ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް ކުރިމަތިލައްވާނެ ކަމަށާ ހުންނެވީ މާލެ ސިޓީގެ ރައްޔިތުންނަށް އިހްލާސްތެރި ހިދުމަތްތަކެއް ކޮށްދިނުމުގެ އަޒުމުގައި ކަމަށް މާލޭގެ މިހާރުގެވެސް މޭޔަރު ޝިފާ މުހައްމަދު ވިދާޅުވެއްޖެ އެވެ.
ޝިފާ މިއަދު ވިދާޅުވީ މާލޭ ސިޓީގެ މޭޔަރުގެ މަގާމަށް ކުރިމަތިލައްވާނެ ކަމަށް މީގެ ތިން މަސްދުވަސް ކުރިން އިއުލާނު ކޮށްފައިވާނެ ކަމަށާ އަދިވެސް ހުންނެވީ އެ ނިންމުމުގެ މަތީގައި ކަމަށެވެ.
އަދި މާލެ ސިޓީގެ ރައްޔިތުންނަށް އިހްލާސްތެރި ހިދުމަތްތަކެއް ކޮށްދިނުމުގެ އަޒުމުގައި ހުންނެވި ކަމަށް ވިދާޅުވިއެވެ.
"މާލެ ސިޓީގެ މޭޔަރުގެ މަގާމަށް ކުރިމަތިލައްވާނެ ކަމަށް މީގެ ތިން މަސް ކުރިން އަޅުގަނޑު ދެންނެވިން. މާލެ ސިޓީގެ ރައްޔިތުންނަށް އިހްލާސްތެރި ހިދުމަތްތަކެއް ކޮށްދިނުމުގެ އަޒުމުގައި ހުރި ވާހަކަ ތަކުރާރުކޮށްލުމާއެކު، އެންމެ ބޭފުޅުންގެ ތާއީދު އަޅުގަނޑަށް ދެއްވުމަށް އެދި ދަންނަވަން." ޝިފާ ވިދާޅުވިއެވެ.
ނިމިދިޔަ ދެ ދައުރުވެސް މާލެ ސިޓީގެ މޭޔަރުގެ މަގާމުގައި ހުންނެވި ޝިފާއަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ރައީސް ނަޝީދުގެ ވެރިކަމުގައި އެޑިއުކޭޝަން މިނިސްޓަރަކަށް ހުންނެވި ޝިފާގެ މޭޔަރު ކަމުގައި މާލޭގައި ހުރި މައްސަލަތައް ހައްލު ނުކުރެވި ދިގުލައިގެން ދިއުމަކީވެސް ގިނަ ބައެއްގެ ކަންބޮޑުވުމެވެ.
މީގެ އިތުރުން ސިޓީ ކައުންސިލް މެންބަރުންގެ މެދުގައިވެސް ބޮޑެތި ހިޔާލުތަފާތުވުން ތަކެއް އުފެދި، ބައެއް މެންބަރުން ގެންދަވަނީ ޝިފާއަށް ބޮޑެތި ތުހުުމަތުތައްވެސް ކުރައްވަމުންނެވެ.
އަންނަ އަހަރުގެ އޭޕްރީލް މަހު އޮންނަ ލޯކަލް ކައުންސިލްތަކުގެ އިންތިހާބުގައި މާލޭގެ މޭޔަރު ކަމަށް ކުރިމަތިލެއްވުމުގެ ޝައުގުވެރިކަން ގިނަ ބޭފުޅުންތަކެއް ގެންދަވަނީ ފާޅުކުރައްވަމުންނެވެ. އެމްޑީޕީންވެސް ހަތަރު ބޭފުޅަކު ވަނީ މޭޔަރު ކަމަށް ޝައުގުވެރިކަން ފާޅުކޮށްފައެވެ.
އެހެންކަމުން މިމަހުގެ 31 ވަނަ ދުވަހު އޮންނަ އެމްޑީޕީގެ ޕްރައިމަރީ ވަރަށް ފޯރި ގަދަވާނެ ކަމަށް ބެލެވެއެވެ. މިފަހަރުވެސް މޭޔަރު ކަމަށް ވަޑައިގަތުމުގެ ޝައުގުވެރިކަން މިހާރުގެވެސް މޭޔަރު ޝިފާ މުހައްމަދާއި، ޑެޕިއުޓީ މޭޔަރު ޝަމާއު ޝަރީފް އަދި ހެންވޭރު ދެކުނު ދާއިރާ މިހާރު ތަމްސީލް ކުރައްވާ އެމްޑީޕީގެ ކައުންސިލަރު އަހްމަދު ނިޔާޒްވެސް ވަނީ ފާޅުކުރައްވާފައެވެ.
މީގެ އިތުރުން ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު އަދި ކުރީގެ މަޖިލީސް މެންބަރު އަލްހާން ފަހްމީވެސް ވަނީ މޭޔަރު ކަމަށް ޝައުގުވެރިކަން ފާޅުކުރައްވާފައެވެ.