ތިމާވެއްޓާ ގުޅުންހުރި މައްސަލަތަކުގައި މި ނިސްޓަރު، ޑރ. ހުސައިން ރަޝީދު ހަސަން އާންމުންގެ ހިޔާލު ހޯއްދަވަން ފައްޓަވައިފި އެވެ.
ތިމާވެށީގެ މައްސަލަތަކާ ގުޅޭގޮތުން މިނިސްޓަރާ މަޝްވަރާ ކުރުމުގެ ފުރުސަތު އެންވާރަމަންޓް މިނިސްޓްރީން ދެނީ ކޮންމެ އާދިއްތަ ދުވަހު ހެނދުނު 9:00 އިން 10:00 އަށް އެޕޮއިންޓްމަންޓަކާ ނުލަ އެވެ. މިނިސްޓަރާ ބައްދަލު ކޮށް މައްސަލަތަކާ މެދު މަޝްވަރާ ކުރަން އާއްމުންނަށް ހުޅުވާލާފައި ވާއިރު މިނިސްޓަރު މިއަދު ވަނީ ބައެއް ފަރާތްތަކާ ބައްދަލު ކޮށް ތިމާވެށީގެ އެކި މައްސަލަތަކާބެހޭ އާއްމުންގެ ކަންބޮޑުވުންތައް އޮޅުން ފިލުއްވާފަ އެވެ.
މިނިސްޓަރާ ބައްދަލު ކުރުމުގެ ފުރުސަތު ހުޅުވާލާނެ ކަމަށް އެ މިނިސްޓްރީން އިއުލާން ކުރީ އާ އަހަރަށް މަރުހަބާ ކިޔަމުންނެވެ.
މިނިސްޓަރާ އާންމުން އެއްވެސް އެޕޮއިންޓްމަންޓަކާ ނުލާ ބައްދަލު ކުރެވޭ ގޮތަށް ހަމަޖައްސުމުން ރަށްރަށުގައި ހުރި ތިމާވެށީގެ މައްސަލަތާކައި ރަށްރަށުގައި ހިންގާ ތަރައްގީގެ މަޝްރޫއުތަކާ ގުޅިގެން ތިމާވެއްޓާ ބެހޭ ކަންބޮޑުވުންތައް ސިދާ މިނިސްޓަރާ ހިއްސާ ކުރުމުގެ ފުރުސަތު ހަމަޖެހި، އެދެވޭ ނަތީޖާތަކެއް ނެރެވޭނެ ކަމަށް އުއްމީދު ކުރާ ކަމަށް އެ މިނިސްޓްރީން ބުނެ އެވެ.
މިއީ އާންމު ރައްޔިތުންނަށް މިނިސްޓަރަކާ ބައްދަލު ކުރެވޭ ގޮތަށް މިފަދަ އިންތިޒާމެއް ހަމަޖެއްސި ފުރަތަމަ ފަހަރެވެ. ރަށްރަށުގެ ތިމާވެށީގެ ހާލަތު ބައްލަވާލެއްވުމުގެ ގޮތުން މިނިސްޓަރު ވަނީ ވޭތުވެދިޔަ އަހަރު އެކި ރަށްރަށަށް ވެސް ދަތުރު ކުރައްވައިފަ އެވެ.