ހަބަރު

ފާއިޒު ސުޕްރީމް ކޯޓަށް އައްޔަން ކުރުން މަޑުޖައްސާލައިފި

ސުލޫކީ މައްސަލަތަކަކާ ހެދި ކުރީގެ އުއްތަމަ ފަނޑިޔާރު އަހުމަދު ފާއިޒު، އަލުން ސުޕްރީމް ކޯޓަށް އައްޔަން ކުރުން މަޑު ޖައްސާލައިފި އެވެ.

ޖޭއެސްސީއަށް އަމިއްލަ ފަރާތަކުން ވަނީ ހަ ކަމެއް ފާހަގަކޮށް ފާއިޒުއާ ގުޅޭ ސުލޫކީ މައްސަލައެއް ހުށަހަޅާފަ އެވެ. ފާއިޒުގެ މައްސަލަތަކެއް ޖޭއެސްސީއަށް ހުށަހެޅިއިރު ރައީސް އިބްރާހިމް މުހައްމަދު ސޯލިހު ވަނީ ސުޕްރީމް ކޯޓުގެ ފަނޑިޔާރު ކަމަށް އޭނާ އައްޔަން ކުރެއްވުމަށް ނަން ނޮމިނޭޓް ކުރައްވާފަ އެވެ.

އެކަމާ ގުޅިގެން މިއަދު ބޭއްވި ޖޭއެސްސީގައި މަޝްވަރާ ކުރުމަށްފަހު ނިންމާފައިވަނީ ފާއިޒުއާ ގުޅޭ ގޮތުން ރައީސްއަށް ލަފާ އެރުވުން މަޑުޖައްސާލާށެވެ.

ޖޭއެސްސީއިން ނެރުނު ބަޔާނެއްގައި ބުނީ ފާއިޒަކީ ސުޕްރީމް ކޯޓުން ގާނޫނު އަސާސީއާ ހިލާފަށް ނެތް ބާރުތައް ބޭނުންކޮށްގެން ނިންމާފައިވާ ނިންމުންތަކުގައި ބައިވެރިވެވަޑައިގަންނަވާ ބޭފުޅެއް ކަމަށް ބެލެވޭތީ، އެކަމުގައި ފާއިޒު ބައިވެރިވެވަޑައިގެންފައިވޭތޯ އަދި އެއީ ކިހާ މިންވަރަކަށްތޯ ބެލުމަށްޓަކައި އެ ނަމާމެދު ގޮތެއް ނިންމުން މަޑުޖައްސާލަން މިއަދުގެ ބައްދަލުވުމުގައި ނިންމާފައިވާ ކަމަށެވެ.

ޖޭއެސްސީއަށް ހުށަހަޅަފައިވާ ފާއިޒުއާ ގުޅޭ ޝަކުވާގައި ހަ ކަމެއް ފާހަގަކޮށްފައިވެ އެވެ. އޭގެ ތެރޭގައި ޖޭއެސްސީގެ ދަށުން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން ނެގި މައްސަލަ އާއި ޖުޑިޝަލް ކައުންސިލް އުފެއްދި މައްސަލަ ހިމެނެ އެވެ.

މީގެއިތުރުން އިލެކްޝަން ކޮމިޝަންގެ ކުރީގެ ރައީސް ފުވާދު ތައުފީގުގެ މައްޗަށް އަމިއްލަ އިސް ނެގުމުގެ މަތިން މައްސަލައެއް ބަލައި ހުކުމް އިއްވި މައްސަލަ އާއި ހިއުމަން ރައިޓްސް ކޮމިޝަންގެ މައްޗަށް ވެސް ސްމޯޓޯކޮށް މައްސަލައެއް ހިންގި މައްސަލަ ވެސް ފާހަގަކޮށްފައިވެ އެވެ.

މިކަންކަން ފާހަގަކޮށް ސުލޫކީ މައްސަލާގައި ބުނެފައިވަނީ އެ ނިންމުންތައް ސުޕްރީމް ކޯޓުން ނިންމިއިރު ވެސް އުއްތަމަ ފަނޑިޔާރުގެ މަގާމުގައި ހުންނެވީ ފާއިޒު ކަމަށެވެ. އެހެންކަމުން އެކަންކަން ބަލަން ޖެހޭނެ ކަމަށެވެ.

ސުލޫކީ މައްސަލާގައި ބުނެފައިވަނީ އެ ކަންކަމަކީ ސުޕްރީމް ކޯޓުގެ އެހެން ބައެއް ފަނޑިޔާރުން ވަކި ކުރުމުގައި ވެސް ބަލާފައިވާ އަސާސެއް ކަމުން އަލުން ފާއިޒު ސުޕްރީމް ކޯޓަށް އައްޔަން ކުރުމުގައި ޖޭއެސްސީއިން އެކަމަށް ރިއާޔަތް ކުރަން ޖެހޭނެ ކަމަށެވެ.

ފާއިޒްއާ ގުޅޭ ގޮތުން ހުށަހެޅި ސުލޫކީ މައްސަލާގައިވާ ކަންކަމާ ގުޅިގެން ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި ފަނޑިޔާރު އާދަމް މުހައްމަދު ވަނީ މަގާމުން ވަކިކޮށްފަ އެވެ. އެ ފަނޑިޔާރުން ވެސް އެ ނިންމުންތަކުގައި ބައިވެރިވެވަޑައިގެންފައިވާތީ އެވެ. ޖޭއެސްސީއިން ނިންމާފައިވަނީ އެއީ ސުޕްރީމް ކޯޓުން ގާނޫނު އަސާސީއާ ހިލާފަށް ނިންމާފައިވާ ނިންމުންތަކެއް ކަމަށެވެ.