ގެންދާ ކަމަށާ މިހާރުވެސް ބައެއް މައްސަލަ ތަކުގައި ފިޔަވަޅު އެޅިފައިވުމީ ސަރުކާރުން ކޮރަޕްޝަނާއި ދެކޮޅަށް މަސައްކަތް ކުރަމުން ގެންދާ ކަމުގެ ހެއްކެއް ކަމަށެވެ.
"ހަމައެހެންމެ، ގުޅިފައިވާ ސިޔާސީ ޕާޓީ ތަކުގެ މެނިފެސްޓޯގައި ކޮރަޕްޝަން ހުއްޓުވުމަށް ކުރަން ނިންމާފައިވާ މަސައްކަތްތައް، ވީ އެންމެ އަވަހަކަށް ތަންފީޒުވެގެން ދިއުމަކީ ދިވެހި ރައްޔިތުންގެ އެންމެ ބޮޑު އެއް އުންމީދު. އެމްއާރުއެމް އަކީ އަބަދުވެސް ކޮރަޕްޝަނާ ދެކޮޅަށް އަޑުއުފުލާނެ ޕާޓީއެއް. އެގޮތުން، ވޭތުވެ ދިޔަ ސަރުކާރުގައި އެމްއާރްއެމް ގެ އިސްވެރިން ގާނޫނާ ހިލާފަށް ބަންދުކޮށް، ޖަލަށްލައި، އެބޭފުޅުންނަށް އެތައް އަނިޔާއެއް ދީފައިވަނީ، ކޮރަޕްޝަނާ ދެކޮޅަށް ދިވެހި ރައްޔިތުންގެ ހައްގުގައިގައި ވަކާލާތު ކުރެއްވުމުން. މިއީ ބަދަލު ނުކުރެވޭނޭ ހަގީގަތެއް."
މި ސަރުކާރުގެ އެންމެ މުހިންމު ސިޔާސަތަކީ "ޒީރޯ ޓޮލަރެންސް ޓު ކޮރަޕްޝަން" ކަން ފާހަގަކޮށް އެމްއާރްއެމްގެ ބަޔާނުގައި ވަނީ ސަރުކާރުގެ ކޮންމެ މަގާމެއްގައި ހުރި މީހަކު ނަމަވެސް ކޮރަޕްޝަންގެ އަމަލެއް ހިންގުމަށް ފުރުސަތު ނުދޭނެ ކަމުގެ ޔަގީންކަން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ދެއްވާފައިވާކަމީ، މިސަރުކާރުން ކޮރަޕްޝަނާ ދެކޮޅަށް ހުއްޓުމެއް ނެތި މަސައްކަތް ކުރައްވާނެ ކަމުގެ ވަރުގަދަ އިންޒާރެއްކަން ފާހަގަކޮށްފައެވެ.