ލަންޑަން (ޖެނުއަރީ 5) – ތަޖުރިބާކާރުގެ ގޯލްކީޕަރު ޕެޓާ ޗެކް ޗެލްސީގައި މަޑުކޮށް، އެ ޓީމުގެ ތިން ވަނަ ގޯލްކީޕަރު އޮސްޓްރޭލިއާގެ މާކް ޝުވޯޒާ ލެސްޓާ ސިޓީ އަށް ބަދަލުވެއްޖެ އެވެ.
ޗެލްސީގެ އެއްވަނަ ގޯލްކީޕަރަކަށް ކޯޓުއާ ނެގުމާއެކު، ޗެކް އެ ޓީމު ދޫކޮށްލަން ވިސްނަމުންދާ ކަމަށް މީޑިއާ ރިޕޯޓްތަކުން ދަނި ބުނަމުންނެވެ. އެކަމަކު ޗެލްސީގެ ކޯޗު ޖޯސޭ މޮރީނިއޯ ބުނީ ޗެކް ދޫނުކުރާނެ ކަމަށެވެ.
އިނގިރޭސި ލީގުގައި 500 މެޗު ހަމަކުރި ފުރަތަމަ ބިދޭސީ ކުޅުންތެރިއާ ކަމަށްވާ ޝުވޯޒާ އިންގްލެންޑްގައި ކުޅެން ފެށީ 1996 ވަނަ އަހަރެވެ. އިންގްލެންޑްގައި ޝުވޯޒާގެ ފުރަތަމަ ކްލަބަކަށްވީ ބްރެޑްފޯޑް ސިޓީ އެވެ. ބްރެޑްފޯޑް އިން މިޑަލްސްބަރާ އަށް ބަދަލުވެ، އެ ކްލަބުގައި ޝުވޯޒާ 11 އަހަރު ހޭދަކުރި އެވެ. ޝުވޯޒާ ފުލަމް އަށް ބަދަލުވީ 2008 ވަނަ އަހަރެވެ. -- ބީބީސީ