އާ އަހަރާ ދިމާކޮށް ފުލުހުން ހިންގާ ބޮޑު އޮޕަރޭޝަން އަދިވެސް ކުރިޔަށްދާ ކަމަށް ފުލުހުން ބުނެފި އެވެ.
ފުލުހުން މިއަދު ކުރި ޓުވީޓެއްގައި ބުނީ "އޮޕަރޭޝަން ރިވެލި" އަދިވެސް ކުރިޔަށް ގެންދާ ކަމަށާއި އެއީ ރައްޔިތުންގެ ރައްކާތެރިކަން ކަށަވަރު ކުރުމަށްޓަކައި ކަމަށެވެ. އެ އޮޕަރޭޝަނާ ބެހޭ އިތުރު ތަފްސީލެއް ނުދެ އެވެ.
އާ އަހަރާ ދިމާކޮށް ފުލުހުން ހިންގާ އޮޕަރޭޝަންގައި މާލެ އާއި ހުޅުމާލެ އަދި ވިލިމާލޭގައި ގިނަ އަދަދެއްގެ ފުލުހުން ހަރަކާތްތެރިވެ އެވެ. އެގޮތުން އުޅަނދުތައް ހުއްޓުވާ ފާސް ކުރުމާއި މީހުން ބަލާ ފާސް ކުރެވެ. އަދި މަސްތުވާތަކެތި އަތުލައިގަތުމަށް ގިނަ މަސައްކަތްތަކެއްކޮށް ރާއްޖޭގެ އެކި ކަންކޮޅުގައި ފުލުހުން ހަރަކާތްތެރިވަމުންދެ އެވެ.
ފުލުހުން އެންމެ ފަހުން އާންމުކުރި ހިސާބުތަކުން ދައްކާ ގޮތުގައި އެ އޮޕަރޭޝަންގެ ތެރެއިން މިހާތަނަށް 65 މީހުން ވަނީ ހައްޔަރުކޮށްފަ އެވެ. އޭގެ ތެރޭގައި އައްޑޫ އިން 15 މީހުންނާއި މާލެއިން 19 މީހުން އަދި ފުވަމުލަކު 23 މީހުން ހިމެނެ އެވެ. އަދި މިދިޔަ ބުރާސްފަތި ދުވަހާ ހަމަޔަށް ބަންދުގައި ހުރީ 19 މީހުން ކަމަށް ވެސް ފުލުހުން ބުންޏެވެ.
