ސްރީލަންކާގެ ދެ ބޭންކް އަކުން ރާއްޖޭގެ ހޯކްސް ކުންފުންޏަށް 12 މިލިއަން ޑޮލަރު (ގާތްގަނޑަކަޑް 185,4 މިލިއަން ރުފިޔާ) ގެ ލޯނު ފެސިލިޓީއެއް ހަމަޖައްސައިދީފި އެވެ.
ރާއްޖޭގައި ތެޔޮ ސަޕްލައި ކުރުމުގެ ވިޔަފާރި ފުޅާ ދާއިރާއެއްގައި ކުރާ، ހޯކްސް އަށް ލޯނު ފެސިލިޓީ ދޫކޮށްފައިވަނީ ލަންކާ ނޭޝަނަލް ޑިވެލޮޕްމަންޓް ބޭންކްގެ އިންވެސްޓްމަންޓް ބޭންކް (އެންޑީބީއައިބީ) އާއި ޕީޕަލްސް ބޭންކް ގުޅިގެންނެވެ. އެންޑީބީއައިބީ އިން ހަތް މިލިއަން ޑޮލަރު ދިންއިރު، ޕީޕަލްސް ބޭންކް އިން ފަސް މިލިއަން ޑޮލަރު ދީފައިވެ އެވެ.
ލަންކާގެ އިކޮނޮމިކް ނެކްސްޓް ނޫހަށް، މި ލޯނު ދިނުމާ ބެހޭ ގޮތުން އެންޑީބީއައިބީގެ ސީއީއޯ ދަރްޝަން ޕެރޭރާ ވިދާޅުވެފައިވާ ގޮތުން ހޯކްސް އަށް ލޯނު ދޫކުރި މައިގަނޑު ސަބަބަކީ ރާއްޖެއަށް ބޭނުންވާ ތެޔޮ މެދުކެނޑުމެއްނެތި ސަޕްލައި ކުރުމަށް ބާރު އެޅުމުގެ ގޮތުންނެވެ.
މި ލޯނު ދޫކުރި ރާއްޖޭގެ ހޯކްސް ކުންފުންޏަކީ 2007 ވަނަ އަހަރު އުފެއްދި ކުންފުންޏެވެ. މި ކުންފުނީގެ އެންމެ އިސްވެރިއަކީ އަހުމަދު ރަޝީދު ހަސަން އެވެ. އެ ކުންފުނީގެ ތެޔޮ ސަޕްލައި ކުރުމުގެ އޮޕަރޭޝަންގައި 17 ތެޔޮ ޓޭންކަރު ގެންގުޅޭއިރު އެ ތިލަފުށީގައި 30،000 ޓަނުގެ ތެޔޮ ރައްކާކުރެވޭނެ ވަސީލަތް ގާއިމްކޮށްފައިވެ އެވެ.