ވަގުތަކީ ވަރަށް ތަފާތު ތަޖުރިބާތަކެއް އިންސާނާއަށް ކުރުވާ އެއްޗެކެވެ. މާޒީގައި ކިތަންމެ ފުރިހަމަ މަސައްކަތްތަކެއް ކޮށްފައި ވިޔަސް އެކަން މީހުން ހަނދާން ނެތޭލެއް ވަރަށް އަވަހެވެ. އަދި ފަހުން އޭނާ ކިތަންމެ ރަނގަޅު މަސައްކަތެއް ކުރިޔަސް އެކަން ބަލައި ނުގަތުން ވެސް ހަމަ ވަރަށް އެކަށީގެންވެ އެވެ. "ޝޯލޭ" ގެ ޑައިރެކްޓަރު ރަމޭޝް ސިއްޕީ އަށް ވެސް މިހާރު ދިމާވެފައިވަނީ ހަމަ މިފަދަ ހާލަތެކެވެ.
ވަރަށް ގިނަ އަހަރު ތަކަކަށް ފަހު ރަމޭޝް ސިއްޕީ ފިލްމެއް ޑައިރެކްޓްކުރި އެވެ. "ޝިމްލާ މިރްޗީ" ކިޔާ މި ފިލްމުގައި އޭނާ ބައިވެރިކުރީ ހެމާ މާލިނީ އާއި ރާޖްކުމާރު ރާއޯ އެވެ. ނަމަވެސް މި ފިލްމު ނިންމައި ރިލީޒް ކުރަން ތައްޔާރުވިއިރު ފިލްމު އަޅުވައިދޭން އިންޑިއާގެ އެއްވެސް ސިނަމާއަކުން ތައްޔާރެއް ނޫނެވެ.
ސަބަބަކީ ކޮބައި ކަމަށްތޯ އެވެ؟ މި ފިލްމު ޕްރޮޑިއުސަރު ސިނަމާތަކުގެ ވެރިންނާއެކު އެގްރިމެންޓެއްގައި ސޮއިކުރަން ބޭނުން ނުވުމުންނެވެ. މި އެގްރިމެންޓްގައި ވާގޮތުން ފިލްމު ސިނަމާތަކުގައި އަޅުވާތާ މަދުވެގެން އަށް ހަފުތާ ނުވަނީސް އެއްވެސް ޑީޖިޓަލް ޕްލެޓްފޯމެއްގައި ފިލްމް ސްޓްރީމް ނުކުރާނެ ކަމަށް ޕްރޮޑިއުސަރުން އެއްބަސްވާން ޖެހެ އެވެ.
މިއީ ހަމައެކަނި މި ފިލްމަށް ސިނަމާތަކުން ކަނޑައެޅި ގަވާއިދެއް ނޫނެވެ. މިހާރު ސިނަމާތަކުގައި ރިލީޒްކުރާ ހުރިހާ ފިލްމެއް ވެސް ސިނަމާތަކުގައި ދައްކަނީ ޕްރޮޑިއުސަރުން މިގޮތަށް އެއްބަސްވެ އެގްރިމެންޓްގައި ސޮއި ކުރުމުންނެވެ.
އެގްރިމެންޓްގައި ސޮއިކުރަން އެއްބަސް ނުވީ، އުފެއްދުމުގެ މަރުހަލާގައި ފަސް ވަރަކަށް އަހަރު ހޭދަވެފައިވާ މި ފިލްމަށް ބޮކްސް އޮފީހުގައި އެއްވެސް ކާމިޔާބެއް ވެދާނެ ކަމުގެ ޔަގީންކަން ޕްރޮޑިއުސަރުންގެ ނެތީމަ ކަމަށް ބައެއް ނޫސްތަކުން ވަނީ ލަފާ ކޮށްފަ އެވެ.
އެހެންވެ "ޝިމްލާ މިރްޗީ" ރިލީޒް ކޮށްފައި ވަނީ ވަރަށް މަދު އަދި ކުދި ސިނަމާއެއްގަ އެވެ. މިކަމާ ފިލްމުގެ ތަރިން ކަމަށްވާ ހެމާ އާއި ރާޖްކުމާރު ރާއޯ ވަނީ ހިތްހަމަނުޖެހިފަ އެވެ. ނަމަވެސް ފިލްމު ޕްރޮމޯޓް ކުރުމުގެ އެއްވެސް މަސައްކަތެއް ހެމާ ވެސް ރާޖްކުމާރު ވެސް ކުރާތީއެއް ނުފެނެ އެވެ. ނޫސްތަކަށް އިންޓަވިއު ދިނުމާއި އެނޫންވެސް ކަންތައްތައް ކޮށްފައެއް ވެސް ނެތެވެ.
ޕްރޮޑިއުސަރުން ވެސް ވަނީ ފިލްމު އެއްގޮތަކަށް ވެސް ނުހިނގާނެކަމަށް މުޅިން ނިންމާފައި ކަމަށް ބެލެވެ އެވެ. ފިލްމު ރިލީޒް ކުރުމަށް އެއްވެސް އިވެންޓެއް ނުބާއްވާތާ ފިލްމާ ގުޅޭ ޓުވީޓެއް ހިސާބު ވެސް ކޮށްފައެއް ނެތެވެ.
"ޝިމްލާ މިރްޗީ" ރިލީޒްކޮށްފައިވާކަން ޕްރޮޑިއުސަރުގެ އިސް ފަރާތެއް ކަމަށްވާ ރާޖޭޝް ނައިރު ވަނީ ޔަގީން ކޮށްދީފަ އެވެ. ނަމަވެސް ސިނަމާތަކާ އެގްރިމެންޓް ނުހެދުމުގެ ސަބަބުން ދިމާވި މައްސަލަތަކާ ހެދި ފިލްމަށް ބޮޑެތި ސިނަމާތަކުން ޖާގަ ނުލިބުނުކަމަށް ދެކެވޭ ވާހަކައަށް އޭނާ ޖަވާބެއް ނުދިނެވެ. އޭނާ ބުނީ އެއީ އޭނަގެ ޑިޕާޓްމަންޓެއް ނޫން ކަމަށެވެ.
ޑައިރެކްޓަރު ރަމޭޝް ސިއްޕީ ވެސް މިވަގުތު ހުރީ އެއްވެސް އެއްޗެއް ނުބުނެ މަޑުންނެވެ. ފިލްމަށް ދިމާވި ކަންތައްތަކުން އެއްވެސް އަސަރެއް ނުކުރާ ކަމަށް ދައްކައިގެން ހުރި ނަމަވެސް އޭނާގެ ފިލްމާ ދޭތެރޭ ކަންތައް ވީގޮތުން ރަމޭޝް ހުރީ ވަރަށް މާޔޫސްވެފަ އެވެ. ހަގީގަތުގައި ވެސް މިއީ އޭނާ ކަހަލަ ކުޅަދާނަ ޑައިރެކްޓަރަކަށް ކުރަން ޖެހުނު ވަރަށް ހިތި ތަޖުރިބާ އެކެވެ.
ރަމޭޝް ސިއްޕީ