ރީތި ނަމްބަރުތައް ހުރި ހަނދާނީ ނޫޓްތައް ލައްކައަކަށް ވުރެ މަތިން ނީލަން ކިޔައިފި

ރީތި ސީރިއަލް ނަމްބަރުތައް ހުރި މިނިވަން 50 ގެ ހނަދާނީ ނޫޓްތައް އެއްލައްކަ ރުފިޔާ އަށް ވުރެ ބޮޑެތި އަގުތަކެއްގައި މަރުކަޒީ ބޭންކް، އެމްއެމްއޭ އިން ރޭ ނީލަން ކިޔައިފި އެވެ.

"އަވަސް" އަށް އެނގިފައިވާ ގޮތުގައި ނައިބު ރައީސް އަހުމަދު އަދީބު ވެސް ބައިވެރިވެވަޑައިގަތް ރޭ ހޮޓެލް ޖެންގައި ކުރިއަށް ގެންދިޔަ ނީލަމުގައި ހަތަރު ގެޓަގަރީއަކަށް ބަހާލައިގެން 30 އަށްވުރެ ގިނަ ސީރިއަލް ނަމްބަރު ނީލަން ކިޔާފައިވެ އެވެ.

ރާއްޖޭގެ ބައެއް ވިޔަފާރިވެރިންނާއި ރާއްޖޭގައި އިންވެސްޓް ކޮށްގެން ތިބި ބައެއް ބޭރުގެ ފަރާތްތައް އަދި މަޖިލީހުގެ މެންބަރުންނާއި ސަރުކާރުގެ އެކި މަގާމުތައް ފުރުއްވާ ބޭފުޅުން ބައިވެރިވި، އެ ނީލަމުގައި ރީތި ސީރިއަލް ނަމްބަރުތަކުގެ ނީލަން ފެށޭ އަގުގެ ގޮތުގައި އެމްއެމްއޭ އިން ކަނޑައަޅާފައި އޮތީ 100،000ރ. އެވެ.

މީޑިއާތަކަށް ނުވަދެވޭ ގޮތަށް ބޭއްވި އެ ނީލަމަށް ވަޑައިގަތް ބޭފުޅުން ވަނީ 100،000ރ. އަށް ވުރެ ބޮޑެތި އަގުތަކުގައި ނޫޓްތައް ބައްލަވައިގެންފައި ކަމަށް ނީލަމުގައި ބައިވެރިވި ބޭފުޅަކު ވިދާޅުވި އެވެ. އޭނާ ވިދާޅުވި ގޮތުގައި އެންމެ ބޮޑު އަގުގައި ވިކިފައި ވަނީ 000001 ގެ ސީރިއަލް ނަމްބަރު ނޫޓެވެ. އެހެން ނަމަވެސް އެ ނޫޓް ވިކުނީ ކިހާވަރަކަށް ކަން ސާފުވާ ގޮތެއް ނުވި އެވެ. ރޭ ދެން ނީލަން ކީ ނޫޓްތަކުގައި ހުރި ސީރިއަލް ނަމްބަރު ތަކަކީ 123 އާއި 3030 ކަހަލަ ރީތި ނަމްބަރުތަކެވެ.

އެ ނީލަމާ ގުޅޭ އެއްވެސް މައުލޫމާތެއް ހާމަކުރެވެން ނެތް ކަމަށް އެމްއެމްއޭ އިން ވަނީ ބުނެފަ އެވެ.

މިނިވަން 50 އަށް ހާއްސަކޮށްގެން ނެރުނު 5،000ރގެ ހަދާނީ ނޫޓް ވިއްކަމުން އަންނަނީ 7،500ރ. އަށެވެ. އެ ނޫޓް އެމްއެމްއެމްއޭ އާއި އެއާޕޯޓްގެ ޑިއުޓީ ފްރީ އަދި ބައެއް ރިސޯޓްތަކުގައި ވަނީ ވިއްކަން ބަަހައްޓައިފަ އެވެ. މިނިވަން 50ގެ 3،000 ނޫޓް ވިއްކުމަށް ވަނީ ހަމަޖެހިފަ އެވެ.

މިހާރު ބޭނުން ކުރާ ނޫޓްތަކާ ތަފާތުތަކެއް ހުރި އެ ނޫޓް ވެސް ޑިޒައިން ކޮށްފައި ވަނީ އަންނަ އޮކްޓޯބަރު މަހު ބޭނުންކުރަން ފަށާ ދިވެހި ފައިސާގެ އާ ނޫޓުތައް ވެސް ޑިޒައިންކުރި އަބްދުﷲ ނަޝާތު އެވެ. ހަދާނީ ނޫޓް މިހާރުގެ ނޫޓްތަކަށް ވުރެ ތަންކޮޅެއް ބޮޑުކޮށް ޗާޕްކޮށްފައި ހުރި އިރު ޑިޒައިން ވެސް ވަރަށް ތަފާތެވެ.

މީގެ ކުރިން މިނިވަން ކަމުގެ ދުވަހާ ގުޅުވައިގެން ރަން ފައިސާ ފޮއްޗެއް ނެރެފައިވެ އެވެ. ނަމަވެސް މިއީ ހަދާނީ ނޫޓެއް ނެރޭ ފުރަތަމަ ފަހަރެވެ. ބޭރު ގައުމުތަކުގައި ވެސް މިނިވަންކަމުގެ މުނާސަބާއާ ގުޅުވައިގެން ހާއްސަ ނޫޓް ނެރެއުޅެ އެވެ.