އިނގިރޭސި ޕްރިމިއާ ލީގްގައި އަދިވެސް އޭނާ އަށް މޮޅަށް ކުވިދާނެ ކަމަށް ޑާބީ ކައުންޓީއަށް ކުޅެން އެއްބަސްވެފައިވާ ވޭން ރޫނީ ބުނެފި އެވެ.
އިނގިރޭސި ވިލާތުގެ ޑީސީ ޔުނައިޓަޑަށް ދެ އަހަރު ވަންދެން ކުޅުނު ރޫނީ، އިނގިރޭސި ޗެމްޕިއަންޝިޕްގައި ވާދަ ކުރާ ޑާބީ ކައުންޓީއަށް ބަދަލު ވާނީ ޖަނަވަރީ މަހު ޓްރާންސްފާގެ ޕީރިއަޑް ހުޅުވާލުމުންނެވެ.
އިނގިރޭސި ޕްރިމިއާ ލީގުން ރޫނީ ކުޅުނީ އޭނާގެ ބޯއީހުޑް ކުލަބު އެވަޓަން އަށާއި މެންޗެސްޓާ ޔުނައިޓަޑަށެވެ. އެ ދެ ކުލަބާއެކު ޕްރިމިއާ ލީގްގައި 208 ލަނޑު ރޫނީ ކާމިޔާބު ކުރި އެވެ. އޭނާ ބުނީ ދެ ވަނަ ފަހަރަށް އެޓަންއަށް ބަދަލުވެ ދެއްކުނު ކުޅުމާއެކު އަދިވެސް އޭނާ އަށް އިނގިރޭސި ލީގްގައި މޮޅަށް ކުޅެވިދާނެ ކަމަށް ގަބޫލު ކުރެވުނު ކަމަށެވެ.
"އަހަންނާއެކު ރަނގަޅު ޓީމެއް އޮންނަނަމަ އަހަރެން މޮޅަށް ކުޅޭނަން." ރޫނީ ބުންޏެވެ. އޭނާ ބުނީ އަމާޒަކީ ޑާބީ ކައުންޓީ ޕްރިމިއާ ލީގަށް ކޮލިފައި ކޮށްދިނުން ކަމަށެވެ. ޑާބީ ކައުންޓީއަށް އޭނާ ބަދަލު ވަނީ ޕްލޭއާ ކޯޗެއްގެ ގޮތުގަ އެވެ.
"އެންމެ މުހިންމު ކަމަކީ ފުޓްބޯޅަ ރަނގަޅަށް އެނގުން،" ރޫނީ ބުންޏެވެ. "ފުޓްބޯޅައަކީ ބޯޅަ ހޯދަން ފަހަތުން ދުވުމެއް ނޫން، ފުޓްބޯޅައަކީ ސިކުނޑިން ވިސްނައިގެން ކުޅޭ ގޭމެއް."
"އަހަރެން ކުޅުނު ދެ ކުލަބު މެންޗެސްޓާ ޔުނައިޓަޑާއި އެވަޓަން އޮތް ހިސާބަށް [ޕްރިމިއާ ލީގަށް] ޑާބީ ގެންދަން އަހަރެން ބޭނުންވޭ."