ނިމިގެން ދިޔައީ ރާއްޖެ އަޅުވެތިވި އަހަރެއް: ސައީދު

ނިމިދިޔަ އަހަރަކީ ދިވެހިރާއްޖެ އެތައްގޮތަކުން އަޅުވެތިވި އަހަރެއް ކަމަށް ކުރީގެ އިކޮނޮމިކް މިނިސްޓަރު އަދި މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެ އެވެ.

ސައީދު ވިދާޅުވީ 2019 ވެގެންދިޔައީ ދިވެހިރާއްޖެ އެތައްގޮތަކުން އަޅުވެތިވި ބަނަ އަހަރަކަށް ކަމަށެވެ. އެގޮތުން އިގްތިސާދީ، އިޖްތިމާއީ އަދި ގައުމީ ތަރައްގީ ގެ މިސްރާބް ގެއްލުނު އަހަރަކަށް 2019 ވެގެން ދިޔަ ކަމަށް ސައީދު ވިދާޅުވިއެވެ.

"2020 އަކީ މާތް ﷲ ގެ ވާގިފުޅާއިއެކު ކޮންމެ ފަރުދަކާއި އާއިލާއަކަށް އުފަލާއި ކުރިއެރުން ގެނުވާނެ އަހަރެއް ކަމުގައި ލައްވާށި." ސައީދުގެ ކުރެއްވި ޓްވީޓެއްގައި ވިދާޅުވެފައިވެއެވެ.

ރައީސް ސޯލިހްގެ ވެރިކަމުގެ ފުރަތަމަ އަހަރަކީ ކުރިއެރުމެއް ނުލިބުނު އަހަރެއް ކަމަށް އިދިކޮޅުން ބުނިނަމަވެސް ނިމިގެންދިޔަ އަހަރަކީ ރާއްޖޭގައި ސުލްހަ ގާއިމުކުރެވި، ދުނިޔޭގެ ކުރިމަތީގައި ރާއްޖެއަށް ގަދަރާއި އިހުތިރާމް ލިބުނު އަހަރެއް ކަމަށާ 2020 ވަނަ އަހަރަކީ މުޅި ރާއްޖެ ތަރައްގީ ކުރުމުގެ މުޅިން އައު ފެށުމެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވަނީ ވިދާޅުވެފައެވެ.

އައު އަަހަރުގެ ތަހުނިޔާ ފޮނުއްވާ ރައީސް ނެރުއްވި ބަޔާނުގައި ވިދާޅުވީ ނިމިގެންދިޔަ 2019 ވަނަ އަހަރަކީ، اللهُ سُبْحَانَهُ وَتَعَالَى ގެ މަދަދާއި ހެޔޮ ތައުފީގާއެކު، މުޅި ރާއްޖޭގައި ސުލްހަވެރިކަން ގާއިމުކުރެވުނު އަހަރެއް ކަމަށާ ސިޔާސީ ދެބަސްވުންތަކާއި އަރައިރުންތަކުން ދުރަށްޖެހި، އާއިލީ އަދި އިޖުތިމާއީ ގުޅުންތަކުން، މުޖުތަމައުގައި އުފާވެރިކަން ފަތުރައިލަދިން އަހަރެއް ކަމަށެވެ. އަދި ބައިނަލްއަގްވާމީ މުޖްތަމައުގެ އިހްތިރާމާއި ގަދަރު ރާއްޖެއަށް ލިބި، އިގްތިސާދީ ގޮތުންވެސް ރާއްޖެ ކަޑައްތުކުރީ، ފާގަތި އަދި ފުދުންތެރި ދުވަސްތަކެއް ކަމަށެވެ.

ރައީސް ވިދާޅުވީ އެމަނިކުފާނު ރައްޔިތުންނަށް ދެއްވަން އޮތް ޔަގީން ކަމަކީ ރައްޔިތުން އުފެއްދި ސަރުކާރު، ދެމިއޮންނާނީ، ފުދުންތެރި އަދި ބާއްޖަވެރި ދިރިއުޅުމަކަށް ރައްޔިތުން ކުރާ އުންމީދުތައް، ހަގީގަތަކަށް ހަދައިދިނުމުގައި ކަމަށެވެ. އަދި މި އަހަރުގެ ތެރޭގައިވެސް، ސަރުކާރުން އެންމެ ބޮޑު އިސްކަމެއް ދޭނީ، އިޖުތިމާއީ އަދާލަތު ގާއިމުކޮށް، ރައްޔިތުންނަށް އުފާވެރި އަދި ފާގަތި ދިރިއުޅުމެއް ހޯދައިދިނުމަށް ކަމަށާ ރައްޔިތުންގެ އިންސާނީ ހައްގުތައް ހިމާޔަތްކޮށްދީ، ގާނޫނުއަސާސީން ކަށަވަރުކޮށްދީފައިވާ އަސާސީ ހައްގުތައްް ހަމަހަމަކަމާއި އަދުލުވެރިކަމާއެކު ރައްޔިތުންނަށް ފޯރުކޮށްދިނުމަށް ކަމަށެވެ.