ފިލްމީ ތަރިންގެ ދަރިންނަށް ބޮލީވުޑުން ފުރުސަތު ލިބޭލެއް ފަސޭހަކަމުން ވަރަށް ގިނަ ބަޔަކު ޝަކުވާ ކުރެ އެވެ. ކިތަންމެ ހުނަރުވެރި އެކްޓަރެއް ނަމަވެސް ފިލްމު އިންޑަސްޓްރީގެ މީހަކާ ގުޅުމެއް ނެތްނަމަ ބޮލީވުޑުން ރަނގަޅު މަގާމެއް ހޯދަން ވަރަށް އުނދަގޫކަމަކަށް ވެއެވެ. ނަމަވެސް ކުރީގެ ފިލްމީ ތަރިންގެ ދަރިންނަށް ވުމަކީ ބޮލީވުޑްގައި ކާމިޔާބު ޔަގީންވާ ކަމެއް ވެސް ނޫނެވެ. ފާއިތުވީ އަހަރެއްހާ ދުވަހުގެ ތެރޭގައި ނުކުތް ފިލްމުތަކުން އަލަށް ތައާރަފްވި ފިލްމީ ތަރިންގެ ދަރިންގެ ތެރެއިން އެއްވެސް އެކްޓަރަކަށް ކާމިޔާބު ލިބިފައި ނުވުމަކީ މީގެ ހެއްކެކެވެ.
މިދިޔަ ހުކުރު ދުވަހު ރިލީޒްކުރި "ސަބް ކުޝަލް މަންގަލް" އަކީ ކުރީގެ ހިންދީ ފިލްމީ ތަރި އަދި މިހާރު ބޯޖްޕޫރީ ފިލްމުތަކުން ސުޕަސްޓާރެއްގެ ދަރަޖަ ހޯދާފައިވާ އެކްޓަރު ރަވީ ކިޝަންގެ ދަރިފުޅު ރިވާ ކިޝަން އާއި ޕްރިޔަންކް ޝަރުމާގެ ފިލްމެކެވެ. ޕްރިޔަންކް އަކީ ޕްރޮޑީއުސަރު ޕްރަދީޕް ޝަރުމާ އާއި ކުރީގެ މަޝްހޫރު ފިލްމީ ބަތަލާ ޕަދްމިނީ ކޮލާޕޫރީގެ ދަރިއެކެވެ. މި ފިލްމަށް ފުރަތަމަ ދުވަހުއްސުރެ ބޮކްސް އޮފީހުގައި ވަރަށް ބޮޑު ނާކާމިޔާބެއް ވަނީ ކުރިމަތިވެފަ އެވެ.
މިދިޔަ އަހަރު ނުކުތް "ޕަލް ޕަލް ދިލް ކޭ ޕާސް" އިން ބޮލީވުޑަށް ނުކުތް ކަރަން ޑެއޯލް އަށް ވެސް ކުރިމަތިވީ ނާކާމިޔާބެވެ. ކަރަން އަކީ ދަރުމެންދުރަގެ ކާފަ ދަރިއެކެވެ. އަދި ސަނީ ޑެއޯލްގެ ދަރިއެކެވެ. މި ފިލްމު ޕްރޮޑީއުސްކޮށް ޑައިރެކްޓްކުރީ ވެސް ހުދް ސަނީ އެވެ. ނަމަވެސް ފިލްމު ފްލޮޕްވެސް ކަރަން އަށް ވެސް ގިނަ ބަޔެއްގެ މަލާމާތް އަމާޒުވުން ފިޔަވައި އެހެން ކަމެއް މި ފިލްމަކުން ނުވި އެވެ.
ސަންޖޭ ލީލާ ބާންސާލީ އަށް ބޮޑުބޭބެ ކިޔާ ޝަރްމީން ސައިގަލް ބޮލީވުޑަށް ތައާރަފްވީ ވެސް މިދިޔަ އަހަރު އެވެ. "މަލާލް" އިން ޝަރްމީން އާއެކު ބޮލީވުޑަށް ތައާރަފްވީ އެކްޓަރު ޖާވީދު ޖެފްރީގެ ދަރިފުޅު މީޒާން ޖެފްރީ އެވެ. މަލާލްއަކީ ޝަރްމީން ތައާރަފްކުރަން ޚުދް ބާންސާލީ ޕްރޮޑިއުސްކުރި ފިލްމެކެވެ. ނަމަވެސް މި ފިލްމުވެސް ވީ ފްލޮޕެވެ.
އެކްޓަރު މޮހިނީޝް ބެހެލްގެ ދަރިފުޅު ޕްރަނޫތަން ބެހެލް ތައާރަފްކުރުމަށް ސަލްމާން ޙާން ޕްރޮޑިއުސްކުރި "ނޯޓްބުކް" އަށް ވެސް ދިމާވީ ހަމަ މިފަދަ ގޮތެކެވެ. އަދި ސަލްމާންގެ ކޮއްކޮ އަރްޕިތާގެ ފިރިމީހާ އަޔޫޝް ޝަރުމާ ތައާރަފްކުރުމުގެ ގޮތުން އުފެއްދި "ލަވް ޔާތުރީ" އަށް ވެސް ކުރިމަތިވީ ނާކާމިޔާބެވެ. އަދި އޭގެ ކުރިން "ހީރޯ" ކިޔާ ފިލްމެއް ވެސް ސަލްމާން އުފެއްދި އެވެ. ސުނިލް ޝެޓީގެ ދަރިފުޅު އަތިޔާ ޝެޓީ އާއި އަދިތުޔާ ޕަންޗޯލީގެ ދަރިފުޅު ސޫރަޖް ޕަންޗޯލީ ތައާރަފްކުރުމަށެވެ. މި ފިލްމަށް ވެސް ބޮކްސް އޮފީހުގައި ކާމިޔާބެއް ހޯދޭ ގޮތެއް ނުވި އެވެ.
ކޮމްޕްލީޓް ސިނަމާގެ އެޑިޓަރު އަތުލް މޯހަން ބުނި ގޮތުގައި ފިލްމު އިންޑަސްޓްރީގައި މަސައްކަތްކުރާ މީހުންގެ އާއިލާގެ މީހުންނަށް ވިޔަސް އޮއްޓަރު ހުރި ރަނގަޅު ފިލްމެއް ނުކުޅޭނަމަ ކާމިޔާބެއް ނުވާނެ އެވެ. މިހާރު ބެލުންތެރިންނަށް ފިލްމުތައް ބަލަން ޝައުގުވެރިވަނީ އެ ފިލްމެއްގެ އޮއްޓަރަށް ބަލާފައި ކަމަށާއި ރަނގަޅު ކޮންޓެންޓެއް ނެތް ފިލްމެއް މިހާރު ނުހިނގާނެ ކަމަށް ވެސް އަތުލް ބުންޏެވެ.
އޭނާ އިތުރަށް ބުނި ގޮތުގައި އިންޑަސްޓްރީގައި މަސައްކަތްކުރާ މީހުންގެ އާއިލާގެ މީހުން ތައާރަފްކުރަން ފާއިތުވީ އަހަރެއްހާ ދުވަހު އުފެއްދި ހުރިހާ ފިލްމުތަކަކީ އެއްވެސް އޮއްޓަރެއް ނެތް ފިލްމު ތަކެކެވެ. އަދި ފިލްމު ޕްރޮޑިއުސްކުރީ ނަން މަޝްހޫރު ބެނާތަކުން ނޫން ކަމަށް ވުމުން ފިލްމަށް ބެލުންތެރިންގެ ޝައުގުވެރިކަން އެއްގޮތަކަށް ވެސް ނުލިބޭނެކަން މާ ކުރިން ވެސް ޔަގީން ވެއެވެ.
އިންޑަސްޓްރީއާ ގުޅުން ހުރި ނަމަ ފިލްމީ ދުނިޔެއަށް ތައާރަފްވާން ފަސޭހަވާނެ ކަމަށް އޭނާ ވެސް ގަބޫލު ކުރެ އެވެ. ނަމަވެސް ގިނަ ދުވަހަށް ދެމި ހުރެވޭނީ އެމީހެއްގެ ހުނަރާއި ބުރަ މަސައްކަތުންނެވެ. މިއީ އިންޑަސްޓްރީއާ ގުޅުން ނެތް މީހުންނަށް ވެސް ކަންތައް ވާނެ ގޮތެވެ. އެ މީހުންނަށް ހަމައެކަނި އުނދަގޫވަނީ ފިލްމެއް ކުޅޭނެ ފުރުސަތެއް ލިބުމެވެ. ފުރުސަތެއް ލިބިއްޖެނަމަ ހުނަރާއި ބުރަ މަސައްކަތުން އެ މީހުން ވެސް ކުރި އަރައިގެން ދެއެވެ. ކާރްތިކް އާރްޔަން، އަޔޫޝްމާން ކުރާނާ، ރާޖްކުމާރު ރާއޯ ފަދަ ތަރިންނަކީ މީގެ ރަނގަޅު މިސާލު ތަކެވެ.